మనుషులా.. రాక్షసులా? మహిళను చంపి ముక్కలుగా నరికి పెనం మీద వండేసిన బంధువు!

జార్ఖండ్‌లోని సెరైకేలా-ఖర్సవాన్ జిల్లాలో వెలుగుచూసిన దారుణ హత్య ఘటన తీవ్ర కలకలం రేపుతోంది. 45 ఏళ్ల గిరిజన మహిళను పదునైన ఆయుధంతో హత్య చేసిన అనంతరం, ఆమె మృతదేహాన్ని ముక్కలుగా నరికేశారు. అంతేకాకుండా, శరీర భాగాలను ఇంటి వెనుక ఉన్న పెనంలో వండుకున్నట్లు పోలీసుల విచారణలో తేలింది. ఈ ఘటనకు సంబంధించి మృతురాలి బావ పౌలుష్ ముండాను పోలీసులు అదుపులోకి తీసుకుని విచారిస్తున్నారు.

సంతకు వెళ్లి తిరిగి రాని మహిళ

సెరైకేలా-ఖర్సవాన్ జిల్లాలోని కుచాయ్ పోలీస్ స్టేషన్ పరిధిలో ఉన్న జోంబ్రో గ్రామంలో ఈ ఘోరం చోటుచేసుకుంది. మంగళవారం (నవంబర్ 11) రాత్రి గ్రామంలో హాకీ టోర్నమెంట్‌తో పాటు సంత నిర్వహించారు. ఈ సందర్భంగా 45 ఏళ్ల గిరిజన మహిళ మద్యం విక్రయించేందుకు అక్కడికి వెళ్లింది. అయితే, రాత్రి అయినప్పటికీ ఆమె ఇంటికి తిరిగి రాకపోవడంతో భర్త, కుటుంబ సభ్యులు ఆందోళనకు గురయ్యారు. గ్రామ పరిసర ప్రాంతాల్లో ఆమె కోసం గాలింపు చేపట్టారు.

ఛిద్రమైన స్థితిలో మృతదేహం.. కనిపించని శరీర భాగాలు

కుటుంబ సభ్యులు వెతుకుతున్న సమయంలో మహిళ మృతదేహం అనుమానాస్పదంగా, ఛిద్రమైన స్థితిలో కనిపించింది. మృతదేహంలోని కొన్ని శరీర భాగాలు కనిపించకపోవడంతో కుటుంబ సభ్యులు తీవ్ర దిగ్భ్రాంతికి గురయ్యారు. ప్రాథమిక విచారణ ప్రకారం, పౌలుష్ ముండా మొదట మహిళను పదునైన ఆయుధంతో హత్య చేసి, అనంతరం మృతదేహాన్ని ముక్కలుగా నరికినట్లు తెలుస్తోంది. ఆ శరీర భాగాలను ఇంటి వెనుక ఉన్న పెనంలో వండినట్లు పోలీసులు అనుమానిస్తున్నారు. అయితే, ఈ వివరాలపై అధికారిక నిర్ధారణ రావాల్సి ఉంది.

నిందితుడు అదుపులో.. పోలీసుల దర్యాప్తు

సమాచారం అందుకున్న వెంటనే దల్భంగా ఓపీ పోలీసులు ఘటనా స్థలానికి చేరుకున్నారు. మృతదేహాన్ని స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు. అనుమానితుడు పౌలుష్ ముండాను అదుపులోకి తీసుకుని విచారిస్తున్నారు. ఈ హత్యకు గల కారణాలు, నిందితుడి పాత్ర, ఘటనకు సంబంధించిన ఇతర అంశాలపై పోలీసులు దర్యాప్తు కొనసాగిస్తున్నారు.

అత్యాచారం జరిగిందా?

మహిళ హత్యకు ముందు లైంగిక దాడికి గురై ఉండవచ్చనే అనుమానాలు కూడా వ్యక్తమవుతున్నాయి. అయితే, ఈ విషయాన్ని పోలీసులు ఇప్పటివరకు ధృవీకరించలేదు. పోస్టుమార్టం నివేదిక వచ్చిన తర్వాతే లైంగిక దాడి జరిగిందా లేదా అన్నది స్పష్టమయ్యే అవకాశం ఉంది. 45 ఏళ్ల మహిళపై జరిగిన ఈ దారుణం జోంబ్రో గ్రామంతో పాటు పరిసర ప్రాంతాల్లో తీవ్ర భయాందోళనలకు కారణమైంది. నిందితుడిపై వచ్చిన ఆరోపణల నిజానిజాలు, హత్య వెనుక అసలు కారణాలు పోలీసుల దర్యాప్తులో తేలాల్సి ఉంది.

మరిన్ని క్రైమ్ వార్తల కోసం ఇక్కడ క్లిక్ చేయండి..