స్మార్ట్ఫోన్లకు ప్రత్యామ్నాయం.. Google, Samsung భాగస్వామ్యంతో సంచలనానికి Gentle Monsterరెడీ
టెక్నాలజీ ప్రపంచంలో స్మార్ట్‌ఫోన్ల తర్వాత స్మార్ట్ గ్లాసెస్ కీలక పాత్ర పోషించే రోజులు దగ్గరపడుతున్నాయి. ఇప్పటికే పలు కంపెనీలు ఆర్టిఫిషియల్ ఇంటెలిజెన్స్ ఆధారంగా పనిచేసే కళ్లద్దాలను అభివృద్ధి చేస్తున్నాయి. ఈ క్రమంలో ప్రముఖ ఐవేర్ బ్రాండ్ Gentle Monster సరికొత్త AI Smart Glassesను తీసుకొచ్చేందుకు సిద్ధమైంది. Google, Samsung భాగస్వామ్యంతో రూపొందుతున్న ఈ గ్లాసెస్‌పై కంపెనీ తాజాగా ఆసక్తికరమైన టీజర్‌ను విడుదల చేసింది. డిసెంబర్‌లో వినియోగదారులకు అందుబాటులోకి తీసుకురావాలని లక్ష్యంగా పెట్టుకున్నట్లు సమాచారం.
Updated on: Nov 13, 2026 | 6:50 AM
Gentle Monster స్మార్ట్ గ్లాసెస్‌లో Google Gemini AI టెక్నాలజీ, Android XR ఆపరేటింగ్ సిస్టమ్ ఉండనున్నాయి. దీంతో కేవలం కళ్లద్దాల్లా ధరించడమే కాకుండా, భాషలను అనువదించుకోవడం, నావిగేషన్ సూచనలు పొందడం, ఎదురుగా కనిపించే వస్తువుల గురించి వివరాలు తెలుసుకోవడం వంటి పనులు చేయవచ్చు. ఈ గ్లాసెస్‌కు సంబంధించిన ప్రచార టీజర్‌లో హాలీవుడ్ నటుడు Joaquin Phoenix కనిపించడం కూడా ప్రత్యేక ఆకర్షణగా నిలిచింది. వీటి ఫీచర్లు, విడుదల తేదీ, ధర వివరాలు తెలుసుకుందాం.
Joaquin Phoenixతో సినిమాటిక్ టీజర్
Gentle Monster విడుదల చేసిన టీజర్‌కు ప్రముఖ దర్శకుడు Jonathan Glazer దర్శకత్వం వహించారు. ఇందులో Joaquin Phoenix ఒక హోటల్‌లో సేల్స్‌మ్యాన్‌గా కనిపిస్తారు. ఆయన తన కళ్లద్దాలను తాకి ‘Translate’ అని కోరే సన్నివేశం టీజర్‌లో ప్రధాన ఆకర్షణగా నిలిచింది. నిజ జీవితానికి, కలల ప్రపంచానికి మధ్య జరిగే ప్రయాణంగా ఈ ప్రచార చిత్రాన్ని కంపెనీ అభివర్ణించింది. పూర్తి ప్రచార చిత్రం నవంబర్ మధ్యలో విడుదల కానుంది.
సాంకేతికంగా ఈ గ్లాసెస్ Android XR ఆపరేటింగ్ సిస్టమ్‌పై పనిచేస్తాయి. ఇందులో Google Gemini AI సదుపాయం ఉంటుంది. లైవ్ లాంగ్వేజ్ ట్రాన్స్‌లేషన్, నావిగేషన్, కెమెరా ద్వారా కనిపించే వస్తువులను గుర్తించి వాటి గురించి వివరాలు తెలుసుకోవడం వంటి ఫీచర్లు అందుబాటులోకి రానున్నాయి. అమెరికాలోని న్యూయార్క్ నగరంలో నవంబర్ 13 నుంచి 23 వరకు ప్రత్యేక ప్రివ్యూ కార్యక్రమాన్ని కూడా ఏర్పాటు చేస్తున్నారు.
Warby Parker పోటీ..
AI స్మార్ట్ గ్లాసెస్ విభాగంలో Gentle Monsterకు పోటీగా మరో ప్రముఖ ఐవేర్ బ్రాండ్ Warby Parker కూడా కొత్త గ్లాసెస్‌ను తీసుకొస్తోంది. ఇవి కూడా Google, Samsung భాగస్వామ్యంతో రూపొందుతున్నాయి. అందుబాటులో ఉన్న సమాచారం ప్రకారం Warby Parker గ్లాసెస్ ప్రీ-ఆర్డర్లు నవంబర్ 12న ప్రారంభమై, డిసెంబర్ మధ్యలో డెలివరీలు మొదలుకానున్నాయి. తొలుత 65 స్టోర్లలో, ఆ తర్వాత మరో 295 స్టోర్లలో వీటిని అందుబాటులో ఉంచనున్నారు.
Gentle Monster AI Smart Glasses విషయానికి వస్తే అమెరికాలోని వినియోగదారుల కోసం నవంబర్ 12 నుంచి అధికారిక వెబ్‌సైట్‌లో ప్రీ-ఆర్డర్లు ప్రారంభమయ్యే అవకాశం ఉంది. డిసెంబర్‌లో మార్కెట్లోకి రానున్నట్లు సమాచారం. అయితే వీటి అధికారిక ధరను కంపెనీ ఇంకా వెల్లడించలేదు. ఇతర దేశాల్లో, ముఖ్యంగా భారత్‌లో ఎప్పుడు అందుబాటులోకి వస్తాయనే వివరాలపైనా స్పష్టత రావాల్సి ఉంది.
