రాజీనామాకు సిధ్దపడిన గులాం నబీ ఆజాద్ !

తాజా కాంగ్రెస్ ‘అసమ్మతివాది’గా ముద్ర పడిన పార్టీ సీనియర్ నేత గులాం నబీ ఆజాద్,, రాజీనామా చేసేందుకు సిధ్ధపడినట్టు తెలుస్తోంది. కొంతమంది సీనియర్ నేతలు బీజేపీతో కుమ్మక్కయ్యారన్న రాహుల్ గాంధీ ఆరోపణల నేపథ్యంలో.. తనకు ఈ ‘వ్యవహారం’లో పాత్ర ఉందని తేలితే రాజీనామా చేస్తానని ఆయన ప్రకటించినట్టు తెలిసింది. కానీ ఈ లేఖను మాత్రం ఆయన సమర్థించారు. కపిల్ సిబల్ , శశి థరూర్, ఆజాద్, పృథ్వీ రాజ్ చవాన్, ఆనంద్  శర్మ తదితరులు ఈ లేఖపై సంతకాలు చేశారు.

రాహుల్ గాంధీ ఫైర్:

ఈ లేఖపై సంతకాలు చేసినవారంతా బీజేపీతో కుమ్మక్కయ్యారని రాహుల్ తీవ్రంగా ధ్వజమెత్తారు. అసలే పార్టీ బలహీనంగా ఉన్నప్పుడు, మధ్యప్రదేశ్, రాజస్థాన్ రాష్ట్రాల్లో సంక్షోభాన్ని ఎదుర్కొంటున్నప్పుడు, పైగా సోనియా ఆరోగ్యం బాగా లేనప్పుడు ఈ లెటర్ ను విడుదల చేయడమేమిటని ఆయన ప్రశ్నించారు. ఈ లేఖ పర్యవసానంగా తలెత్తిన ఉద్రిక్తతను సడలించేందుకు కొందరు నాయకులు సిడబ్ల్యూసీ సమావేశానికి ముందే సోనియాను కలుసుకునేందుకు ప్రయత్నించినా అది సఫలం కాలేదు. 1999 లో సోనియా విదేశీయతను ప్రశ్నించి శరద్ పవార్ బయటకు వెళ్లి న తరువాత పార్టీలో అంతర్గత సంక్షోభం తలెత్తడం ఇదే మొదటిసారి. ఇలా ఉండగా..సోనియా నాయకత్వం పట్ల పూర్తి విశ్వాసాన్ని ప్రకటిస్తూ ఏకగ్రీవ తీర్మానాన్ని పార్టీ ఆమోదించవచ్ఛునని  కూడా తెలుస్తోంది.