Sonia Gandhi: ఇవాళ ED విచారణకు సోనియాగాంధీ.. నేషనల్ హెరాల్డ్ కేసులో ఎంక్వైరీ.. దేశవ్యాప్తంగా ఆందోళనలకు కాంగ్రెస్ పిలుపు
National Herald Case: ఈడీ ముందు విచారణకు హాజరు కానున్నారు కాంగ్రెస్ చీఫ్ సోనియాగాంధీ. మరోవైపు, సోనియాను ఈడీ ప్రశ్నించడాన్ని నిరసిస్తూ ఢిల్లీలో, దేశవ్యాప్తంగా ఆందోళనలకు రెడీ అయింది కాంగ్రెస్ శ్రేణులు.
Updated on: Jul 21, 2022 | 6:44 AM
ఈడీ ముందు విచారణకు హాజరు కానున్నారు కాంగ్రెస్ చీఫ్ సోనియాగాంధీ(Sonia Gandhi). మరోవైపు, సోనియాను ఈడీ ప్రశ్నించడాన్ని నిరసిస్తూ ఢిల్లీలో, దేశవ్యాప్తంగా ఆందోళనలకు రెడీ అయింది కాంగ్రెస్ శ్రేణులు. నేషనల్ హెరాల్డ్ – AJL మనీ లాండరింగ్‌ కేసులో ఎన్‌ఫోర్స్‌మెంట్‌ డైరెక్టరేట్‌ ముందు విచారణకు హాజరు కానున్నారు కాంగ్రెస్ అధినేత్రి సోనియా గాంధీ. ఉదయం 11 గంటలకు ఈడీ కార్యాలయంలో విచారణకు హాజరవుతారు. అయితే రాజకీయ కక్షతోనే కాంగ్రెస్ నాయకత్వాన్ని ఈడీ టార్గెట్‌ చేసిందని కాంగ్రెస్ పార్టీ నాయకులు మండిపడుతున్నారు. సోనియాకు సంఘీభావం తెలిపేందుకు కాంగ్రెస్ టాప్‌ లీడర్లంతా ఏఐసీసీ హెడ్‌ క్వార్టర్స్‌కు చేరుకోనున్నారు. కాంగ్రెస్ ఎంపీలు, నాయకులు ఈడీ ఆఫీస్‌కి ర్యాలీగా రానున్నారు. కాంగ్రెస్ కుటుంబమంతా తమ అధ్యక్షురాలు సోనియా గాంధీకి అండగా నిలబడుతుందని, బీజేపీ నిరంకుళ పాలనపై దేశవ్యాప్తంగా నిరసనలు చేపడతామని ఆ పార్టీ ట్విట్టర్‌లో పేర్కొంది. మరోవైపు, ఢిల్లీ కాంగ్రెస్ ఆధ్వర్యంలో రాజ్‌భవన్‌ ముందు ఆందోళన నిర్వహించనున్నారు. సోనియాను ఈడీ ప్రశ్నిస్తుండటంపై కాంగ్రెస్ శ్రేణులు భగ్గుమంటుండటంతో పోలీసులు అలెర్ట్‌ అయ్యారు.
అంతకుముందు జూన్‌లో రాహుల్ గాంధీని ED ఇంటరాగేషన్ సమయంలో కూడా మనీలాండరింగ్ ఆరోపణలను నిరాధారమైనవని పేర్కొంటూ ఢిల్లీలో భారీ ఎత్తున ప్రదర్శన నిర్వహించారు. మోడీ ప్రభుత్వం రాజకీయ ప్రతీకారానికి పాల్పడిందని కాంగ్రెస్ ఆరోపించారు. గురువారం, కాంగ్రెస్ ఎంపీలు పార్లమెంట్ లోపల, వెలుపల నిరసనలు చేయనుండగా, పార్టీ సీనియర్ నాయకులు, కార్యకర్తలు అక్బర్ రోడ్‌లోని ప్రధాన కార్యాలయం వద్దకు రానున్నారు. అక్కడి నుంచి ఈడీ కార్యాలయం మార్చ్ చేయననున్నారు.
ఢిల్లీ ప్రదర్శనలో రాజస్థాన్ అశోక్ గెహ్లాట్..
ఢిల్లీ ప్రదర్శనలో రాజస్తాన్ ముఖ్యమంత్రి అశోక్ గెహ్లాట్ కూడా పాల్గొననున్నారు. న్యూఢిల్లీ ప్రాంతంలో కట్టుదిట్టమైన భద్రతా ఏర్పాట్ల దృష్ట్యా ప్రస్తుతం జరుగుతున్న పార్లమెంట్ సమావేశాల సందర్భంగా ప్రదర్శనలకు అనుమతి లేదు. దీంతో ఢిల్లీలోని రాజ్‌భవన్‌ దగ్గర కాంగ్రెస్ కార్యకర్తలు పెద్దఎత్తున నిరసన చేపట్టనున్నారు.
తమ రాజధానిలోని ఈడి కార్యాలయం లేదా రాజ్‌భవన్‌ల వెలుపల నిరసన తెలపాలని కాంగ్రెస్ నాయకత్వం అన్ని రాష్ట్ర యూనిట్లను పిలుపునిచ్చింది. కాంగ్రెస్‌కు చెందిన పెద్ద నేతలంతా ప్రదర్శనను మరింత ఉధృతం చేసేందుకు కసరత్తు చేస్తున్నారు. దీనికి సంబంధించి మంగళ, బుధవారాల్లో పార్టీ ముఖ్యనేతల సమావేశం జరిగింది.
సోనియా గాంధీకి ఈడీ సమన్లు జారీ చేసింది.అంతకుముందు..
జూన్ మధ్యలో రాహుల్ గాంధీని దాదాపు 5 రోజుల్లో దాదాపు 50 గంటల పాటు ఈడీ ప్రశ్నించింది. ఆ తర్వాత కాంగ్రెస్ నాయకులు, కార్యకర్తలు రోజూ ప్రదర్శనలు చేస్తూ ఆ పార్టీకి చెందిన పెద్ద నాయకులను అరెస్టులు చేశారు. ఈడీ అధికారులు గత నెలలోనే సోనియాకు సమన్లు జారీ చేశారు. అయితే సోనియా గత నెలలో కరోనా బారినపడ్డారు. కోలుకున్న తర్వాత పోస్ట్‌ కోవిడ్‌ సమస్యలతో బాధపడ్డారు. వారం రోజుల పాటు ఢిల్లీలోని గంగారామ్ హాస్పిటల్‌లో చికిత్స పొందారు. దాంతో విచారణకు మరింత గడువు కావాలని సోనియా ఈడీని కోరారు. ఇప్పుడు సోనియాగాంధీని ED విచారణ పేరుతో మోడీ ప్రభుత్వం అనవసరంగా ఇబ్బందులకు గురిచేస్తోందిని మండిపడుతున్నారు.
విషయం ఏంటి?
నష్టాల నుంచి బయటపడేందుకు 1937లో స్థాపించిన నేషనల్ హెరాల్డ్ వార్తాపత్రికను ప్రచురించిన ఏజేఎల్ కంపెనీకి కాంగ్రెస్ పార్టీ 90 కోట్ల రుణం ఇచ్చింది. తరువాత, ఈ రుణానికి బదులుగా AJL తన వాటాలలో 99 శాతం యంగ్ ఇండియన్ కంపెనీకి ఇచ్చింది. యంగ్ ఇండియన్ కంపెనీలో సోనియా గాంధీ, రాహుల్ గాంధీ 38-38 శాతం వాటాలను కలిగి ఉన్నారు. యంగ్ ఇండియన్‌కి అందిన AJL షేర్లతో సహా యంగ్ ఇండియన్ ఖాతాలో వచ్చిన డబ్బుపై ED విచారణ జరుపుతోంది.
ఈ కేసులో సోనియా గాంధీ, రాహుల్ గాంధీ కంటే ముందే పవన్ బన్సాల్, మల్లికార్జున్ ఖర్గే తదితరులను ప్రశ్నించారు. స్వాతంత్ర్య వారసత్వంతో సంబంధం ఉన్న AJLకి దాని నాయకులు సహాయం చేశారని, యంగ్ ఇండియన్ కంపెనీ ఏర్పడిన నిబంధనల ప్రకారం వాటాదారులు ఒక్క రూపాయి కూడా ఉపసంహరించుకోలేరని కాంగ్రెస్ వాదిస్తోంది. ఇలాంటి పరిస్థితుల్లో నల్లధనాన్ని.. ఇక్క వైట్‌గా మార్చుకుంటున్నారనే ఆరోపణలు నిరాధారమైనవి, రాజకీయ ప్రేరేపితమైనవని కాంగ్రెస్ అంటోంది.
