Legal Advise: పెద్దలను ఎదిరించి పెళ్లి చేసుకుంటే.. ఆస్తిలో వాటా ఆడగొచ్చా? చట్టం ఏం చెబుతుందంటే..
అపురూపంగా పెంచుకున్న కూతురుని యువరాజుతో పెళ్లి చేయాలని, కొడుకుని మంచి మర్యాదగల అమ్మాయితో పెళ్లి చేయాలని ప్రతి తల్లిదండ్రులు అనుకుంటారు. కానీ కొంతమంది పిల్లలు తమ తల్లిదండ్రుల ఇష్టానికి వ్యతిరేకంగా ప్రేమ వివాహం చేసుకుని వారికి తీరని వేదన మిగులుస్తుంటారు. తల్లిదండ్రులను వదిలి ప్రేమించిన వ్యక్తితో పారిపోయి..
Updated on: Apr 14, 2025 | 2:01 PM
తల్లిదండ్రులు తమ పిల్లల వివాహం గురించి ఎన్నో కలలు కంటారు. అపురూపంగా పెంచుకున్న కూతురుని యువరాజుతో పెళ్లి చేయాలని, కొడుకుని మంచి మర్యాదగల అమ్మాయితో పెళ్లి చేయాలని ప్రతి తల్లిదండ్రులు అనుకుంటారు. కానీ కొంతమంది పిల్లలు తమ తల్లిదండ్రుల ఇష్టానికి వ్యతిరేకంగా ప్రేమ వివాహం చేసుకుని వారికి తీరని వేదన మిగులుస్తుంటారు. తల్లిదండ్రులను వదిలి ప్రేమించిన వ్యక్తితో పారిపోయి పెళ్లి చేసుకున్న ఉదంతాలు ఎన్నో. అలాంటి సందర్భంలో తల్లిదండ్రులు కోపంతో.. తమ పిల్లలతో సంబంధాలను శాశ్వతంగా తెంచుకుంటారు. వారు తమ ఆస్తిలో ఒక్క పైసా ఆస్తి కూడా ఇవ్వరని కూడా అంటుంటారు. కానీ చట్టం ప్రకారం పిల్లలు తల్లిదండ్రుల ఇష్టానికి వ్యతిరేకంగా వివాహం చేసుకుంటే, తల్లిదండ్రుల ఆస్తిలో వాటా ఇవ్వడానికి నిరాకరించవచ్చా? చట్టం ఏం చెబుతుందో ఇక్కడ తెలుసుకుందాం..
కొడుకు లేదా కూతురు తల్లిదండ్రుల ఇష్టానికి వ్యతిరేకంగా వివాహం చేసుకున్నా లేదా మరేదైనా కారణం చేత పిల్లలు వారితో సంబంధాలు తెంచుకున్నా తల్లిదండ్రులు తమ పిల్లలకు తాము సంపాదించిన ఆస్తిపై హక్కును ఇవ్వడానికి నిరాకరించవచ్చు. వారసత్వాన్ని వెనక్కి తీసుకోవచ్చు. అయితే 2016లో ఢిల్లీ హైకోర్టు ఇచ్చిన తీర్పులో, పూర్వీకుల ఆస్తిలో మాత్రమే పిల్లలకు హక్కులు ఉంటాయని స్పష్టం చేసింది. తల్లిదండ్రులు తాము సంపాదించిన ఆస్తిని ఎవరికి ఇవ్వాలో నిర్ణయించుకునే పూర్తి హక్కు తల్లిదండ్రులకే ఉంటుంది. ఉదాహరణకు తల్లిదండ్రులు కష్టపడి సంపాదించిన ఇల్లు, భూమి మొదలైన వాటిపై పూర్తి హక్కులు వారికే ఉంటాయి. ఈ ఆస్తినంతా ఎవరికి ఇవ్వాలనేది కూడా వారే నిర్ణయం తీసుకోవచ్చు. పిల్లలు తమ ఇష్టానికి వ్యతిరేకంగా వివాహం చేసుకుంటే, తల్లిదండ్రులు తమ పిల్లలకు తాము సంపాదించిన ఆస్తిలో వాటా ఇవ్వకూడదనే హక్కు కూడా వారికి ఉంటుంది. వారు తమ ఆస్తిని ఎవరికైనా ఇవ్వవచ్చు.
కానీ పిల్లలకు పూర్వీకుల ఆస్తిపై, అంటే తాతల నుంచి వారసత్వంగా వచ్చిన కుటుంబ ఆస్తిపై హక్కులు లేకుండా ఎవ్వరూ అడ్డగించలేరు. తల్లిదండ్రులకు తమ పూర్వీకుల ఆస్తిని తమ పిల్లలకు దక్కకుండా ఇతరులకు ఇచ్చే హక్కు వారికి ఉండదు.సరస్వతి అమ్మాళ్ vs రాజగోపాల్ అమ్మాళ్ (1954) కేసులో ఒక వ్యక్తి కష్టపడి సంపాదించిన ఆస్తిపై పూర్తి హక్కులు ఉంటాయని, ఆ ఆస్తిని ఎవరికి ఇవ్వాలనేది అతని హక్కు, నిర్ణయం మీదే ఆధారపడి ఉంటుందని సుప్రీంకోర్టు తీర్పు ఇచ్చింది. 2011లో జరిగిన ఒక కేసులో కర్ణాటక హైకోర్టు తమ తండ్రి సొంతంగా సంపాదించిన ఆస్తిలో పిల్లలకు బలవంతంగా వాటా లాక్కోకూడదని తీర్పు చెప్పింది.
ఢిల్లీ హైకోర్టు 2021లో ఇచ్చిన తీర్పు ప్రకారం, కొడుకు తన తల్లిదండ్రులతో దురుసుగా ప్రవర్తిస్తే లేదా వారి ఇష్టానికి విరుద్ధంగా వివాహం చేసుకుని విడివిడిగా నివసిస్తుంటే, తల్లిదండ్రులు అతన్ని తమ ఆస్తి నుండి వెళ్లగొట్టవచ్చు. అతనికి ఎటువంటి ఆస్తి ఇవ్వకూడదు. పిల్లలు వారి ఇష్టానికి వ్యతిరేకంగా వివాహం చేసుకుంటే, ఆ సందర్భంలో వారికి ఆస్తిలో వాటా నిరాకరించబడుతుంది. చట్టపరంగా ఎవరికి ఏమి ఇవ్వాలో, ఎవరికి ఏమి ఇవ్వ కూడదో వీలునామాలో స్పష్టంగా రాయాలి. అలాగే తల్లిదండ్రులు తమ కొడుకు/కూతురుకు ఆస్తిలో వాటా ఇవ్వడానికి నిరాకరిస్తున్నామని పేర్కొంటూ ఒక నోటీసును కూడా పత్రికల్లో ప్రచురించవచ్చు. కానీ ఈ పత్రాలు సొంతంగా కొనుగోలు చేసిన ఆస్తులకు మాత్రమే చెల్లుబాటు అవుతాయి.
ఆస్తికి సంబంధించిన మరో ముఖ్యమైన చట్టం
హిందూ వారసత్వ చట్టం, 1956లోని సెక్షన్ 30 ప్రకారం.. ఏ హిందూ వ్యక్తి అయినా తన ఆస్తిని వీలునామా ద్వారా పంపిణీ చేయవచ్చు. హిందూ దత్తత, నిర్వహణ చట్టం, 1956 లోని సెక్షన్ 18 ప్రకారం.. తల్లిదండ్రుల ఇష్టానికి విరుద్ధంగా ప్రవర్తించిన ఏ బిడ్డకైనా తల్లిదండ్రులు ఆస్తిలో వాటా ఇవ్వడానికి నిరాకరించవచ్చు. భారత రాజ్యాంగంలోని ఆర్టికల్ 300A ప్రకారం.. ఒక వ్యక్తి తన ఆస్తిని తాను కోరుకునే ఎవరికైనా ఇవ్వవచ్చు. కానీ అది చట్టానికి అనుగుణంగా జరగాలి.
మరిన్ని ఆరోగ్య వార్తల కోసం క్లిక్‌ చేయండి.
