అక్షయ తృతీయ

వైశాఖ శుక్ల పక్షంలో తదియ రోజున అక్షయ తృతీయ పర్వదినాన్ని జరుపుకోవటం సంప్రదాయం. వైశాఖే మాసి రాజేంద్ర శుక్ల పక్షే తృతీయకా|| అక్షయాసాతిథిః ప్రోక్తా కృత్తికా రోహిణీయుతా|| అక్షయ అంటే క్షయం కానిది.. పుణ్యాన్ని కలిగించే ఒక తిథి. ఈ రోజున లక్ష్మీదేవిని పూజిస్తారు. పితృదేవతలను ఆరాధిస్తారు. ఈ రోజున చేసే దానాలు అక్షయ ఫలాన్ని ఇస్తాయని నమ్మకం. ఈ రోజున చేసే గోదానం, భూదానం, సువర్ణదానం, వస్త్రదానం ఏవైనా శుభ ఫలితాలను అందిస్తాయి. ఈ రోజున చేసే జప, హోమ, దానాదులు అక్షయమవుతాయి కనుకనే ఇది అక్షయతృతీయ అయింది. ఈ రోజున గంగాస్నానం చేసేవారు సకల పాపవిముక్తులు అవుతారు. లక్ష్మీ సహితమైన నారాయణుని, గౌరీ సహితుడైన త్రిలోచనుని పూజించాలి. పూజ అనంతరం వేసవికి అవసరం అయిన వస్తువులను విరివిగా దానం చేస్తారు. ఈ తిథి రోజున బంగారం కొనడం శుభప్రదమని ఒక విశ్వాసం ఉత్తర దేశంలో పుట్టి క్రమంగా దక్షిణ దేశానికి వ్యాపించింది. ఈ రోజు ఏది దానం చేసిన మనకు పదిరెట్లు మళ్ళీ లభిస్తుందని అర్థం. కానీ తప్పకుండా బంగారం కొనాలని ఏ గ్రంథాల్లోనూ లేదు.

అక్షయ తృతియ రోజున ఎటువంటి మంచి చెడులు చూసుకోకుండా శుభకార్యాలు చేయవచ్చని నమ్మకం. అంతేకాదు ఈ రోజున కొన్ని పనులు చేయవద్దు. . జూదం, మద్యపానం, అసత్యం, గర్వం, కామం, హింస, వైరం, దొంగతనం వంటి పనులు చేయవద్దు అని పురాణాల్లో పేర్కొన్నారు. అక్షయ తృతీయ రోజున చేసే పాప కర్మల ఫలితం అక్షయంగా వెంటాడుతూనే ఉంటుందని ధర్మ శాస్త్రంలో పేర్కొంది. ఈ ఏడాది అక్షయ తృతీయ ను ఏప్రిల్ 19వ తేదీన జరుపుకోనున్నారు.