పాత సబ్బు ముక్కలను పారేస్తున్నారా? ఐదు నిమిషాల్లో ఇలా హ్యాండ్ వాష్ తయారు చేసుకోండి!

ఇంట్లో మిగిలిపోయిన చిన్న చిన్న సబ్బు ముక్కలను తరచుగా పనికిరానివిగా భావించి పారేస్తుంటారు. కానీ, అవే ముక్కల నుండి ఒక మంచి లిక్విడ్ హ్యాండ్ వాష్‌ను తయారు చేసుకోవచ్చునని తెలిస్తే ఆశ్చర్యపోతారు. ఈ పద్ధతి డబ్బును ఆదా చేయడమే కాకుండా వ్యర్థాలను తగ్గించడంలో కూడా సహాయపడుతుంది. దీనిలోని ప్రత్యేకత ఏమిటంటే, దీనికి ఎక్కువ పదార్థాలు అవసరం లేదు. కొన్ని సులభమైన టిప్స్‌ పాటిస్తే మీరు ఇంట్లోనే సువాసనతో కూడిన, మృదువైన హ్యాండ్ వాష్‌ను తయారు చేసుకోవచ్చు.

దీనికి కావలసిన వస్తువులు:

పాత సబ్బు ముక్కలు (సుమారు ఒక కప్పు అయ్యేలా)

నీరు (సబ్బు పరిమాణాన్ని బట్టి 3-4 కప్పులు)

గ్లిజరిన్ (ఒకటి లేదా రెండు చెంచాలు – చేతులు పొడిబారకుండా ఉంచడానికి)

ఎసెన్షియల్ ఆయిల్ (నచ్చిన సువాసన కోసం – ఆప్షనల్)

తయారీ విధానం: మొదట మీ దగ్గర ఉన్న పాత సబ్బు ముక్కలన్నింటినీ తీసుకుని ఒక గ్రేటర్ (క్యారెట్ తురిమేది) సహాయంతో సన్నగా తురుముకోవాలి. ఒక పాత్రలో నీటిని తీసుకుని స్టవ్ మీద పెట్టి బాగా మరిగించాలి. నీరు మరుగుతున్నప్పుడు స్టవ్ మంటను తగ్గించి, అందులో మనం సిద్ధం చేసుకున్న సబ్బు తురుమును వేయాలి. సబ్బు ముక్కలు నీటిలో పూర్తిగా కరిగిపోయే వరకు ఒక చెంచాతో బాగా కలుపుతూ ఉండాలి.

సబ్బు పూర్తిగా కరిగిన తర్వాత స్టవ్ కట్టేయాలి. ఇప్పుడు ఆ మిశ్రమంలో గ్లిజరిన్, మీకు నచ్చిన ఎసెన్షియల్ ఆయిల్ (లావెండర్, రోజ్ లేదా టీ ట్రీ ఆయిల్) కొన్ని చుక్కలు వేసి కలపాలి. గ్లిజరిన్ వల్ల చేతులు మృదువుగా తయారవుతాయి.

ఈ మిశ్రమాన్ని కనీసం 12 నుండి 24 గంటల పాటు పక్కన పెట్టేయాలి. చల్లబడే కొద్దీ ఈ ద్రావణం చిక్కగా, మార్కెట్లో దొరికే హ్యాండ్ వాష్ లాగా మారుతుంది. మిశ్రమం పూర్తిగా చిక్కబడిన తర్వాత, దానిని బాగా కలిపి ఒక పాత ఖాళీ హ్యాండ్ వాష్ పంప్ బాటిల్‌లోకి నింపుకోవాలి. అంతే, ఇంట్లోనే పాత సబ్బు ముక్కలతో రూపాయి ఖర్చు లేకుండా కెమికల్స్ లేని హోమ్‌మేడ్ హ్యాండ్ వాష్ రెడీ!

మరిన్ని లైఫ్ స్టైల్ న్యూస్ కోసం క్లిక్ చేయండి..