Dandruff: కేవలం రెండు వారాల్లో మీ చుండ్రు దూరం, ఎలాగంటారా..

తలలో చుండ్రు వచ్చిందంటే చాలా చిరాకు పుడుతుంది. ఒకసారి మొదలైందంటే అది పెరుగుతూనే పోతుంది. విపరీతమైన దురద వల్ల తరచూ తలలో చేతులు పెట్టుకోవాల్సి వస్తుంది. ఇక దువ్వుకున్న ప్రతిసారీ చుండ్రు రాలుతూనే ఉంటుంది. చుండ్రు వచ్చిందంటే జుట్టు రాలిపోవడం ఇంకాస్త ఎక్కువవుతుంది, దీనివల్ల బట్టతల కూడా వచ్చే అవకాశం ఉంటుంది. పైగా, చుండ్రు ఒకరి నుంచి ఇంకొకరికి వ్యాపించవచ్చు. అందుకే, వీలైనంత త్వరగా ఈ సమస్యను పరిష్కరించుకోవాలి. చుండ్రును పోగొట్టడానికి రకరకాల మెడిసిన్, షాంపూలు అందుబాటులో ఉన్నాయి. వీటిని వాడటంలో ఎలాంటి సమస్య లేదు. కానీ పూర్తిగా వీటిపైనే ఆధారపడకుండా, కొన్ని సింపుల్ ఇంటి చిట్కాలు కూడా పాటించవచ్చు. ఇంట్లోనే దొరికే కేవలం రెండు పదార్థాలతో డాండ్రఫ్‌ను తగ్గించుకోవచ్చు. అది కూడా కేవలం రెండు వారాలలోనే! అదెలాగో ఇప్పుడు తెలుసుకుందాం.

చుండ్రు ఎందుకు వస్తుంది? లక్షణాలు ఏమిటి? చుండ్రు అనేది తల చర్మం పొడిబారడం వల్ల లేదా తలలో ఉండే ఒక రకమైన ఫంగస్ (మలస్సేజియా గ్లోబోసా) పెరగడం వల్ల వస్తుంది. కొన్నిసార్లు షాంపూలు, ఇతర ఉత్పత్తులలోని రసాయనాల వల్ల, లేదా కొన్ని ఇన్ఫెక్షన్ల వల్ల కూడా చుండ్రు వస్తుంది.

చుండ్రు లక్షణాలు:

తల నుంచి బూడిద రంగులో పొడిలా రాలడం.

తల చర్మం ఎర్రగా మారడం.

విపరీతంగా దురద పెట్టడం, తరచూ చేతులు పెట్టాల్సి రావడం.

జుట్టు రాలడం.

దద్దుర్లు రావడం, అవి దురద పెట్టడం.

చిట్కా: పెరుగు, మెంతుల అద్భుత మిశ్రమం! చుండ్రును పోగొట్టాలంటే కేవలం రెండే రెండు పదార్థాలు చాలు: ఒకటి పెరుగు, మరొకటి మెంతుల పొడి.

పెరుగు: పెరుగులో యాంటీ ఫంగల్ లక్షణాలు పుష్కలంగా ఉంటాయి. చుండ్రును పెంచే ఫంగస్‌ను తొలగించడంలో ఇది చాలా సమర్థవంతంగా పనిచేస్తుంది. పెరుగులో నిమ్మరసం కలిపితే ఈ ప్రభావం మరింత పెరుగుతుంది.

మెంతులు: మెంతులలో యాంటీ ఫంగల్ తో పాటు యాంటీ బ్యాక్టీరియల్ గుణాలు ఉంటాయి. ఇవి చుండ్రును తొలగించడంలో తోడ్పడతాయి. మెంతులలో ఉండే పోషకాలు కురులను ఆరోగ్యంగా ఉంచడంలో సహాయపడతాయి, పైగా జుట్టు రాలే సమస్యను కూడా ఇవి తగ్గిస్తాయి.

మిశ్రమాన్ని ఎలా తయారు చేయాలి?

ముందుగా ఒక కప్పులో మూడు లేదా నాలుగు చెంచాల పెరుగు తీసుకోండి.

అందులో ఒక చెంచా మెంతుల పొడి కలపండి.

ఈ రెండింటినీ బాగా కలిపి, వెంటనే వాడకుండా, కనీసం మూడు నుంచి నాలుగు గంటల పాటు అలాగే ఉంచండి. ఇలా నానడం వల్ల రెండింటిలో ఉన్న పోషకాలు సరైన విధంగా కలిసి, వాటి ప్రభావం పెరుగుతుంది.

ఆ తర్వాత ఈ మిశ్రమాన్ని తలకు అప్లై చేయాలి. జుట్టు కుదుళ్లకు పట్టేలా సరైన పద్ధతిలో మసాజ్ చేయండి. ఇలా కనీసం పావుగంట పాటు మర్దన చేస్తే ఫలితం కనబడుతుంది.

ఎన్ని రోజులు వాడాలి? ఈ మిశ్రమాన్ని తలకు పట్టించిన తర్వాత కనీసం అరగంట పాటు ఉంచాలి. ఆ తర్వాత తలస్నానం చేయాలి. ఎప్పుడో ఒకసారి వాడటం వల్ల ఫలితాలు ఉండకపోవచ్చు. అందుకే కచ్చితంగా రెండు వారాల పాటు, వారానికి రెండు లేదా మూడు సార్లు వాడితే మంచి ఫలితం ఉంటుంది. నిజానికి ఈ చిట్కాను అమ్మమ్మల కాలం నుంచే పాటిస్తున్నారు. ఇప్పుడు చాలా మంది కండీషనర్లు, షాంపూలు వాడుతూ ఈ సహజ చిట్కాను పక్కన పెడుతున్నారు. జుట్టుకు ఎలాంటి హాని చేయని, ఎలాంటి రసాయనాలు లేని సహజమైన పరిష్కారం ఇది. పెరుగు, మెంతులు మన ఇంట్లో ఎప్పుడూ అందుబాటులో ఉండేవే. ఈ రెండింటినీ కలిపితే చాలు, చుండ్రును పోగొట్టగలిగే అద్భుతమైన మందు ఇంట్లోనే తయారైపోతుంది.