నకిలీ పత్రాలతో బ్యాంకుకు టోకరా.. ఇద్దరు అరెస్ట్

నకిలీ పత్రాలు సృష్టించి బ్యాంకును బురిడీ కొట్టించిన ఇద్దరిని పోలీసులు అదుపులోకి తీసుకున్నారు.

  • Balaraju Goud
  • Publish Date - 7:27 am, Thu, 1 October 20
నకిలీ పత్రాలతో బ్యాంకుకు టోకరా.. ఇద్దరు అరెస్ట్

నకిలీ పత్రాలు సృష్టించి బ్యాంకును బురిడీ కొట్టించిన ఇద్దరిని పోలీసులు అదుపులోకి తీసుకున్నారు. ఈ ఘటన హైదరాబాద్ లో చోటుచేసుకుంది. నకిలీ ల్యాండ్ డాక్యుమెంట్స్ ద్వారా ఆర్‌బీఎల్‌ బ్యాంకు నుంచి రుణం తీసుకుని వాయిదాలు చెల్లించకుండా తప్పించుకు తిరుగుతున్నారు. దీంతో కేసు నమోదు చేసిన సీసీఎస్‌ పోలీసులు ఇద్దరిని అరెస్టు చేశారు.హైదరాబాద్‌ నగరానికి చెందిన మన్నెం వినోద, మన్నెం మధుకర్‌ రెడ్డి భార్యాభర్తలు. వారిద్దరితో పాటు ఎ.బాల్‌రెడ్డి, మోయిజ్‌పాషా, గుజ్జ నరసింహారెడ్డి, మరికొందరు కలిసి బ్యాంకు నుంచి రుణం పొందేందుకు 2015లో ప్లాన్‌ చేశారు. ఇందులో భాగంగా రంగారెడ్డి జిల్లా ఇబ్రహీంపట్నం మండలం శేరిగూడ గ్రామం చిరునామాపై అర్జున్‌ పౌల్ట్రీఫామ్‌ పేరిట నకిలీ పత్రాలు సృష్టించారు. దానికి సంబంధించిన 2.08ఎకరాల భూమి నకిలీ పత్రాలను ఆర్‌బీఎల్‌ బ్యాంక్‌, గ్రీన్‌ల్యాండ్స్‌ శాఖలో సమర్పించారు. వారి పత్రాలను నమ్మిన బ్యాంకు అధికారులు రూ. 3.7కోట్లు రుణం మంజూరు చేశారు. ఆ తర్వాత కొంతవరకు చెల్లించిన నిందితులు ఆ తర్వాత నిలిపివేశారు. దీంతో అనుమానం వచ్చిన బ్యాంకు అధికారులు ఎంక్వరీ చేయగా, అవి నకిలీ పత్రాలని నిర్ధారణకు వచ్చారు. దీంతో వెంటనే పోలీసులకు ఫిర్యాదు చేశారు. వారి వల్ల బ్యాంకుకు రూ. 2.72కోట్లు నష్టం వాటిల్లిందని బ్యాంకు అధికారులు తెలిపారు. అధికారులు సీసీఎస్‌ పోలీసులను ఆశ్రయించగా దర్యాప్తు చేపట్టి.. ప్రధాన నిందితులు మన్నెం మధుకర్‌రెడ్డి, మోయిజ్‌ పాషాలను అరెస్టు చేసి రిమాండ్‌కు తరలించారు.