SRH vs GT: కాటేరమ్మ కొడుకులపై ప్లేఆఫ్స్ ఒత్తిడి.. గుజరాత్ టైటాన్స్‌తో కీలక పోరుకు రెడీ..

Sunrisers Hyderabad vs Gujarat Titans: ప్లేఆఫ్ రేసును నిర్ణయించడంలో ఈ మ్యాచ్ అత్యంత కీలకం కానుంది. సీజన్ ప్రారంభంలో తడబడినప్పటికీ, వరుస విజయాలతో కోలుకున్న శుభ్‌మన్ గిల్ నేతృత్వంలోని గుజరాత్ టైటాన్స్ ప్రస్తుతం మెరుగైన స్థితిలో కనిపిస్తోంది. రాజస్థాన్ రాయల్స్‌పై 77 పరుగుల భారీ విజయం వారిని పాయింట్ల పట్టికలో మూడవ స్థానానికి చేర్చింది. ప్రస్తుతం టాప్-3 జట్లు (RCB, SRH, GT) చెరో 14 పాయింట్లతో సమానంగా ఉండటంతో, నెట్ రన్ రేట్ ప్లేఆఫ్ రేసులో నిర్ణయాత్మక అంశం కావచ్చు. అందుకే సన్‌రైజర్స్ తమ రన్ రేట్‌ను మెరుగుపరచుకోవాల్సిన అవసరం ఎంతైనా ఉంది.

జట్ల బలాబలాలు..

సన్‌రైజర్స్ హైదరాబాద్ (SRH):

పంజాబ్ కింగ్స్‌పై 235 పరుగుల భారీ స్కోరు సాధించి, 33 పరుగుల తేడాతో గెలిచిన హైదరాబాద్ సరైన సమయంలో ఫామ్‌లోకి వచ్చింది. అభిషేక్ శర్మ, ట్రావిస్ హెడ్, ఇషాన్ కిషన్, హెన్రిచ్ క్లాసెన్‌లతో కూడిన టాప్ ఆర్డర్ అత్యంత తుఫాన్ బ్యాటింగ్‌ను ప్రదర్శిస్తోంది. ఈ సీజన్‌లో ఇప్పటికే 8 సార్లు 200 పరుగుల మార్కును దాటిన SRH, ప్రత్యర్థులకు వణుకు పుట్టిస్తోంది. కెప్టెన్ పాట్ కమిన్స్ రాకతో బౌలింగ్ విభాగం మరింత బలోపేతమైంది. ముఖ్యంగా శ్రీలంక పేసర్ ఇషాన్ మలింగ 16 వికెట్లతో టాప్-5 వికెట్ టేకర్లలో ఒకరిగా నిలిచి అందరినీ ఆశ్చర్యపరుస్తున్నాడు.

గుజరాత్ టైటాన్స్ (GT):

గుజరాత్ జట్టు బలం వారి సమతుల్యత. శుభ్‌మన్ గిల్, సాయి సుదర్శన్ టాప్ ఆర్డర్‌లో స్థిరత్వాన్ని ఇస్తుండగా, జోస్ బట్లర్, వాషింగ్టన్ సుందర్ జట్టుకు లోతును జోడిస్తున్నారు. మహమ్మద్ సిరాజ్, కగిసో రబడాల వేగం.. రషీద్ ఖాన్ మాయాజాలంతో వారి బౌలింగ్ ఎటాక్ కూడా పటిష్టంగా ఉంది. ఆరంభంలో కంటే ప్రస్తుతం వారి బౌలర్లు క్రమశిక్షణతో కనిపిస్తున్నారు.

సవాళ్లు..

SRH: అతిగా దూకుడుగా ఆడే క్రమంలో త్వరగా వికెట్లు కోల్పోతే మిడిల్ ఆర్డర్ తడబడే అవకాశం ఉంది. ఫీల్డింగ్ కూడా మెరుగుపడాల్సి ఉంది.

GT: టాప్ ఆర్డర్ విఫలమైనప్పుడు కేవలం ఫినిషర్లపైనే ఆధారపడటం వారి బలహీనతగా మారింది. గతంలో భారీ ఓటములకు ఇదే కారణమైంది.

మంగళవారం జరగబోయే ఈ హై-వోల్టేజ్ మ్యాచ్‌లో గెలిచిన జట్టు ప్లేఆఫ్స్‌కు తమ మార్గాన్ని సుగమం చేసుకుంటుంది.

మరిన్ని క్రీడా వార్తల కోసం ఇక్కడ క్లిక్ చేయండి..