ముద్దు కోసం వచ్చిన ప్రియుడు అరెస్ట్!

ప్రియురాలు సవాలు విసిరింది. తాను చెప్పినట్లు చేస్తే ముద్దు ఇస్తానని ప్రియుడికి బంపర్ ఆఫర్ ఇచ్చింది. ఇంకేముంది ముద్దు కోసం ప్రియుడు సై అన్నాడు. అమ్మడు చెప్పినట్లు చేయడానికి సిద్దమై ఆశగా ముద్దు కోసం వస్తే అతడి అనుమానాస్పదమైన తీరు చూసి స్థానికులు పట్టుకుని పోలీసులకు అప్పగించారు. దీనితో అతగాడు ఒకటనుకుంటే మరొకటి జరగడంతో పోలీసుల విచారణలో పూర్తి విషయాలు వెల్లడించాడు.

అసలు వివరాల్లోకి వెళ్తే తమిళనాడు లోని పట్టాభిరామ్ తండురై గ్రామం పల్లవీధికి చెందిన శక్తివేల్ (22) ఆ గ్రామానికి చెందిన ఓ యువతితో ప్రేమలో పడ్డాడు. ఆమెను ప్రేమికుల రోజు సందర్భంగా ముద్దు ఇవ్వమని అడగగా అందుకు అంగీకరించలేదు. ముద్దు కావాలంటే బురఖా ధరించి నన్ను రాయపేట నుంచి మెరీనా బీచ్ కు తీసుకెళ్ళమని సవాల్ విసిరింది. దీనికి ఒప్పుకున్న అతడు బురఖా ధరించి ఆమె ఇంటికి వచ్చాడు… ఆ తర్వాత ఆమెతో మెరీనా బీచ్ కు వెళ్ళాడు. ఇంతవరకు బాగానే గడిచింది.. కానీ శక్తివేలు నడక తో పాటు, కాళ్ళకు మగవాళ్ల చెప్పులు ధరించడం చూసి.. అనుమానం వచ్చిన స్థానికులు అతనిని చితకబాది పోలీసులకు అప్పగించారు. పోలీసులు శక్తివేల్ ను అరెస్ట్ చేసి విచారణ చేస్తున్నారు.