తెల్ల ఆవాలు ఉంటాయని తెలుసా! వీటి ఆరోగ్య ప్రయోజనాలు తెలిస్తే షాకవడం ఖాయం!

మన వంటకాల్లో, ముఖ్యంగా పోపు దినుసుల్లో ఆవాలకు ప్రత్యేక స్థానం ఉంది. సాధారణంగా ఆవాలు అంటే నల్లగా ఉండే చిన్న గింజలే మనకు గుర్తొస్తాయి. కానీ, మార్కెట్‌లో నలుపుతో పాటు తెల్ల ఆవాలు కూడా ఉంటాయని చాలామందికి తెలియదు. ఇవి పూర్తిగా తెల్లగా కాకుండా, కాస్త క్రీమ్ రంగులో ఉంటాయి. నల్ల ఆవాల మాదిరిగానే తెల్ల ఆవాలలో కూడా అనేక పోషకాలు నిండి ఉన్నాయి. వీటిని ఆహారంలో భాగం చేసుకుంటే, కేవలం రుచిని పెంచడమే కాకుండా, అనేక రకాల వ్యాధులను నయం చేయడానికి కూడా సహాయపడతాయని ఆరోగ్య నిపుణులు సూచిస్తున్నారు.

తెల్ల ఆవాలు జీర్ణవ్యవస్థ పనితీరును మెరుగుపరచడంలో అద్భుతంగా పనిచేస్తాయి. తెల్ల ఆవాలను ఆహారంలో చేర్చుకుంటే, నోటిలో లాలాజలం, జీర్ణ రసాలు అధికంగా ఉత్పత్తి అవుతాయి. దీనివల్ల మనం తీసుకున్న ఆహారం, ముఖ్యంగా ప్రోటీన్లు, కొవ్వులు సులభంగా జీర్ణం అవుతాయి. ఆకలి లేనివారు వీటిని తింటే మంచి ఫలితం ఉంటుంది. జ్వరం లేదా ఏదైనా అనారోగ్యం నుంచి కోలుకున్న తర్వాత నోరు చేదుగా ఉండి ఆహారం తినాలనిపించకపోతే, తెల్ల ఆవాలు ఆ సమస్యను తగ్గిస్తాయి. అంతేకాక, వీటిలో ఫైబర్ అధికంగా ఉంటుంది. కాబట్టి, తెల్ల ఆవాలు జీర్ణ వ్యవస్థను ఆరోగ్యంగా ఉంచి, మలబద్ధకం సమస్యను దూరం చేస్తాయి.

తెల్ల ఆవాలు షుగర్ మరియు రక్తపోటు ఉన్నవారికి చాలా మేలు చేస్తాయి. తెల్ల ఆవాలలో మెగ్నీషియం అధికంగా ఉంటుంది. ఇది నాడీ మండలం పనితీరును మెరుగుపరుస్తుంది. ముఖ్యంగా, నిద్రలో కాలి పిక్కలు పట్టేయడం వంటి సమస్యలను తగ్గిస్తుంది. మెగ్నీషియం రక్తంలోని షుగర్ స్థాయిలను నియంత్రించడంలో సహాయపడుతుంది. అలాగే, వీటిని తరచుగా తీసుకోవడం వల్ల శరీరంలో రక్త సరఫరా మెరుగుపడుతుంది, తద్వారా అధిక రక్తపోటు సమస్య అదుపులో ఉంటుంది.

ఈ తెల్ల ఆవాలలో క్యాల్షియం కూడా అధిక మొత్తంలో ఉంటుంది, ఇది ఎముకలు, దంతాలను దృఢంగా, ఆరోగ్యంగా ఉంచుతుంది. అంతేకాక, తెల్ల ఆవాలలో యాంటీ ఇన్ఫ్లమేటరీ గుణాలు ఉంటాయి. వీటిని వాడటం వల్ల కండరాల నొప్పులు, కీళ్ల నొప్పులు మరియు వాపుల నుంచి ఉపశమనం లభిస్తుంది. ఆర్థరైటిస్ ఉన్నవారికి ఇది చాలా మంచిది. ఈ గింజల్లో యాంటీ మైక్రోబియల్, యాంటీ బ్యాక్టీరియల్ గుణాలు పుష్కలంగా ఉంటాయి.

ఇవి సహజసిద్ధమైన యాంటీబయాటిక్‌గా పనిచేసి, రోగ నిరోధక శక్తిని పెంచుతాయి, తద్వారా ఇన్ఫెక్షన్ల ప్రమాదాన్ని తగ్గిస్తాయి. తెల్ల ఆవాలను పొడి రూపంలో తయారుచేసి రోజువారీ ఆహారంలో కాస్త తీసుకుంటే, ఈ ఆరోగ్య ప్రయోజనాలను పొందవచ్చు.

NOTE: పైన పేర్కొన్న అంశాలు కేవలం అవగాహన కోసం మాత్రమే జారీ చేయబడినవి.. వీటిని మేం ధృవీకరించలేదు.. వీటిపై మీకు సందేహాలు ఉంటే వైద్యులను సంప్రదించండి.