Soybean Myths: పురుషులకు సోయా వరమా.. శాపమా? టెస్టోస్టెరాన్ Vs ఈస్ట్రోజెన్.. అసలు మర్మం ఇదే!
చాలా కాలంగా పురుషుల్లో సోయా పట్ల ఒక భయం ఉంది. సోయా తింటే శరీరంలో స్త్రీ హార్మోన్లు పెరిగి, పురుష హార్మోన్ అయిన టెస్టోస్టెరాన్ (Testosterone) తగ్గిపోతుందని, తద్వారా నపుంసకత్వము లేదా రొమ్ములు పెరగడం (Gynecomastia) వంటి సమస్యలు వస్తాయని ప్రచారం జరుగుతోంది. అయితే, ఈ విషయాలపై వైద్యులు ఏమంటున్నారో దీని గురించి వివరంగా తెలుసుకుందాం..
Updated on: Dec 22, 2025 | 8:05 PM
ప్రముఖ వైద్యులు డాక్టర్ శివకుమార్ సోషల్ మీడియా వేదికగా ఈ అపోహలను తొలగించారు. ఆయన వివరణ ప్రకారం సోయాలో ఐసోఫ్లేవోన్లు (Isoflavones) ఉంటాయి. ఇవి మొక్కల నుండి లభించే ఈస్ట్రోజెన్ (Phytoestrogens) లాంటి సమ్మేళనాలు. సోయాలోని ఫైటోఈస్ట్రోజెన్ ప్రభావం మానవ శరీరంలోని సహజ ఈస్ట్రోజెన్ కంటే చాలా తక్కువ. కాబట్టి ఇది పురుషుల హార్మోన్లపై తీవ్ర ప్రభావం చూపదు.
సరైన పరిమాణం ఎంత? వైద్యుల ప్రకారం, సోయాను సరైన మోతాదులో తీసుకుంటే ఎటువంటి ఇబ్బంది ఉండదు.
సిఫార్సు చేసిన మోతాదు: రోజుకు 20 నుండి 30 గ్రాముల సోయా ఆహారాలు తీసుకోవచ్చు.
ప్రోటీన్ లభ్యత: 100 గ్రాముల ఉడికించిన సోయా బీన్స్లో సుమారు 16-18 గ్రాముల ప్రోటీన్ ఉంటుంది. శాఖాహారులకు ఇది ఒక అద్భుతమైన ప్రోటీన్ వనరు.
సోయాలో ఉండే పోషకాలు: సోయా కేవలం ప్రోటీన్ మాత్రమే కాదు, శరీరానికి అవసరమైన అనేక ఇతర పోషకాలను కూడా అందిస్తుంది:
విటమిన్లు: విటమిన్ B, B1, B2, B6, K, E.
ఖనిజాలు: కాల్షియం అధికంగా ఉంటుంది, ఇది ఎముకల బలానికి ఎంతో మేలు చేస్తుంది.
గుండె ఆరోగ్యం: కొలెస్ట్రాల్ను నియంత్రించడంలో సహాయపడుతుంది.
అనవసరమైన హార్మోన్ల భయంతో సోయాను పూర్తిగా పక్కన పెట్టాల్సిన అవసరం లేదు. మోతాదు మించకుండా తీసుకున్నంత కాలం సోయా పురుషులకు కూడా అత్యుత్తమ ఆహారమే. మీరు ఒకవేళ బాడీబిల్డింగ్ లేదా ప్రత్యేక డైట్లో ఉంటే, మీ పోషకాహార నిపుణుడిని సంప్రదించి సరైన మోతాదును నిర్ణయించుకోవచ్చు.
గమనిక: ఈ సమాచారం కేవలం మీ అవగాహన కోసం వైద్య నిపుణుల సూచనల మేరకు అందించబడింది. మీకు ఏవైనా హార్మోన్ల సమస్యలు ఉంటే ఆహారంలో మార్పులు చేసే ముందు మీ వైద్యుడిని సంప్రదించడం ఉత్తమం.
