Ranya Rao: గోల్డ్ స్మగ్లింగ్ కేసులో నటి రన్యా రావుకు బిగ్ షాక్.. కోర్టు కీలక నిర్ణయంతో అప్పటిదాకా జైలులోనే..
బంగారం అక్రమ రవాణా కేసులో అరెస్టయిన కన్నడ ప్రముఖ నటి రన్యా రావుకు బిగ్ షాక్. ఆమె మరికొన్ని రోజుల పాటు పరప్పన అగ్రహారం జైలులోనే ఉండాల్సిందే. మార్చి 3న, కెంపెగౌడ అంతర్జాతీయ విమానాశ్రయంలో డీఆర్ఐ అధికారులు రన్యా రావును అదుపులోకి తీసుకున్నారు.
Updated on: Mar 27, 2025 | 5:23 PM
బంగారం అక్రమ రవాణా కేసులో నిందితురాలిగా ఉన్న నటి రన్యా రావు కు బిగ్ షాక్. ఆమె బెయిల్ పిటిషన్ ను న్యాయస్థానం కొట్టేసింది. కేసు తీవ్రత, నటికి ఉన్న పలుకుబడిని పరిగణనలోకి తీసుకుని,బెంగళూరులోని 64వ సీసీహెచ్‌ సెషన్స్‌ కోర్టు రన్యా రావు బెయిల్ దరఖాస్తును తోసిపుచ్చింది. దీంతో ఆమె మరికొన్ని రోజులు పరప్పన అగ్రహార జైలులో గడపవలసి ఉంటుంది. రన్యా రావు కేసులో అంతర్జాతీయ సంబంధాలు ఉన్నాయని, కస్టమ్స్ నిబంధనలను ఉల్లంఘించారని, రన్యారావుకు బెయిల్ లభిస్తే సాక్ష్యాలను నాశనం చేయడానికి, దర్యాప్తును అడ్డుకోవడానికి దారితీయవచ్చని కోర్టు పేర్కొంది. ‘రన్యారావు ఒక సంవత్సరంలో ఇరవై ఏడు సార్లు విదేశాలకు వెళ్లింది. ముప్పై ఎనిమిది శాతం కస్టమ్స్ సుంకం మోసానికి పాల్పడింది. మొత్తం రూ.4,83,72,694 పన్ను ఎగవేత జరిగింది. బెయిల్ మంజూరు చేస్తే ఆమె దేశం విడిచి వెళ్లిపోయే అవకాశం ఉంది. ఈ కేసులో ప్రభావవంతమైన వ్యక్తుల ప్రమేయం ఉందని, దర్యాప్తును పక్కదారి పట్టించే అవకాశం ఉంది’ అని పేర్కొంటూ బెయిల్ దరఖాస్తును తోసిపుచ్చింది న్యాయస్థానం.
అక్రమ బంగారం అక్రమ రవాణా కేసులో నటి రన్యా రావును మార్చి 3న బెంగళూరు అంతర్జాతీయ విమానాశ్రయంలో డీఆర్ఐ అధికారులు అరెస్టు చేశారు. ఆ తర్వాత జరిగిన దర్యాప్తులో అనేక షాకింగ్ నిజాలు బయటపడ్డాయి. నటి రన్యా రావు 14 కిలోల కంటే ఎక్కువ బరువున్న బంగారాన్ని అక్రమంగా తరలిస్తూ పట్టుబడింది. ప్రభుత్వ ఉన్నత అధికారులకు కల్పించిన ప్రత్యేకాధికారాలను వినియోగించుకుని నటి రన్యా రావు బంగారాన్ని అక్రమంగా రవాణా చేస్తున్నట్లు తరువాత వెల్లడైంది. రన్యా రావు వెనుక కొంతమంది మంత్రులు, ఎమ్మెల్యేలు ఉన్నారనే విషయం కూడా చర్చనీయాంశమవుతోంది. దీనిపై శాసనసభలో కూడా పెద్ద చర్చకు కారణమైంది. గత ప్రభుత్వం షిరా ఇండస్ట్రియల్ ఏరియాలో 12 ఎకరాల భూమిని రన్యా రావుకు కేటాయించిందని కూడా వెల్లడైంది. అంతేకాకుండా, నటి రణ్య తన వ్యక్తిగత విషయాలకు ప్రభుత్వ అధికారులను, ముఖ్యంగా పోలీసు వాహనాలను, సిబ్బందిని ఉపయోగించుకోవడంపై రాష్ట్రంలోనే కాకుండా దేశవ్యాప్తంగా సంచలనం సృష్టించింది.
రన్యా రావు బంగారు స్మగ్లింగ్ కేసులో, పోలీసులు తెలుగు సినీ నటుడు తరుణ్ కొండూర్‌ను కూడా అరెస్టు చేశారు. ఇదే కేసుకు సంబంధించి బుధవారం మరో వ్యక్తిని డీఆర్ఐ అధికారులు అరెస్టు చేశారు. బళ్లారికి చెందిన బంగారు వ్యాపారి సాహిల్ సకారియా జైన్ అరెస్టు అయ్యారు. ఆ వ్యక్తి రన్యా తెచ్చిన బంగారాన్ని కరిగించి అమ్మే పనిలో ఉన్నట్లు తెలుస్తోంది. సాహిల్ సకారియా జైన్ అనేక సందర్భాల్లో రన్యా బంగారాన్ని అక్రమంగా రవాణా చేయడానికి సహాయం చేసినట్లు తెలుస్తోంది.
మరిన్ని సినిమా వార్తల కోసం ఇక్కడ క్లిక్ చేయండి.
