Jabardasth Hari: ఎర్రచందనం స్మగ్లింగ్ కేసు.. పరారీలో జబర్దస్త్ కమెడియన్‌.. పోలీసుల గాలింపు
జబర్దస్త్ షో ద్వారా పాపులారిటీ దక్కించుకున్న కొందరు కమెడియన్స్ సినిమాల్లో కూడా వరుస అవకాశాలు దర్కించుకుని భవిష్యత్తుకు బాటలు వేసుకుంటున్నారు. ఐతే మరికొందరు కమెడియన్లు మాత్రం తెరవెనుక అక్రమాలకు పాల్పడుతూ వార్తల్లో నిలుస్తున్నారు..
జబర్దస్త్ కామెడీ షో తెలుగు రాష్ట్రాల్లో ఎంతగా పాపులర్‌ అయ్యిందో ప్రత్యేకంగా చెప్పనవసరం లేదు. ఈ కామెడీ షో ద్వారా ఎందరో కమెడియన్స్ ఇండస్ట్రీకి పరిచయమవుతున్నారు. పలువురు లేడీ గెటప్‌లతో ప్రేక్షకులను కడుపుబ్బ నవ్విస్తున్నారు. ఇప్పటికే ఈ షో ద్వారా పాపులారిటీ దక్కించుకున్న కొందరు కమెడియన్స్ సినిమాల్లో కూడా వరుస అవకాశాలు దర్కించుకుని భవిష్యత్తుకు బాటలు వేసుకుంటున్నారు. ఐతే మరికొందరు కమెడియన్లు మాత్రం తెరవెనుక అక్రమాలకు పాల్పడుతూ వార్తల్లో నిలుస్తున్నారు.
తాజాగా ఎర్ర చందనం స్మగ్లింగ్ కేసులో జబర్దస్త్ కమెడియన్‌ హరి అలియాస్ హరితపై కేసు నమోదు అయ్యింది. చంటి టీమ్‌లో లేడీ గెటప్‌లు వేసే హరిత తెర వెనుక గట్టుచప్పుడుకాకుండా ఎర్రచందనం స్మగ్లింగ్ చేస్తున్నట్లు పోలీసులు చెబుతున్నారు. తాజాగా చిత్తూరు జిల్లా పుంగనూరులో దాదాపు రూ.60 లక్షల విలువైన ఎర్రచందనం స్మగ్లింగ్ చేస్తూ కిషోర్ అనే వ్యక్తి పోలీసులకు పట్టుబడ్డాడు. దర్యాప్తులో అతను హరి పేరు చెప్పడంతో అసలు విషయం బయటపడింది. ఈ వ్యవహారంతో హరికి సంబంధం ఉందని, సరుకును తరలించే ప్లాన్ కూడా అతడిదేనని పోలీసులకు తెలిపాడు. ఈ ఆపరేషన్‌లో హరిని రెడ్ హ్యాండెడ్‌గా పట్టుకోవడానికి ట్రై చేసినప్పటికీ, తమ కళ్లుగప్పి అతను తప్పించుకొని పారిపోయినట్లు పోలీసుల తెలిపారు. దీంతో పోలీసులు హరిపై కేసు నమోదు చేశారు. పరారీలో ఉన్న హరి కోసం పోలీసులు గాలింపు చర్యలు చేపట్టారు.
Jabardasth Hari
కాగా స్మగ్లింగ్ కేసులో పట్టుబడటం హరికి ఇదేం తొలిసారి కాదు. గతంలో కూడా అతడిపై పలుమార్లు కేసులు నమోదయ్యాయని పోలీసులు చెబుతున్నారు. 2021 మే నెలలో ఎర్రచందనం స్మగ్లింగ్ వ్యవహారంలో 8 మంది స్మగ్లర్లను రెడ్ హ్యాండెడ్‌గా పట్టుకున్నారు. ఐతే జబర్దస్త్ హరి అక్కడి నుంచి పరారయ్యాడు. హరికి చాలా మంది స్మగ్లర్లతో సంబంధాలున్నట్లు పోలీసులు అనుమానిస్తున్నారు.
మరిన్ని సినిమా కథనాల కోసం క్లిక్‌ చేయండి.
