గ్లోబల్ వేదికలపై అదరహో అనిపించిన బాలీవుడ్ స్టార్.. బాఫ్టా 2026లో మెరిసిన భారతీయ తార!

ప్యారిస్ ఫ్యాషన్ వీక్ నుండి మొన్నటి బాఫ్టా (BAFTA) అవార్డుల వరకు ఆమె వేసిన ప్రతి అడుగు ఒక కొత్త ట్రెండ్‌కు నాంది పలికింది. కేవలం ఒక నటిగానే కాకుండా, భారతీయ సంస్కృతికి ప్రతినిధిగా ఆమె గ్లోబల్ వేదికలపై ఎలా మెరిసిందో చూద్దాం. ఆమె ఒకప్పుడు కేవలం ప్రామిసింగ్ యాక్టర్.. కానీ ఇప్పుడు అంతర్జాతీయ ఫ్యాషన్ రంగానికి గ్లోబల్ అంబాసిడర్. ఆమె ఎంచుకునే దుస్తులు కేవలం ఒక ఫ్యాషన్ స్టేట్‌మెంట్ మాత్రమే కాదు, అవి ఒక సాంస్కృతిక ప్రయాణం. ప్యారిస్ రన్‌వేపై ధీమాగా నడిచినా, లండన్ వేదికపై ప్రజెంటర్‌గా మెరిసినా.. ఆమెను చూస్తే ‘రాజీ’ పడటం అసాధ్యం. అంతర్జాతీయ స్థాయిలో సేఫ్ గేమ్ ఆడకుండా, ఫ్యాషన్ హైవేపై దూసుకుపోతున్న ఆ క్రేజీ హీరోయిన్ మరెవరో కాదు.. అలియా భట్.

Alia Bhatt At Bafta1

మెట్ గాలా 2024..

2024 మెట్ గాలా వేదికపై అలియా భట్ వేసిన ముద్ర ఎప్పటికీ గుర్తుండిపోతుంది. ‘ది గార్డెన్ ఆఫ్ టైమ్’ అనే థీమ్ కోసం ఆమె ఎంచుకున్న సబ్యసాచి ముఖర్జీ డిజైన్ చేసిన చీర ఒక అద్భుతం. 23 అడుగుల పొడవైన ట్రైన్, చేతితో చేసిన ఎంబ్రాయిడరీ, విలువైన రాళ్లతో కూడిన ఆ చీరలో అలియా ఒక దేవతలా మెరిసిపోయింది. వెస్ట్రన్ గౌన్ల మధ్య భారతీయ చీర గొప్పతనాన్ని ప్రపంచానికి చాటిచెప్పిన క్షణం అది.

కాన్స్ 2025, బాఫ్టా 2026

కాన్స్ ఫిల్మ్ ఫెస్టివల్ 2025లో గుక్కీ గ్లోబల్ అంబాసిడర్ గా అలియా ఒక చారిత్రక ఘట్టాన్ని సృష్టించింది. గుక్కీ రూపొందించిన మొట్టమొదటి చీరగా చెప్పబడే ఆ వినూత్న దుస్తుల్లో ఆమె హుందాతనాన్ని, ఆధునికతను సమానంగా ప్రదర్శించింది. ఇక తాజాగా బాఫ్టా 2026 అవార్డుల వేదికపై సిల్వర్ సీక్విన్ గౌన్, వైట్ షీర్లింగ్ వ్రాప్ తో పాత హాలీవుడ్ గ్లామర్ ను గుర్తుకు తెచ్చింది. మెరిలిన్ మన్రో లాంటి దిగ్గజాల శైలిని పుణికిపుచ్చుకుంటూనే తనదైన ముద్ర వేసింది.

విజయం వెనుక ఉన్న ‘డ్రీమ్ టీమ్’

అలియా లుక్స్ ప్రతిసారీ హిట్ అవ్వడానికి కారణం ఆమె వెనుక ఉన్న నిపుణుల బృందం. అనైతా ష్రాఫ్ అడజానియా, రియా కపూర్, ప్రియాంక కపాడియా వంటి స్టైలిస్టులు ఆమె రూపాన్ని అద్భుతంగా తీర్చిదిద్దారు. మేకప్ విషయంలో అతిగా వెళ్లకుండా, సహజమైన మెరుపును హైలైట్ చేయడం అలియా ప్రత్యేకత. దుస్తులు ఎంత భారీగా ఉన్నా, ఆమె ముఖం ప్రశాంతంగా, కాన్ఫిడెంట్ గా కనిపిస్తుంది.

అలియా భట్ కేవలం ఒక సినిమా తారగానే కాదు, గ్లోబల్ ఫ్యాషన్ ఐకాన్ గా భారత్ గర్వపడేలా చేస్తోంది. ప్రయోగాలు చేస్తూనే మన మూలాలను మర్చిపోకుండా ఉండటం ఆమె నుండి నేర్చుకోవాల్సిన విషయం. భవిష్యత్తులో ఆమె మరిన్ని ప్రయోగాత్మక వేషధారణలతో మనల్ని ఆశ్చర్యపరుస్తుందని ఫ్యాషన్ ప్రియులు ఆశిస్తున్నారు.