KKR vs PBKS: మాజీ జట్టుతో పోరుకు తొడగొట్టిన శ్రేయాస్.. అదే జరిగితే కేకేఆర్‌కు కన్నీళ్లే..?

KKR vs Punjab Kings: ఈ సీజన్‌లో పంజాబ్ కింగ్స్ అజేయంగా దూసుకుపోతోంది. ఆడిన రెండు మ్యాచ్‌ల్లోనూ ఘనవిజయాలు సాధించి పాయింట్ల పట్టికలో జోరు మీదుంది. మరోవైపు, సొంత గడ్డపై ఆడుతున్న కేకేఆర్ పరిస్థితి దీనికి భిన్నంగా ఉంది. ఇప్పటివరకు ఆడిన రెండు మ్యాచ్‌ల్లోనూ ఓటమి పాలైన కోల్‌కతా, ఈ మ్యాచ్‌తో ఎలాగైనా గెలుపు ఖాతా తెరవాలని పట్టుదలతో ఉంది. గత సీజన్‌లో కేకేఆర్‌ను కేవలం 111 పరుగులకే కట్టడి చేసి ఓడించిన చరిత్ర పంజాబ్ సొంతం కావడంతో, ఈ పోరుపై అభిమానుల్లో భారీ అంచనాలు ఉన్నాయి.

ఈ ఆటగాళ్లపైనే ఫోకస్..

శ్రేయస్ అయ్యర్: పంజాబ్ కింగ్స్ తరపున ఆడుతున్న అయ్యర్, గత 11 ఇన్నింగ్స్‌ల్లో 7 అర్ధసెంచరీలతో భీభత్సమైన ఫామ్‌లో ఉన్నారు.

ఫిన్ అలెన్: కేకేఆర్ ఓపెనర్ ఫిన్ అలెన్ పవర్‌ప్లేలో 270.83 స్ట్రైక్ రేట్‌తో ప్రత్యర్థి బౌలర్లపై విరుచుకుపడుతున్నారు. ముఖ్యంగా అర్ష్‌దీప్ సింగ్, మార్కో జాన్సెన్ వంటి బౌలర్లను ఎదుర్కోవడంలో ఆయనది పైచేయిగా ఉంది.

యుజ్వేంద్ర చాహల్: కేకేఆర్‌పై అత్యధిక వికెట్లు (33) తీసిన రికార్డు చాహల్ పేరిట ఉంది. గత మ్యాచ్‌లో నాలుగు వికెట్లతో చెలరేగిన ఆయన, కేకేఆర్ బ్యాటర్లకు మరోసారి సవాలు విసరనున్నారు.

కేకేఆర్ బలహీనతలే పంజాబ్‌కు బలం..

గణాంకాల ప్రకారం కేకేఆర్ జట్టు ఎడమచేతి వాటం పేసర్లు, స్పిన్నర్ల బౌలింగ్‌లో తడబడుతోంది. అర్ష్‌దీప్ సింగ్ ఇప్పటికే అజింక్యా రహానేను ఇబ్బంది పెడుతుండగా, హర్‌ప్రీత్ బ్రార్ వంటి స్పిన్నర్లను జట్టులోకి తీసుకుంటే కేకేఆర్ మధ్య వరుసను దెబ్బతీయడం పంజాబ్‌కు సులభం కానుంది. మరోవైపు, కేకేఆర్ బౌలింగ్ విభాగం 11.33 ఎకానమీతో ఈ సీజన్‌లో అత్యంత ఖరీదైనదిగా ఉంది.

వ్యూహాత్మక మార్పులు జరిగేనా?

కేకేఆర్ తమ ఫినిషింగ్ బాధ్యతలను రింకూ సింగ్‌కు అప్పగించేందుకు వీలుగా, ఐదో స్థానంలో తేజస్వి దహియాను ఆడించే అవకాశం ఉంది. అటు పంజాబ్ కూడా కేకేఆర్ స్పిన్ బలహీనతను క్యాష్ చేసుకునేందుకు హర్‌ప్రీత్ బ్రార్‌ను తుది జట్టులోకి తీసుకురావచ్చు. మొత్తం మీద, పంజాబ్ హ్యాట్రిక్ విజయం సాధిస్తుందా లేక కేకేఆర్ అద్భుతం చేసి పుంజుకుంటుందా అనేది ఆసక్తికరం.