ఆన్‌లైన్ లోన్ యాప్స్ కేసుల విచారణలో దిమ్మతిరిగే నిజాలు.. ఆ కూలీ ఖాతాలో అక్షరాలా కోటి రూపాయలు

ఆన్‌లైన్ లోన్ యాప్స్ వ్యవహారం తెలుగు రాష్ట్రాలలో ప్రకంపనలు రేపిన విషయం తెలిసిందే. ఈ సంస్థల నిర్వాహకుల వేధింపులతో పలువురు ప్రాణాలు విడిచారు.

Ram Naramaneni |
Updated on: Feb 15, 2021 | 1:57 PM

ఆన్‌లైన్ లోన్ యాప్స్ వ్యవహారం తెలుగు రాష్ట్రాలలో ప్రకంపనలు రేపిన విషయం తెలిసిందే. ఈ సంస్థల నిర్వాహకుల వేధింపులతో పలువురు ప్రాణాలు విడిచారు. వ్యవహారం పోలీస్ స్టేషన్లతో పాటు కోర్టుకు కూడా వెళ్లింది. ఈ లోన్‌ యాప్స్ సంస్థలపై కఠిన చర్యలు తీసుకోవాలని పోలీసులకు సూచించింది. యాప్‌లను బ్లాక్ చేసేందుకు ప్లే స్టోర్‌లను సంప్రదించాలని పేర్కొంది. దీంతో ఈ కేసులను సీరియస్‌గా తీసుకున్న పోలీసులు..ఆన్‌లైన్ లోన్ ఆప్ నిర్వాహకులపై కొరడా ఝులిపించారు. లోతైన విచారణలో విస్మయపరిచే విషయాలను కనుగొన్నారు.

బ్యాంక్ అకౌంట్ల నుంచి లావాదేవీలు జరుపుకునేందుకు ఎవరికీ అనుమానం లేకుండా ఓ ఖాతాదారుడితో ఒప్పందం కుదుర్చుకున్నారు కేటుగాళ్లు. ఢిల్లీకి చెందిన ఒక రోజు వారి కూలి ఖాతాలో కోటి రూపాయలు నగదును డిపాజిట్ చేశారు. అతడికి నెలకు రూ.4 వేలు చెల్లిస్తామని ఒప్పందం కుదుర్చుకున్నారు. అయితే తన ఖాతాలో కోటి రూపాయలు ఉన్న విషయం సదరు కూలీకి తెలియదు. తమ అకౌంట్ల నుంచి కాకుండా ఇండియన్ బ్యాంక్ ఖాతాల నుంచి లావాదేవీలు జరుపేందుకు చైనీస్ సంస్థలు అడ్డదారులు తొక్కాయి. ఇప్పటి వరకు దాదాపు 25వేల కోట్ల లావాదేవీలు జరిగినట్టు సమాచారం అందుతుంది. ఆన్‌లైన్ లోన్ యాప్‌తో పాటు ఆన్‌లైన్ గాంబ్లింగ్ రాకెట్‌లో సదరు సంస్థలు రూ. 5 కోట్ల లావాదేవీలు జరిపాయి. లావాదేవీలకు సంబంధించిన పేమెంట్ గేట్ వేల పాత్రపై పోలీసులు ఆరా తీస్తున్నారు.