UPI Payments: ఇంటర్నెట్ లేకుండానే యూపీఐ చెల్లింపులు.. ఈ టిప్స్‌తో సాధ్యమంతే..!
భారతదేశంలో 2016లో నోట్ల రద్దు తర్వాత యూపీఐ చెల్లింపులు గణనీయంగా పెరిగాయి. భౌతిక నగదు లేకుండా చెల్లింపులను సులభతరం చేసేలా ఎన్‌పీసీఐ యూపీఐ చెల్లింపులను లాంచ్ చేసింది. చిల్లర సమస్యకు యూపీఐ చెల్లింపులు చెక్ పెట్టాయి. అయితే యూపీఐ చెల్లింపులు చేయాలంటే కచ్చింగా ఇంటర్నెట్ కావాలి అనే విషయం అందరికీ తెలిసిందే. అయితే ఇంటర్నెట్ అవసరం లేకుండా యూపీఐ చెల్లింపులను ఎలా చేయాలో? ఓ సారి తెలుసుకుందాం.
Srinu |
Updated on: Jan 13, 2025 | 10:45 AM
ప్రస్తుతం డిజిటల్ యుగంలో యూపీఐ మన రోజువారీ జీవితంలో అంతర్భాగంగా మారింది. రెస్టారెంట్‌లో షాపింగ్ చేయడానికి లేదా భోజనానికి చెల్లించాలన్నా మనలో చాలా మంది ఆన్‌లైన్ చెల్లింపులపై ఎక్కువగా ఆధారపడుతున్నారు. అయితే ఈ లావాదేవీలు ఇంటర్నెట్ కనెక్టివిటీపై ఆధారపడి ఉంటాయి. అయితే ఒక్కోసారి ఇంటర్నెట్ సరిగ్గా పని చేయకపోతే మన యూపీఐ చెల్లింపులకు అంతరాయం కలిగిస్తుంది. అయితే ఇంటర్నెట్ లేకుండాన యూపీఐ చెల్లింపులను చేయవచ్చని చాలా మందికి తెలియదు. నేషనల్ పేమెంట్స్ కార్పొరేషన్ ఆఫ్ ఇండియా (ఎన్‌పీసీఐ) ఇంటర్నెట్ సదుపాయం లేకుండా యూపీఐ చెల్లింపులను అనుమతించే కొత్త సేవను ప్రవేశపెట్టింది.
యాక్టివ్ ఇంటర్నెట్ లేకపోయినా యూపీఐ సేవలను అధికారిక యూఎస్ఎస్‌డీ సర్వీస్‌ను ఉపయోగించి యూపీఐ సేవలను పొందవచ్చు. *99# డయల్ చేయడం ద్వారా బ్యాంకింగ్ సేవలను ఆఫ్‌లైన్‌లో యాక్సెస్ చేయడానికి వినియోగదారులను అనుమతి ఉంటుంది. ఈ నంబర్ ద్వారా వినియోగదారులు ఇంటర్‌బ్యాంక్ ఫండ్ బదిలీలు, ఖాతా నిల్వలను తనిఖీ చేయడం, యూపీఐ పిన్‌లను సెట్ చేయడం లేదా మార్చడం వంటి వివిధ బ్యాంకింగ్ సౌకర్యాలను యాక్సెస్ చేయవచ్చు.
యూఎస్ఎస్‌డీ కోడ్ ద్వారా చెల్లింపులు ఇలా
- మీ బ్యాంక్‌లో రిజిస్టర్ చేసిన మొబైల్ నంబర్ నుంచి *99# డయల్ చేయాలి.
- మీ ఫోన్ స్క్రీన్‌పై సంబంధిత నంబర్‌ని ఎంచుకోవడం ద్వారా మీకు నచ్చిన భాషను ఎంచుకోవాలి.
- డబ్బు బదిలీ చేయడం, బ్యాలెన్స్‌లను తనిఖీ చేయడం లేదా లావాదేవీలను చూడటం వంటి కావాల్సిన బ్యాంకింగ్ సౌకర్యాన్ని ఎంచుకోవాలి.
- డబ్బును బదిలీ చేయడానికి, ‘1’ అని టైప్ చేసి, సెండ్ నొక్కాలి.
- డబ్బు పంపడానికి మొబైల్ నంబర్, యూపీఐ ఐడీ, సేవ్ చేసిన కాంటాక్ట్ లేదా మరొక ఎంపిక వంటి పద్ధతిని ఎంచుకుని, సెండ్ ఎంచుకోవాలి.
- మొబైల్ నంబర్ ఎంపికను ఉపయోగిస్తుంటే గ్రహీత నంబర్‌ను నమోదు చేసి సెండ్ ఆప్షన్ ఎంచుకోవాలి.
- అనంతరం చెల్లింపు మొత్తాన్ని నమోదు చేసి, అవసరమైతే రిమార్క్‌ను ఎంటర్ చేసి సెండ్ ఆప్షన్ ఎంచుకోవాలి.
- అనంతరం లావాదేవీని పూర్తి చేయడానికి మీ యూపీఐ పిన్‌ని నమోదు చేస్తే చెల్లింపు విజయవంతమవుతుంది.
మరిన్ని బిజినెస్ వార్తల కోసం ఇక్కడ క్లిక్ చేయండి
