పాత వైరస్..కొత్త టెన్షన్..మళ్లీ అదే సీన్ కనిపిస్తుందా?

ఎవరూ ఆందోళన చెందాల్సిన అవసరం లేదని కేంద్రమంత్రి జేపీ నడ్డా ఓ వీడియో రిలీజ్ చేశారు. ఇది సాధారణ వైరస్ అని తేల్చి చెప్పారు. కానీ…ఎక్కడో ఓ మూల భయం మాత్రం పోవడం లేదు. ఏం జరుగుతుందో అని గుబులు అందరిలోనూ కనిపిస్తోంది. అందుకే..రాష్ట్రాలూ అప్రమత్తమయ్యాయి. కొన్ని గైడ్‌లైన్స్ జారీ చేశాయి.

రాష్ట్రాల వారీగా చూస్తే..ముందుగా కర్ణాటకలో తొలి HMPV కేసు నమోదైంది. ఆ తరవాత వెంటనే మరో కేసు వెలుగులోకి వచ్చింది. ఫలితంగా..ప్రభుత్వం అలెర్ట్ అయింది. కీలక మార్గదర్శకాలు ఇచ్చింది. ఇకపై ఎవరు బయటకు వచ్చినా కచ్చితంగా మాస్క్ పెట్టుకోవాలని సూచించింది. దీంతో పాటు తీసుకోవాల్సిన జాగ్రత్తలనూ వెల్లడించింది. చేతులు పరిశుభ్రంగా ఉంచుకోవడం, భౌతిక దూరం పాటించడం లాంటి జాగ్రత్తలతో వైరస్‌ని కట్టడి చేయొచ్చని తెలిపింది. ఇదే సమయంలో కర్ణాటకలోని స్కూల్స్‌ కూడా అలెర్ట్ అయ్యాయి. జలుబు, జ్వరం లాంటి లక్షణాలు కనిపిస్తే పిల్లల్ని స్కూల్‌కి పంపొద్దని తల్లిదండ్రులకు యాజమాన్యాలు మెసేజ్‌లు పంపుతున్నాయి. స్కూల్‌లో ఎవరైనా అనారోగ్యంగా కనిపించినా వెంటనే పేరెంట్స్‌కి ఇన్‌ఫామ్ చేస్తున్నాయి.