Pawan Kalyan: పవన్ వారాహి యాత్రకు పోలీసుల అనుమతి.. సెక్షన్ 30 యాక్ట్ అమలుపై సస్పెన్స్‌
జనసేన అధ్యక్షులు పవన్ కల్యాణ్ వారాహి యాత్రకు పోలీసుల నుంచి పర్మిషన్‌ లభించింది. తొలి విడతలో అన్నవరం నుంచి భీమవరం వరకు యాత్ర జరగనుంది. బుధవారం (జూన్‌ 14) అన్నవరం దేవస్థానం నుంచి వారాహి యాత్ర మొదలై.. భీమవరం వరకు తొలి విడత సాగనుంది.
Updated on: Jun 13, 2023 | 12:50 PM
జనసేన అధ్యక్షులు పవన్ కల్యాణ్ వారాహి యాత్రకు పోలీసుల నుంచి పర్మిషన్‌ లభించింది. తొలి విడతలో అన్నవరం నుంచి భీమవరం వరకు యాత్ర జరగనుంది. బుధవారం (జూన్‌ 14) అన్నవరం దేవస్థానం నుంచి వారాహి యాత్ర మొదలై.. భీమవరం వరకు తొలి విడత సాగనుంది. ప్రత్తిపాడు, పిఠాపురం, కాకినాడ రూరల్, ముమ్మిడివరం, రాజోలు, పి.గన్నవరం, నరసాపురం నియోజకవర్గాల్లో యాత్రకు జనసేన నేతలు ఏర్పాట్లు చేస్తున్నారు. అనంతరం ఈ నెల 21న అమలాపురంలో భారీ బహిరంగ సభ నిర్వహించాలని ప్లాన్ చేశారు. ఇప్పటికే ప్రతి నియోజకవర్గంలో జనసేన నేతలు పోస్టర్లు కూడా ఆవిష్కరించారు. పోలీసుల పర్మిషన్‌ ఇచ్చినా అంబేద్కర్‌ కోనసీమ జిల్లాలో నెలాఖరు వరకు అమలాపురం, కొత్తపేట డివిజన్‌లో సెక్షన్ 30 యాక్ట్ అమలు చేయనున్నారు. ముందస్తు అనుమతులు లేకుండా ఎలాంటి సభలు, సమావేశాలు, ఊరేగింపులు చేయకూడదంటూ పోలీసులు ఆదేశించారు. మరోవైపు పవన్ కల్యాణ్ వారాహి యాత్రను అడ్డుకోవడం కోసమే ఈ ఆంక్షలు అంటూ అమలాపురం జనసేన నేతలు మండిపడుతున్నారు. ఎన్ని అడ్డంకులు సృష్టించినా కోనసీమలో వారాహి యాత్ర, అమలాపురం భారీ బహిరంగ సభ నిర్వహించి తీరుతామంటున్నారు.
జనసేన అధినేత పవన్ కల్యాణ్ వారాహి యాత్రకు ప్రభుత్వం భయపడుతోందన్నారు ఉమ్మడి తూర్పుగోదావరి జిల్లా జనసేన అధ్యక్షుడు కందుల దుర్గేష్. సెక్షన్ 30 ఎందుకు తీసుకొచ్చారో చెప్పాలన్నారు. వారాహి యాత్రను ఆపడానికి ప్రయత్నిస్తే పెద్ద ఉద్యమం అవుతుందని హెచ్చరిస్తున్నారు జనసేన నేతలు. కోనసీమ జిల్లాలో సెక్షన్ 30 యాక్ట్ అమలుతో వారాహి యాత్రపై సస్పెన్స్‌ కొనసాగుతోంది.
మరిన్ని ఆంధ్రప్రదేశ్ వార్తల కోసం క్లిక్ చేయండి..
