అదుపులోకి వచ్చిన గ్యాస్ లీకేజ్…ఫ్యాక్ట‌రీపై కేసు న‌మోదు

ఇప్ప‌టికే ఎన్డీఆర్ఎఫ్ బృందాలు రంగాలు దిగి ప‌రిస్థితిని కంట్రోల్ చేశాయి.. గ్యాస్ లీకేజీ జరిగిన ఆర్ఆర్ వెంకటాపురం గ్రామానికి చేరుకున్న బృందాలు వెంటనే సహాయక చర్యలు చేపట్టాయి. విషవాయువు పీల్చి ఎందరు ఇళ్లల్లో ఉండిపోయారు, వారి పరిస్థితి ఎలా ఉంది వంటి విషయాలను బృందాలు ఆరాతీస్తున్నాయి. తలుపులు పగులగొట్టి మరీ ఇళ్లల్లో తనిఖీలు నిర్వహిస్తున్నారు. బాధితుల సంఖ్య భారీగా ఉంటుందన్న ఆందోళన వ్యక్తమ‌వుతోంది.

ఇక‌, జ‌రిగిన ఘ‌ట‌న‌పై ఘటనపై రాష్ట్ర హోం శాఖ మంత్రి మేకతోటి సుచరిత తీవ్ర దిగ్భ్రాంతి వ్యక్తం చేశారు. సంఘటన సమాచారం అందిన వెంటనే గుంటూరు లో వున్న హోమ్ మంత్రి సుచరిత విశాఖపట్నం కలెక్టర్, మంత్రులతో మాట్లాడి వివరాలు తెలుసుకున్నారు. ప్రమాద కారణాలపై డీజీపీ గౌతమ్ సవాంగ్, డిజాస్టర్ డీజీ అనురాధలతో మాట్లాడారు.సహాయక చర్యలను, పరిస్థితిని ఎప్పటికప్పుడు సమీక్షించాలని అధికారులను ఆదేశించారు. ఆసుపత్రిలో చికిత్స పొందుతున్న బాధితులకు మెరుగైన వైద్యం అందించాలని సూచించారు. ఘటనలో మృతిచెందిన కుటుంబాలకు ప్రగాఢ సానుభూతి తెలిపారు. ఫ్యాక్ట‌రీ యాజ‌మాన్యం నిర్ల‌క్ష్యం కార‌ణంగానే ప్ర‌మాదం జ‌రిగింద‌ని ప్రాథ‌మికంగా నిర్ధారించిన పోలీసులుకేసు న‌మోదు చేశారు.