UK: మరీ ఇంత దారుణమా.. ఎవరిపై అత్యాచారం చేయాలో లిస్ట్ రాసుకుని మరీ..
నేటి సమాజంలో మహిళలపై అత్యాచారాలు, దాడులు పెరిగిపోతూనే ఉన్నాయి. చిన్నా పెద్దా అనే తేడా లేకుండా ఒంటరిగా ఉన్న సమయాల్లో, పని ప్రదేశాల్లో వేధింపులు అధికమయ్యాయి. బ్రిటన్ లోనూ ఈ తరహా..
Updated on: Oct 30, 2022 | 9:49 AM
నేటి సమాజంలో మహిళలపై అత్యాచారాలు, దాడులు పెరిగిపోతూనే ఉన్నాయి. చిన్నా పెద్దా అనే తేడా లేకుండా ఒంటరిగా ఉన్న సమయాల్లో, పని ప్రదేశాల్లో వేధింపులు అధికమయ్యాయి. బ్రిటన్ లోనూ ఈ తరహా వేధింపులు ప్రస్తుతం వెలుగులోకి రావడం పెను సంచలనంగా మారింది. మహిళలపై వారు చేసే వేధింపులు ఎలా ఉండేవంటే.. ఎవరిపై ఎప్పుడు అత్యాచారం చేయాలో ఓ లిస్ట్ రాసుకుని మరీ దాడులకు పాల్పడేంతగా. బ్రిటన్ రాయల్ నేవీకి చెందిన జలాంతర్గామిల్లో మహిళా సిబ్బందిపై లైంగిక వేధింపుల ఆరోపణలు బయటపడటం కలకలం రేపింది. దీనిని తీవ్రంగా స్పందించిన ఉన్నతాధికారులు.. బ్రిటన్ నేవల్ స్టాఫ్ చీఫ్ బెన్ కీ ఈ వ్యవహారంపై విచారణకు ఆదేశించారు. రాయల్ నేవీలో లైంగిక వేధింపులకు చోటే లేదని, ఇటువంటి వాటిని సహించేది లేదని స్పష్టం చేశారు. దోషులుగా తేలిన వారెవరైనా సరే ర్యాంకుతో సంబంధం లేకుండా కఠిన చర్యలు తీసుకుంటామని హెచ్చరించారు. అయితే.. 2011 నుంచి బ్రిటన్ రాయల్ నేవీ తన సబ్ మెరైన్ సేవల్లో మహిళా సిబ్బందిని నియమిస్తోంది.
ఈ క్రమంలోనే సోఫీ బ్రూక్ అనే మహిళ కూడా విధుల్లో చేరారు. కొన్నేళ్లకు ఆమెకు కమాండర్గా బాధ్యతలు స్వీకరించాలంటూ ఆదేశాలు వచ్చాయి. అయితే అక్కడ ఆమెపై జరిగిన లైంగిక వేధింపులను భరించలేక సూసైడ్ అటెంప్ట్ చేసుకున్నారు. దీన్ని తీవ్రంగా తీసుకున్న నేవీ ఆమెను విధుల్లోంచి తొలగించింది. ఈ క్రమంలో ఆమె జలాంతర్గామిలో మహిళలపై జరుగుతున్న వేధింపుల గురించి పలు కీలక విషయాలు వెల్లడించారు. విధుల సమయంలో కొంతమంది లైంగికంగా వేధించేవారని, నిద్రపోయే సమయంలో శరీరాన్ని తాకుతూ అసభ్యంగా ప్రవర్తించేవారని చెప్పారు.
అత్యాచారం చేయాల్సిన మహిళా సిబ్బంది జాబితానూ రూపొందించుకున్నారని, అందులో తన పేరు ఆరో స్థానంలో ఉండటం చూసి షాక్కు గురైనట్లు ఆవేదన వ్యక్తం చేశారు. అందుకే వారి నుంచి తప్పించుకోవాలని, తనకు తాను గాయపరుచుకుని బయటకు వచ్చినా తనపై నిరంతర నిఘా ఉంచినట్లు ఆమె చెప్పడం గమనార్హం.
మరిన్ని అంతర్జాతీయ వార్తల కోసం చూడండి..
