వరుణ్ తేజ్

మెగా ఫ్యామిలీ నుంచి హీరోగా సినీ పరిశ్రమలోకి అడుగుపెట్టాడు వరుణ్ తేజ్. మెగాస్టార్ చిరంజీవి సోదరుడు నాగబాబు, పద్మజల ఏకైక కుమారుడు. 1991 జనవరి 19న హైదరాబాద్‏లో జన్మించాడు. చిన్నవయుసులోనే తన తండ్రి నటించిన హ్యాండ్స్ అప్ చిత్రంలో బాలనటుడిగా కనిపించాడు వరుణ్. ఆ తర్వాత 2014లో ముకుంద సినిమాతో హీరోగా వెండితెరకు పరిచయమయ్యాడు. ఈ సినిమా బాక్సాఫీస్ వద్ద ఆశించిన స్థాయిలో ఆకట్టుకోలేకపోయింది. కానీ ఆ తర్వాత 2015లో విడుదలైన ‘కంచె’ సినిమా వరుణ్ తేజ్‏కు భారీ విజయాన్ని అందించింది. అంతేకాదు..ఇందులో తన నటనకు విమర్శకుల ప్రశంసలు అందుకున్నాడు. ఆ వెంటనే శేఖర్ కమ్ముల తెరకెక్కించిన ‘ఫిదా’ సినిమాతో మరో హిట్ వరుణ్ ఖాతాలో చేరింది. దీంతో ఇటు తెలుగు రాష్ట్రాల్లో వరుణ్ తేజ్‏కు మరింత క్రేజ్ పెరిగింది. ఫిదా తర్వాత సినిమాల ఎంపికలో జాగ్రత్తలు తీసుకుంటూ అచి తూచి అడుగులు వేస్తున్నాడు వరుణ్. అలాగే గద్దలకొండ గణేష్ సినిమాతో మాస్ హీరోగా.. ఎఫ్ 2, ఎఫ్ 3 చిత్రాలతో తన కామెడీ టైమింగ్‏తో అలరించాడు.

గతేడాది హీరోయిన్ లావణ్య త్రిపాఠితో ఏడుగులు వేశాడు వరుణ్ తేజ్. 2017లో వచ్చిన మిస్టర్ సినిమాలో లావణ్య, వరుణ్ కలిసి నటించారు. ఆ సినిమా చిత్రీకరణ సమయంలో వీరిద్దరి మధ్య ఏర్పడిన పరిచయం ప్రేమగా మారింది. దాదాపు ఆరేళ్లు తమ ప్రేమ విషయాన్ని బయటకు రానివ్వకుండా చూసుకున్నారు. అయితే 2023 జూన్‏లో వీరిద్దరి నిశ్చితార్థం జరగడంతో వరుణ్, లావణ్య ప్రేమ విషయం బయటకు వచ్చింది. అదే ఏడాది నవంబర్ 1న వీరిద్దరి వివాహం ఇరు కుటుంబసభ్యుల సమక్షంలో ఇటలీలో గ్రాండ్‏గా జరిగింది.