Telangana: మహిళా సంఘాలకు తెలంగాణ సర్కార్ గుడ్ న్యూస్.. ఇది కదా కావాల్సింది..
మహిళా సంఘాలను ఆర్థికంగా బలోపేతం చేసేందుకు తెలంగాణ ప్రభుత్వం సరికొత్త కార్యక్రమానికి శ్రీకారం చుడుతోంది. మహిళా స్వయం సహాయక సంఘాల ద్వారా బస్సులు కొనుగోలు చేయించి.. వాటిని ఆర్టీసీకి అద్దెకిచ్చేలా కార్యాచరణ రూపొందిస్తోంది. ప్రయోగాత్మకంగా రెండు జిల్లాల్లో మహిళ సంఘాలకు ఆర్టీసీ అద్దె బస్సులు కేటాయించాలని డిసైడ్‌ అయింది.
Updated on: Oct 08, 2024 | 9:24 PM
మహిళా సంఘాలను ఆర్థికంగా బలోపేతం చేసే దిశ‌లో తెలంగాణ ప్రభుత్వం మ‌రో అడుగు ముందుకు వేసింది. మహిళా స్వయం సహాయక సంఘాలకు బ్యాంకు రుణాలు ఇప్పించి వారి ద్వారా బ‌స్సుల‌ను ఆర్టీసీకి అద్దెకు ఇచ్చేలా కార్యాచ‌ర‌ణ‌ను సిద్ధం చేస్తోంది. తెలంగాణ వ్యాప్తంగా బస్సుల సంఖ్య పెంచాల‌ని డిమాండ్ వ‌స్తున్న నేప‌థ్యంలో.. మహిళా సంఘాలకు ఉపాధి క‌ల్పిస్తూ వారి ద్వారా కొనుగోలు చేసిన బ‌స్సుల‌ను హైర్ చేసుకోవాల‌ని ఆర్డీసీ నిర్ణయించింది. ప్రయోగాత్మకంగా రెండు జిల్లాల్లో మహిళా సంఘాలకు ఆర్టీసీ అద్దె బ‌స్సుల‌ను కేటాయించాలని ఫిక్స్‌ అయింది.
తాజాగా.. స‌చివాల‌యంలో ర‌వాణా, బీసీ సంక్షేమ శాఖ మంత్రి పొన్నం ప్రభాకర్, మహిళా శిశు సంక్షేమ శాఖ మంత్రి సీత‌క్క ఆధ్వర్యంలో స‌మావేశం నిర్వహించారు. ఈ సమావేశంలో ర‌వాణా శాఖ, పంచాయితీరాజ్‌ శాఖల ఉన్నతాధికారులు పాల్గొనగా.. మహిళా సంఘాలకు ఆర్టీసీ అద్దె బస్సుల కేటాయింపు విధివిధానాల‌పై చ‌ర్చించారు. మొద‌టి విడ‌త‌లో ప్రయోగాత్మకంగా రెండు జిల్లాల్లోని మహిళా సంఘాలకు ఆర్టీసీ అద్దె బ‌స్సుల‌ను కేటాయించాలని నిర్ణయించారు. ముఖ్యమంత్రి సొంత జిల్లా మ‌హబూబ్‌న‌గ‌ర్, ర‌వాణా శాఖ మంత్రి పొన్నం ప్రభాకర్ సొంత జిల్లా క‌రీంన‌గ‌ర్‌ల‌ను ఎంపిక చేశారు. మొద‌టి విడ‌త‌లో 100 నుంచి 150 బ‌స్సుల‌ను మహిళా సంఘాల ద్వారా కొనుగోలు చేసేందుకు చర్యలు తీసుకోవాలని అధికారులను ఆదేశించారు.
మహిళా సంఘాలు కొనుగోలు చేసే ఆర్టీసీ అద్దె బస్సుల నిర్వహ‌ణ బాధ్యత‌ల కోసం ప్రత్యేక వ్యవ‌స్థను ఏర్పాటు చేయాల‌ని డిసైడ్‌ అయ్యారు. ఇక.. ఆర్టీసీ బస్సుల కొనుగోలుకు అయ్యే ఖ‌ర్చు, వ‌చ్చే ఆదాయం, నిర్వహ‌ణ ఖ‌ర్చు లాంటి అంశాల‌న్నింటితో కూడిన స‌మ‌గ్ర నివేదిక సమర్పించిన త‌ర్వాత తెలంగాణ ప్రభుత్వం తుది నిర్ణయం తీసుకోనుంది.
