Medchal: అపార్ట్మెంట్స్, విల్లాల మురుగునీరు చెరువులోకి మలిపారు.. కట్ చేస్తే..
మేడ్చల్ జిల్లా గుండ్లపోచంపల్లి పరిధిలో చేపల చెరువుల్లో చేపలు మృత్యువాత పడుతున్నాయి. సమీపంలోని విల్లాలు, అపార్ట్మెంట్ల నుంచి వచ్చే మురుగునీరు చెరువులోకి చేరుకుంటున్నాయి. దీంతో చెరువులోని నీరు కలుషితం అవుతున్నాయి. దీని వల్ల చేపలు చనిపోతున్నాయని మత్స్యకారులు ఆవేదన వ్యక్తం చేస్తున్నారు.
Updated on: Apr 26, 2026 | 7:02 PM
మేడ్చల్ జిల్లా గుండ్లపోచంపల్లి పరిధిలో చేపల చెరువుల్లో మురుగునీరు కలవడంతో చేపలు పెద్ద ఎత్తున చనిపోతున్నాయని మత్స్యకార కుటుంబాలు ఆవేదన వ్యక్తం చేస్తున్నాయి. ప్రధానంగా గుండ్ల చెరువు, నీళ్ల చెరువు వంటి చెరువుల్లోకి విల్లాస్ నుంచి వచ్చే డ్రైనేజీ నీరు సెవేజ్ ట్రీట్మెంట్ ప్లాంట్ (STP) లేకుండానే కలవటంతో చెరువు నీరు కలుషితమై, చేపల మృతి రేటు పెరగడంతో వీటిపై ఆధారపడి జీవిస్తున్న కుటుంబాలు నష్టపోతున్నాయి.అసలు గుండ్లపోచంపల్లి చెరువుల్లో కాలుష్యం ఎలా పెరుగుతోంది?
సమీప ప్రాంతాల్లో నిర్మించిన విల్లాస్, అపార్ట్మెంట్ల నుంచి వచ్చే డ్రైనేజీ నీరు చెరువు వైపు కాలువల్లోకి ప్రవహిస్తున్నదని స్థానికులు చెబుతున్నారు. ఈ ప్రాంతంలో చెరువులకు సమీపంలోనే కాలువలు, డైనేజ్ ఛానల్స్ ఏర్పాటు చేసినప్పటికీ STP లేకపోవడంతో వ్యర్థ నీరు నేరుగా చెరువులో కలిసి నీరు కలుషితం అవుతుంది. స్థానికుల వివరణ ప్రకారం విల్లాస్ నుంచి వచ్చే నీరు చేరే చోట నీరు నల్లగా మారి దుర్వాసన వస్తోంది. దీంతో చెరువు పరిసరాల్లో ఆమ్లజని స్థాయిలు బలంగా తగ్గుతాయని, చేపలు శ్వాసకోశ సమస్యలు, విషపూరిత పదార్థాల వలన మృత్యువాత పడుతున్నాయి. చెరువులోకి కలుషిత నీరు చేరడంతో చేపల ఉత్పత్తి గణనీయంగా పడిపోయింది. కొన్నిచోట్ల చేపల మృతి కారణంగా లక్షల రూపాయల ఆర్థిక నష్టం వాటిల్లినట్లు మత్స్యకారులు చెబుతున్నారు.
మేడ్చల్ జిల్లాలోని చెరువుల్లో తెలంగాణ ప్రభుత్వం “సమీకృత మత్స్య అభివృద్ధి పథకం” ద్వారా చేపల పెంపకాన్ని ప్రారంభించినా.. కాలుష్యం కారణంగా ఈ పథకాలు ఫలితం చూపకుండా పోతున్నాయని మత్స్యకారులు నిరాశ వ్యక్తం చేస్తున్నారు. మురుగు నీటి విష పదార్థాలు చెరువు నీటితో పాటు ఇంటి వాడక, విల్లాల డ్రైనేజీ నీరు కలిస్తే అందులో బ్యాక్టీరియా, రసాయనాలు, డిటర్జెంట్స్, వాష్ఏజ్ వ్యర్థ పదార్థాలు ఎక్కువగా ఉంటాయని పర్యావరణ నిపుణులు గుర్తిస్తున్నారు.ఈ పదార్థాలు చేపల గిల్లులు, చర్మంపై ప్రభావం చూపిస్తాయి, నీటిలో డీఓ (డిసాల్విడ్ ఆక్సిజన్) స్థాయిలు తగ్గి చేపలు చిక్కుకుని మృత్యువాత పడతాయి. మురుగునీటిలో చేరే క్లోరైడులు, నైట్రేట్లు, ఫాస్ఫేట్లు వంటి పదార్థాలు ఆల్గే పెరగడానికి తోడ్పడి తద్వారా చెరువులో ఆక్సిజన్ శాతం మరింత తగ్గుతుందని నీటి పరిశోధన నివేదికలు చెబుతున్నాయి.
మత్స్యకార కుటుంబాలు స్థానిక మున్సిపల్, రివెన్యూ, PR శాఖలకు ఎన్నిసార్లు ఫిర్యాదులు చేసినా పటిష్టమైన చర్యలు లేవని ఆరోపిస్తున్నారు. చెరువు చుట్టూ ఉన్న విల్లాస్ నుంచి వచ్చే డ్రైనేజీని STP ద్వారా శుద్ధిచేసి విడుదల చేసే పద్ధతి ఏర్పాటు చేయాలని, అందుకు ముందు చెరువుల్లోకి నేరుగా మురుగు నీరు చేరకుండా కాలువలను తొలగించే లేదా డిస్కనెక్ట్ చేసే విధివిధానాలు విధించాలని డిమాండ్ చేస్తున్నారు.
