Weather: తెలంగాణకు వర్ష సూచన.. రెండు రోజుల పాటు మోస్తారు వర్షాలు.. అప్రమత్తంగా ఉండాలన్న వాతావరణ శాఖ!

Rain Alert for Telangana: తెలంగాణలోని పలు ప్రాంతాల్లో రెండు రోజుల పాటు తేలికపాటి వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. పశ్చిమ దిశ‌నుంచి రాష్ట్రం వైపు గాలులు వీస్తు‌న్నా‌యని హైద‌రా‌బాద్‌ వాతా‌వ‌రణ కేంద్రం అధి‌కారి నాగ‌రత్న తెలి‌పారు. వీటి ప్రభావంతో గురు, శుక్రవారాల్లో రాష్ట్రంలో అక్కడక్కడ తేలి‌క‌పాటి వర్షాలు కురు‌స్తా‌యని, ఒకటి రెండు‌చోట్ల ఓ మోస్తరు వానలు కురిసే అవకాశం ఉందని పేర్కొన్నారు. కాగా, ఒకటి, రెండు చోట్ల భారీ వర్షం పడనున్నట్లు వాతావరణ శాఖ తెలిపింది. మరోవైపు తెలంగాణ వ్యాప్తంగా బుధవారం పలు చోట్ల తేలికపాటి వర్షం కురిసింది. అటు ఆదిలాబాద్‌, కుమ్రంభీం ఆసిఫాబాద్‌, నిజామాబాద్‌, వికారాబాద్‌, నారాయణపేట, నాగర్‌కర్నూల్‌, మహబూబ్‌నగర్‌తో పాటు పలు జిల్లాల్లో తేలికపాటి జల్లులు కురిశాయని వాతా‌వ‌రణ కేంద్రం అధి‌కారి నాగ‌రత్న తెలి‌పారు.

ఇదిలావుంటే, ఎగువ ప్రాంతం మహారాష్ట్ర, కర్ణాటక రాష్ట్రంల్లో కురుస్తున్న వర్షాలతో కృష్ణమ్మ పరవళ్లు తోక్కుతోంది. దీంతో ఆల్మట్టి, నారాయణపూర్‌ ప్రాజెక్టుల నుంచి వస్తున్న నీటితో శ్రీశైలం ప్రాజెక్టు నిండు కుండలా మారింది. దీంతో దిగువకు నీటిని విడుదల చేస్తున్నారు అధికారులు. దీంతో నాగార్జున్‌సాగర్‌ ప్రాజెక్టుకు వరద ఉధృతి పెరగగా, మిగతా ప్రాజెక్టుల్లో ఇన్‌ఫ్లో దాదాపు స్థిరంగా కొనసాగుతోంది. నాగార్జున సాగర్‌ ప్రాజెక్టుకు 1,74,060 క్యూసెక్కుల ఇన్‌ఫ్లో నమోదైంది. బుధవారం రాత్రి 8 క్రస్టు గేట్ల నుంచి 91,346 క్యూసెక్కుల నీటిని దిగువకు విడుదల చేస్తున్నారు. జూరాలకు 1,76,660 క్యూసెక్కుల ఇన్‌ఫ్లో రాగా 25 గేట్ల ద్వారా 1,67,675 క్యూసెక్కుల నీటిని, శ్రీశైలం ప్రాజెక్టుకు 1,89,812 క్యూసెక్కుల ఇన్‌ఫ్లో రాగా, 4 క్రస్టుగేట్లను ఎత్తి నీటిని విడుదల చేస్తున్నారు.

Read Also… Pulichintala: పులిచింతల ప్రాజెక్టులో సాంకేతికలోపం.. విరిగిపడ్డ గేటు.. లక్ష క్యూసెక్కుల నీరు వృధా..!