IMD alert: తెలుగు రాష్ట్రాల్లో దంచి కొడుతోన్న వర్షాలు.. రెండు రోజుల పాటు ఇదే పరిస్థితి

Heavy Rains: తెలుగు రాష్ట్రాల్లో వర్షాలు దంచి కొడుతున్నాయి. రాజధాని నగరం హైదరాబాద్‌ తోపాటు తెలంగాణ తడిసి ముద్దవుతోంది. సాయంత్రం మొదలైన వాన.. అనేక ప్రాంతాల్లో నాన్‌స్టాప్‌గా కురుస్తోంది. లోతట్టు ప్రాంతాలను వర్షపు నీరు ముంచెత్తింది. అటు.. ఏపీలోనూ ఇదే పరిస్థితి. గోదావరి జిల్లాలో రాత్రి మనుషులు కొట్టుకుపోయేంతలా ఈదురుగాలులు వీచాయి.

తూర్పు గోదావరి జిల్లాలో రాజమండ్రి, కాకినాడ, అమలాపురం, ఏజెన్సీ ప్రాంతాల్లో జోరువాన కురిసింది. సామర్లకోటలో డ్రైనేజీలో కొట్టుకుపోయి ఒక వ్యక్తి మరణించాడు. పశ్చిమ గోదావరి జిల్లాపైనా వర్ష ప్రభావం ఎక్కువగా కనిపించింది. ఏలూరులోని రోడ్లపై మోకాల్లోతు నీరు నిలిచింది. సామాన్యులు తీవ్ర ఇబ్బందులు పడ్డారు.

కాగా, వాతావరణ శాఖ చెబుతోన్న సమాచారం ప్రకారం తెలంగాణలో మరో మూడు రోజులు వర్షాలు కురవనున్నాయి. ఉరుములు, మెరుపులతో కూడిన వర్షాలు పడే అవకాశం ఉందని వాతావరణ శాఖ హెచ్చరించింది. గంటకు 30 నుంచి 40 కిలోమీటర్ల వేగంగా ఈదురుగాలులు వీస్తాయని తెలిపింది. పశ్చిమ మధ్య బంగాళాఖాతం, వాయువ్య బంగాళాఖాతం పరిసర ప్రాంతాల్లో అల్పపీడనం కారణంగా వర్షాలు కురుస్తున్నాయని తెలిపింది.

దీని ప్రభావం వల్ల ఇవాళ కూడా తెలంగాణలో భారీ వర్షాలు కురుస్తాయి. నిర్మల్, నిజామాబాద్, వికారాబాద్, సంగారెడ్డి, కామారెడ్డి జిల్లాలో ఈ రెండు రోజులు భారీ నుంచి అతి భారీ వర్షం పడే అవకాశం ఉందని హైదరాబాద్ వాతావరణ కేంద్రం హెచ్చరికలు జారీచేసింది. హైదరాబాద్, రంగారెడ్డి, మేడ్చల్, మల్కాజిరి, నాగర్ కర్నూల్ జిల్లాలో గంటకి 30 నుంచి 40కి.మీ వేగంతో ఈదురుగాలులు, భారీ వర్షాలు పడే అవకాశం ఉందంటూ ఆరెంజ్ అలర్ట్ ప్రకటించింది వాతావరణ శాఖ.

ఈ నేపథ్యంలో ప్రజలు అప్రమత్తంగా ఉండాలని అధికారుల సూచిస్తున్నారు. గ్రేటర్ హైదరాబాద్‌ పరిధిలో ఎలాంటి పరిస్థితులనైనా ఎదుర్కొనేందుకు ప్రత్యేక బృందాలు సిద్ధంగా ఉంచారు.

Read also: Iraq: ఇరాక్‌లో ఘోర అగ్ని ప్రమాదం, ఆర్తనాదాలు.. కరోనా చికిత్స పొందుతోన్న 50 మంది అగ్నికి ఆహుతి.!