Election Code: ఎన్నికల కోడ్తో పోలీసుల ముమ్మర తనిఖీలు.. స్వర్ణకారుల ఆందోళన
సికింద్రాబాద్ జనరల్ బజార్, పాట్ మార్కెట్లో వేలాది మంది స్వర్ణకారులు పనిచేస్తున్నారు. జనరల్ బజార్, పాట్ మార్కెట్లో వందలాది దుకాణాలు ఉన్నాయి. ఎన్నికల కోడ్ పేరుతో గత నాలుగు రోజులుగా పోలీసులు ఒక్కొక్కరిని ఆపి ఇక్కడి వ్యాపారులను దొంగలంటూ తనిఖీలు చేస్తున్నారు. వ్యాపారులు అక్కడ పనిచేసే సిబ్బంది ఆభరణాల పాలిష్ లేదా ఇతర పనుల కోసం చిన్న మొత్తంలో బంగారాన్ని..
Updated on: Oct 14, 2023 | 7:07 PM
తెలంగాణలో నవంబర్ 30న ఎన్నికలు అంటూ తేదీని ప్రకటించగానే ఎన్నికల కోడ్ అమల్లోకి వచ్చినట్టయింది. దీంతో ఎన్నికల్లో నిలబడే అభ్యర్థులు ఓటర్లను ప్రలోభాలకు గురి చేయకుండా డబ్బు మద్యం బంగారం లాంటి వాటితో ప్రలోభ పెట్టకుండా ఉండేందుకు ఎక్కడికక్కడ తనిఖీలు చేస్తున్నారు. సరైన పత్రాలు చూపించకుండా 50000 కు మించిన నగదు, బంగారం, వెండి లాంటి వాటి రవాణాకు ఎక్కడికక్కడ చెక్ పెడుతున్నారు. అయితే ఈ ఎన్నికల కోడ్ సికింద్రాబాద్లో ఉన్న హోల్సేల్ గోల్డ్ మార్కెట్ అయినా పాట్ మార్కెట్ వ్యాపారులకు శాపంగా మారింది.
సికింద్రాబాద్ జనరల్ బజార్, పాట్ మార్కెట్లో వేలాది మంది స్వర్ణకారులు పనిచేస్తున్నారు. జనరల్ బజార్, పాట్ మార్కెట్లో వందలాది దుకాణాలు ఉన్నాయి. ఎన్నికల కోడ్ పేరుతో గత నాలుగు రోజులుగా పోలీసులు ఒక్కొక్కరిని ఆపి ఇక్కడి వ్యాపారులను దొంగలంటూ తనిఖీలు చేస్తున్నారు. వ్యాపారులు అక్కడ పనిచేసే సిబ్బంది ఆభరణాల పాలిష్ లేదా ఇతర పనుల కోసం చిన్న మొత్తంలో బంగారాన్ని, వెండి ఆభరణాలు తీసుకువెళ్తారు. అలా బంగారం తీసుకెళ్తున్న సమయంలో పోలీసులు వారిని పట్టుకుని పట్టుబడిన బంగారాన్ని సైతం ఎన్నికల కోడ్ పేరుతో సీజ్ చేస్తున్నారు. షాపుల బయట నిలబడి, ఎవరైనా షాపు నుంచి బయటకు వస్తే జేబులతో సహా బ్యాగులు చెక్ చేస్తున్నారని వ్యాపారులు వాపోతున్నారు. సందర్భాన్ని బట్టి ఈ మార్కెట్లో చిన్న మొత్తంలోనే కాదు కిలోల కొద్ది బంగారం, వెండి కూడా ఒక దగ్గర నుంచి ఇంకొక దగ్గరికి తరలించాల్సి ఉంటుంది. అలా తరలిస్తున్న సమయంలోనే పోలీసులు 1 కిలోల వెండిని స్వాధీనం చేసుకున్నారు. దీని ధర సుమారు 70 వేలు. పోలీసులు వ్యాపారుల నుంచి కొద్ది మొత్తంలో బంగారాన్ని తీసుకుని పోలీస్ స్టేషన్కు తరలించారు. దీనివల్ల తమ వ్యాపారానికి అంతరాయం ఏర్పడుతుందని, కస్టమర్ల సంఖ్య పూర్తిగా తగ్గిపోయిందని, దీంతో రోజు కూలి మీద ఆధారపడి బతికే వర్కర్లు ఇబ్బంది పడుతున్నారని పోలీస్ స్టేషన్ ముందు విశ్వకర్మ స్వర్ణకారులు ధర్నా చేశారు.
మరికొద్ది రోజుల్లో పండుగలు రానున్నాయి. ఎలక్షన్ కోడ్ సృష్టించిన సమస్య కారణంగా మార్కెట్లోకి కస్టమర్లు రావడం లేదని వాపోతున్నారు. పరిస్థితి ఇలాగే కొనసాగితే చాలా మంది స్వర్ణకారులు, దుకాణాల యజమానులు భారీగా నష్టపోవాల్సి వస్తుంది. గత ఎన్నికల్లో ఎప్పుడూ ఇలా జరగలేదు. ప్రస్తుత పరిస్థితిని పరిగణనలోకి తీసుకుంటే జనరల్ బజార్, కుండల మార్కెట్, ఆభరణాలు, బులియన్ వ్యాపారులు, విశ్వకర్మ అసోసియేషన్ తమ తమ షాపులను మూసివేసి పోలీస్ స్టేషన్ ముందు నిరసన తెలియజేశారు. స్థానిక ఏసీపీ శ్రీను స్థానిక గోల్డ్ వ్యాపారులతో సమావేశమయ్యారు. మార్కెట్ ఏరియా లోపల, బయట పోలీసు సిబ్బంది తనిఖీ చేయరని హామీ ఇచ్చారు. వ్యాపార నిమిత్తం చిన్న పరిమాణంలో బంగారం తీసుకెళుతున్న స్వర్ణకారులను ఇబ్బందికి గురి చేయమని సూచించారు. డీలర్లు తమ మెటీరియల్ను ఎన్నికల సంఘం నుంచి విడుదల చేయడానికి అవసరమైన పత్రాలు, బిల్లులు, వోచర్లతో పాటు తీసుకువెళ్లాలని అన్నారు.
రూ. 50000 కంటే ఎక్కువ విలువైన నగదు, బంగారం, వెండి ఉన్న వ్యక్తిని పోలీస్ సిబ్బంది పట్టుకున్నట్లయితే సదరు వ్యక్తి అవసరమైన పత్రాలను తీసుకువెళ్లినప్పటికీ, ఎన్నికల కమిషన్కు అప్పగిస్తారని చెబుతున్నారు. ఎందుకంటే బిల్లును తనిఖీ చేసి, వ్యక్తిని వెళ్లనివ్వడానికి పోలీసులకు అధికారం లేదు. జనరల్ బజార్ పాట్ మార్కెట్ గోల్డ్ వ్యాపారులు ఏం చేయాలో అర్థం కాక తలలు పట్టుకుంటున్నారు.
మరిన్ని తెలంగాణ వార్తల కోసం ఇక్కడ క్లిక్ చేయండి
