IND vs AFG: మహ్మద్ సిరాజ్ ఔట్.. అఫ్గాన్ టెస్టుకు జమ్మూ కాశ్మీర్ ఎక్స్ప్రెస్..?
India vs Afghanistan Test 2026: సొంతగడ్డపై అఫ్గానిస్తాన్తో జరిగే టెస్ట్ మ్యాచ్ యువ ఆటగాళ్లకు తమ సత్తా చాటుకోవడానికి ఒక గొప్ప వేదిక. మహ్మద్ సిరాజ్ లాంటి అనుభవజ్ఞుడైన బౌలర్ దూరం కావడం జట్టుకు లోటే అయినప్పటికీ, ఆకిబ్ నబీ లేదా గుర్నూర్ బ్రార్ లాంటి యువ కిశోరాలు భారత టెస్ట్ క్రికెట్ భవిష్యత్తుకు కొత్త ఆశాకిరణాలుగా మారతారనడంలో ఎలాంటి సందేహం లేదు.
Updated on: Jun 03, 2026 | 1:40 PM
అఫ్గానిస్తాన్తో జరగబోయే ఏకైక ప్రతిష్టాత్మక టెస్ట్ మ్యాచ్కు ముందు టీమిండియాకు గట్టి ఎదురుదెబ్బ తగిలింది. స్టార్ పేసర్ మహ్మద్ సిరాజ్ ఫిట్నెస్పై నీలినీడలు కమ్ముకోవడంతో జట్టు యాజమాన్యం తీవ్ర ఆందోళనలో పడింది. ఈ నేపథ్యంలో జమ్మూ కాశ్మీర్ రంజీ సంచలనం ఆకిబ్ నబీని జట్టులోకి తీసుకునేందుకు సెలక్టర్లు తీవ్రంగా కసరత్తులు చేస్తున్నారు.
సిరాజ్ ఫిట్నెస్పై ఊగిసలాట.. మేనేజ్మెంట్ కీలక నిర్ణయం..!
భారత క్రికెట్ అభిమానులను ఇప్పుడు ఒకే ఒక ప్రశ్న వేధిస్తోంది.. అఫ్గానిస్తాన్తో జరిగే ఏకైక టెస్టు మ్యాచ్లో మన హైదరాబాద్ ఎక్స్ప్రెస్ మహ్మద్ సిరాజ్ బరిలోకి దిగుతాడా లేదా? ఇటీవల ముగిసిన ఇండియన్ ప్రీమియర్ లీగ్ (ఐపీఎల్) 2026 సుదీర్ఘ సీజన్లో గుజరాత్ టైటాన్స్ తరపున సిరాజ్ ప్రతి మ్యాచ్లోనూ చెమటోడ్చాడు. ఈ విపరీతమైన పని భారం కారణంగానే అతను ప్రస్తుతం కాస్త అసౌకర్యానికి గురైనట్లు తెలుస్తోంది.
ప్రస్తుతం చండీగఢ్లో ప్రత్యేక వైద్య సిబ్బంది పర్యవేక్షణలో ఉన్న సిరాజ్ ఆరోగ్యంపై రాబోయే 48 గంటల్లో ఒక స్పష్టమైన నిర్ణయం తీసుకోనున్నారు. సుదీర్ఘ కాలం పాటు జట్టుకు సేవలు అందించాల్సిన సీనియర్ బౌలర్ కాబట్టి, ఎటువంటి రిస్క్ తీసుకోకుండా అతనికి విశ్రాంతినివ్వడమే మంచిదనే యోచనలో యాజమాన్యం ఉంది.
రేసులోకి కొత్త రక్తం.. జమ్మూ సంచలనం ఆకిబ్ నబీ!
ఒకవేళ సిరాజ్ దూరం కాక తప్పని పరిస్థితి వస్తే, అతని స్థానాన్ని ఎవరితో భర్తీ చేయాలనే దానిపై సెలక్టర్లు ప్రత్యామ్నాయ ప్రణాళికలతో సిద్ధమయ్యారు. అనుభవం లేని పేస్ విభాగంతో బరిలోకి దిగడం కాస్త ప్రమాదకరమే అయినప్పటికీ, దేశవాళీ క్రికెట్లో అద్భుతాలు సృష్టిస్తున్న యువ ఆటగాళ్లకు ఇదొక సువర్ణావకాశం కానుంది. ఈ రేసులో అందరికంటే ముందు వరుసలో నిలిచాడు జమ్మూ కాశ్మీర్ ఫాస్ట్ బౌలర్ ఆకిబ్ నబీ.
ఇటీవల ముగిసిన రంజీ ట్రోఫీలో జమ్మూ కాశ్మీర్ జట్టును ముందుండి నడిపించి, అద్భుత విజయాలు అందించడంలో ఆకిబ్ నబీ కీలక పాత్ర పోషించాడు. నిలకడైన లైన్ అండ్ లెంగ్త్తో ప్రత్యర్థి బ్యాటర్లను వణికించే ఆకిబ్, ప్రస్తుతం భారత జట్టు నెట్ బౌలర్లలో ఒకడిగా ముమ్మరంగా శ్రమిస్తున్నాడు. అతనితో పాటు పంజాబ్ ఎడమచేతి వాటం పేసర్ గుర్నూర్ బ్రార్ పేరు కూడా పరిశీలనలో ఉంది. ఒకవేళ సిరాజ్ అందుబాటులో లేకపోతే గుర్నూర్ బ్రార్కు టెస్ట్ క్యాప్ దక్కే అవకాశాలు పుష్కలంగా ఉన్నాయి.
ముల్లాన్పూర్లో టీమిండియా ముమ్మర విన్యాసాలు..
మరోవైపు అఫ్గాన్ను సొంతగడ్డపై చిత్తు చేయడమే లక్ష్యంగా యువ కెప్టెన్ శుభ్మన్ గిల్ సారథ్యంలోని భారత జట్టు సమరానికి సిద్ధమవుతోంది. మొహాలీ సమీపంలోని ముల్లాన్పూర్ మహారాజా యాదవీంద్ర సింగ్ అంతర్జాతీయ క్రికెట్ స్టేడియంలో భారత ఆటగాళ్లు ప్రాక్టీస్ సెషన్స్ను ప్రారంభించారు.
కెప్టెన్ గిల్తో పాటు వైస్ కెప్టెన్ కేఎల్ రాహుల్, స్టార్ వికెట్ కీపర్ బ్యాటర్ రిషభ్ పంత్, యువ ఆల్రౌండర్ నితీష్ కుమార్ రెడ్డి నెట్స్లో తీవ్రంగా శ్రమిస్తున్నారు. ఎర్ర బంతితో సుదీర్ఘ ఫార్మాట్లో పట్టు సాధించేందుకు బ్యాటర్లు, బౌలర్లు గంటల తరబడి మైదానంలోనే గడుపుతున్నారు. సిరాజ్ ఆడే విషయంపై ఒకట్రెండు రోజుల్లో పూర్తి స్పష్టత వస్తే బౌలింగ్ వ్యూహాలను ఖరారు చేస్తామని కోచింగ్ సిబ్బంది పేర్కొంటున్నారు.
మరిన్ని ఐపీఎల్ వార్తల కోసం ఇక్కడ క్లిక్ చేయండి..
