తెల్లగా ఉంటే చాలు, తెలుగు అక్కర్లేదు! రాధికా ఆప్టే

×

తెల్లగా ఉంటే చాలు, తెలుగు అక్కర్లేదు! రాధికా ఆప్టే

తెలుగు చిత్ర పరిశ్రమలో హీరోయిన్ల ఎంపికపై ప్రముఖ నటి రాధికా ఆప్టే చేసిన వ్యాఖ్యలు ప్రస్తుతం చర్చనీయాంశంగా మారాయి. తెలుగు హీరోయిన్‌గా నటించాలంటే తెలుగు భాష రాకపోయినా పర్వాలేదు, తెల్లగా ఉంటే చాలు అనే అభిప్రాయాన్ని ఆమె వ్యక్తం చేశారు. ఇది తన వ్యక్తిగత పరిశీలన అని, తన అభిప్రాయం తప్పై ఉండవచ్చని ఆమె స్పష్టం చేశారు. దక్షిణాది చిత్రాల్లో ఉత్తరాది నటీమణులను తీసుకోవడానికి వారి తెల్లని చర్మమే ప్రధాన కారణమని రాధికా ఆప్టే అన్నారు. దక్షిణాదిలో ఎంతో అందంగా, ప్రతిభావంతంగా ఉన్న అమ్మాయిలు చాలా మంది ఉన్నారని, వారికి భాషపై మంచి పట్టు ఉంటుందని ఆమె గుర్తు చేశారు. అయినప్పటికీ, ముంబై నుండి వచ్చిన వారికి తెలుగు రాకపోయినా, డబ్బింగ్ చెప్పించాల్సి వచ్చినా, కొన్నిసార్లు హావభావాలు అర్థం కాకపోయినా వారికే అవకాశాలు లభిస్తున్నాయని ఆమె ఆవేదన వ్యక్తం చేశారు. తాను ఏడు భాషల్లో నటించానని పేర్కొన్న రాధికా, కేవలం భాషను బట్టి పట్టడం కాదని, ఆ భాషలోని భావాన్ని అర్థం చేసుకోవడం ముఖ్యమని చెప్పారు. అప్పుడే ఒక పాత్రకు పూర్తి న్యాయం చేయగలమని ఆమె అభిప్రాయపడ్డారు. రాధికా ఆప్టే లేవనెత్తిన ఈ అంశంపై సినీ వర్గాల్లో, ప్రేక్షకుల్లో భిన్నాభిప్రాయాలు వ్యక్తమవుతున్నాయి.

Phani CH