IND vs NZ 5th T20I: లక్కీ ఎస్కేప్.. కట్‌చేస్తే.. 28 బంతుల్లో తాట తీసిన ఛోటా ప్యాకెట్

భారత బ్యాటర్ ఇషాన్ కిషన్‌కు భారీ అదృష్టం కలిసొచ్చింది. న్యూజిలాండ్‌తో జరిగిన మ్యాచ్‌లో అతడు కొట్టిన బంతిని ఫిన్ అలెన్ అద్భుతంగా క్యాచ్‌గా అందుకున్నాడు. అయితే బౌండరీ లైన్ దగ్గర జరిగిన ఈ క్యాచ్‌పై థర్డ్ అంపైర్ సమీక్ష నిర్వహించడంతో అసలు విషయం బయటపడింది.

ఫిన్ అలెన్ బంతిని గాల్లోకి ఎగిరి అందుకున్నాడు. క్యాచ్ పట్టిన తర్వాత బంతిని మైదానంలోకి విసిరే సమయంలో అతడి కుడి కాలు నేలను తాకినట్లు రీప్లేలో స్పష్టమైంది. దీంతో ఫీల్డర్ బౌండరీని తాకినట్లుగా థర్డ్ అంపైర్ నిర్ధారించాడు.

ఫలితంగా ఇషాన్ కిషన్ ఔట్ కాలేదు. అతడు కొట్టిన షాట్‌ను థర్డ్ అంపైర్ సిక్స్‌గా ప్రకటించాడు.

క్యాచ్ పట్టేశామని న్యూజిలాండ్ ఆటగాళ్లు సంబరపడే సమయంలో నిర్ణయం పూర్తిగా మారిపోయింది. దీంతో ఇషాన్ కిషన్‌కు లక్కీ ఎస్కేప్ దక్కింది. ఈ ఘటనకు సంబంధించిన ఫొటోలు ప్రస్తుతం క్రికెట్ అభిమానులను ఆకట్టుకుంటున్నాయి.

లైఫ్ తర్వాత చెలరేగిన ఇషాన్..

మిచెల్ సాంట్నర్ (Mitchell Santner) వేసిన 8.5వ ఓవర్‌లో ఇషాన్ కిషన్ భారీ సిక్స్ బాదాడు. ఫుల్‌గా, ఆఫ్‌స్టంప్‌కు వెలుపల పడిన బంతిని ముందుకు వచ్చి డీప్ మిడ్ వికెట్ దిశగా భారీ షాట్ ఆడాడు. బంతి నేరుగా ప్రేక్షకుల్లోకి వెళ్లడంతో ఇషాన్ అర్ధశతకం పూర్తి చేసుకున్నాడు.

కేవలం 28 బంతుల్లోనే 50 పరుగులు పూర్తి చేశాడు. దీంతో టీ20 అంతర్జాతీయ క్రికెట్‌లో ఇషాన్ కిషన్ 14వ అర్ధశతకం నమోదు చేశాడు.

ఈ సిరీస్‌లో ఇప్పటివరకు ఇషాన్‌కు పెద్దగా పరుగులు రాలేదు. గాయాలు కూడా అతడి అవకాశాలను ప్రభావితం చేశాయి. అయితే ఈ మ్యాచ్‌లో మాత్రం మొదటి నుంచే దూకుడుగా ఆడుతూ బౌలర్లపై ఒత్తిడి పెంచాడు.

అర్ధశతకం పూర్తి చేసిన వెంటనే ఇషాన్ బ్యాట్ పైకెత్తి అభిమానుల అభినందనలు స్వీకరించాడు. ఈ ఇన్నింగ్స్‌తో న్యూజిలాండ్ పర్యటనలో తనపై వచ్చిన విమర్శలకు బ్యాట్‌తోనే సమాధానం ఇచ్చాడు.

ముఖ్యంగా ఇషాన్‌కు బౌన్స్, పేస్ ఉన్న విదేశీ పిచ్‌లపై ఇబ్బందులు ఉంటాయనే చర్చ జరుగుతున్న సమయంలో ఈ ఇన్నింగ్స్ రావడం అతడికి మరింత ఆత్మవిశ్వాసాన్ని ఇచ్చే అవకాశం ఉంది.

ఈ అర్ధశతకం ద్వారా ఇషాన్ మరోసారి తనలోని దూకుడైన టీ20 బ్యాటర్‌ను చూపించాడు. టీ20 ప్రపంచకప్‌కు ముందు భారత జట్టుకు ఇషాన్ కిషన్ ఫామ్‌లోకి రావడం కీలక పరిణామంగా మారింది.