ఫ్యాన్స్‌కు బ్యాడ్‌న్యూస్.. ఆసియాకప్ నుంచి మిస్టర్ 360 డిగ్రీ ప్లేయర్ ఔట్.. కారణం ఏంటంటే?

Suryakumar Yadav: ఆసియా కప్ 2025 మరికొద్దిరోజుల్లో మొదలుకానుంది. ఈ క్రమంలో ఆయా జట్లు తమ స్వ్కాడ్‌లను ప్రకటించేందుకు సిద్ధమవుతున్నాయి. ఈ క్రమంలో భారత క్రికెట్ జట్టుపై ఆసక్తి రేకెత్తిస్తోంది. ముఖ్యంగా టీ20 కెప్టెన్ సూర్యకుమార్ యాదవ్ ఫిట్‌నెస్ విషయం ప్రస్తుతం చర్చనీయాంశమైంది. స్పోర్ట్స్ హెర్నియా సర్జరీ చేయించుకుని కోలుకుంటున్న సూర్యకుమార్ యాదవ్, ఆసియా కప్‌నకు ముందు జపాన్ పర్యటనకు వెళ్లడం అనేక అనుమానాలకు దారితీసింది. అతను వ్యక్తిగత పనుల మీద వెళ్లాడా, లేదా ఏదైనా చికిత్స కోసమా అనే విషయంలో స్పష్టత లేకపోవడంతో అభిమానులు, క్రికెట్ నిపుణులు ఆందోళన చెందుతున్నారు.

గాయం నుంచి కోలుకుంటున్న సూర్యకుమార్..

ఐపీఎల్ 2025 సీజన్ తర్వాత సూర్యకుమార్ యాదవ్ జర్మనీలోని మ్యూనిచ్‌లో స్పోర్ట్స్ హెర్నియా సర్జరీ చేయించుకున్నాడు. ఈ సర్జరీ విజయవంతమైందని, అతను బెంగళూరులోని నేషనల్ క్రికెట్ అకాడమీ (NCA)లో ఫిట్‌నెస్ సాధించేందుకు కసరత్తులు చేస్తున్నాడని వార్తలు వచ్చాయి. ఇటీవల, అతను నెట్స్‌లో బ్యాటింగ్ ప్రాక్టీస్ చేస్తూ కనిపించిన వీడియోలు సోషల్ మీడియాలో వైరల్ అయ్యాయి. దీంతో ఆసియా కప్‌నకు సూర్యకుమార్ అందుబాటులో ఉంటాడని అభిమానులు సంతోషించారు.

అనుమానాలకు కారణమైన జపాన్ ట్రిప్..

అయితే, ఆసియా కప్ కోసం భారత జట్టు ఎంపికకు మరికొన్ని రోజులు మాత్రమే మిగిలి ఉన్న తరుణంలో సూర్యకుమార్ యాదవ్ జపాన్‌కు వెళ్లినట్లు ఒక స్పోర్ట్స్ జర్నలిస్ట్ సోషల్ మీడియాలో పోస్ట్ చేశారు. ఈ పర్యటన గురించి ఎటువంటి అధికారిక ప్రకటన లేకపోవడంతో అతని ఫిట్‌నెస్ విషయంపై అనుమానాలు మొదలయ్యాయి. సాధారణంగా, ఒక ఆటగాడు గాయం నుంచి కోలుకుంటున్నప్పుడు దేశం విడిచి వెళ్లడం చాలా అరుదు. దీని వల్ల అతను ఏదైనా అదనపు చికిత్స కోసమో, లేదా అతని ఫిట్‌నెస్‌లో ఏదైనా సమస్య ఉందనే ఊహాగానాలు మొదలయ్యాయి.

జట్టు ఎంపికపై ప్రభావం?

టీమిండియా టీ20 జట్టుకు కెప్టెన్‌గా ఉన్న సూర్యకుమార్ యాదవ్ ఆసియా కప్‌నకు దూరమైతే, అది జట్టుపై తీవ్ర ప్రభావం చూపుతుంది. గతంలో రోహిత్ శర్మ టీ20 ఫార్మాట్ నుంచి తప్పుకున్న తర్వాత సూర్యకుమార్ కెప్టెన్‌గా బాధ్యతలు చేపట్టి, తన నాయకత్వంలో జట్టుకు అద్భుతమైన విజయాలు అందించాడు. ఇప్పుడు అతను అందుబాటులో లేకపోతే, హార్దిక్ పాండ్యా కెప్టెన్సీ బాధ్యతలు తీసుకునే అవకాశం ఉంది. అయితే, జట్టు కూర్పు, వ్యూహాల విషయంలో చివరి నిమిషంలో మార్పులు జరిగే అవకాశం ఉంది. బీసీసీఐ సెలెక్షన్ కమిటీ ఈ విషయంపై స్పష్టత వచ్చాకనే జట్టును ప్రకటిస్తుందని తెలుస్తోంది.

సూర్యకుమార్ యాదవ్ జపాన్ పర్యటన ఆసియా కప్ స్క్వాడ్ ఎంపికపై ఒకరకమైన సస్పెన్స్ క్రియేట్ చేసింది. అతను పూర్తి ఫిట్‌నెస్ సాధించి, జట్టుతో చేరతాడా లేదా అనేది తేలాలంటే మరికొన్ని రోజులు వేచి చూడాల్సిందే. ఒకవేళ అతను అందుబాటులో లేకపోతే, ఆసియా కప్‌లో భారత జట్టు ప్రదర్శనపై అది ఏ మేరకు ప్రభావం చూపుతుందో చూడాలి. ఏదేమైనా, ఆసియా కప్ ముంగిట టీమిండియా అభిమానులను ఈ విషయం ఆందోళనకు గురిచేస్తోంది.