Virat Kohli: కోహ్లీ కెరీర్‌కే మచ్చ తెచ్చిన ఇన్నింగ్స్.. కింగ్ ఇజ్జత్‌కే సవాల్ చేసిన ’67’ కథేంటో తెలుసా?

Slowest IPL Century Record: ఐపీఎల్ చరిత్రలో అత్యధిక సెంచరీలు చేసిన బ్యాటర్ ఎవరంటే టక్కున గుర్తొచ్చే పేరు విరాట్ కోహ్లీ. ఇప్పటివరకు తన ఐపీఎల్ ప్రయాణంలో కోహ్లీ మొత్తం 8 శతకాలను బాదేశాడు. అయితే ఈ ఎనిమిదింటిలో ఒక సెంచరీ మాత్రం కోహ్లీ ఎప్పటికీ గుర్తుంచుకోవాలని అనుకోడు. 2024 సీజన్‌లో జట్టు కష్టాల్లో ఉన్నప్పుడు చేసిన ఆ సెంచరీ, అతనికి ఒక అవమానకరమైన రికార్డును తెచ్చిపెట్టింది. అప్పటివరకు మనీష్ పాండే పేరిట ఉన్న ఒక చెత్త రికార్డును కోహ్లీ ఈ ఇన్నింగ్స్‌తో సమం చేశాడు.

అత్యంత స్లో సెంచరీతో మాయని మచ్చ..

విరాట్ కోహ్లీ చేసిన ఆ సెంచరీ ఎందుకు మచ్చగా మారింది అంటే.. అది ఐపీఎల్ చరిత్రలోనే అత్యంత నెమ్మదైన శతకం. ఆ మ్యాచ్‌లో కోహ్లీ 100 పరుగుల మైలురాయిని చేరుకోవడానికి ఏకంగా 67 బంతులు తీసుకున్నాడు. 2009లో మనీష్ పాండే కూడా సరిగ్గా 67 బంతుల్లోనే సెంచరీ పూర్తి చేసి ఈ రికార్డును సృష్టించాడు. ఒకవేళ కోహ్లీ మరో బంతిని అదనంగా తీసుకుని ఉంటే, ఐపీఎల్ చరిత్రలో అత్యంత నెమ్మదైన శతకం బాదిన ఏకైక బ్యాటర్‌గా విమర్శల పాలయ్యేవాడు. టీ20 క్రికెట్ వేగంగా సాగుతున్న ఈ రోజుల్లో ఇంత నెమ్మదిగా ఆడటం అభిమానులను సైతం ఆశ్చర్యపరిచింది.

ఈ సీజన్‌లో కోహ్లీ విశ్వరూపం..

గతంలో నెమ్మదైన ఇన్నింగ్స్ ఆడినా, ప్రస్తుత ఐపీఎల్ 2026 సీజన్‌లో మాత్రం కోహ్లీ తన పాత ఫామ్‌ను అందిపుచ్చుకున్నాడు. ప్రస్తుతం అత్యధిక పరుగులు చేసిన బ్యాటర్ల జాబితాలో నాలుగో స్థానంలో కొనసాగుతున్నాడు. ఇప్పటివరకు ఆడిన 6 మ్యాచ్‌ల్లో 2 అర్ధసెంచరీల సాయంతో 247 పరుగులు చేశాడు. అతని స్ట్రైక్ రేట్ కూడా ఈసారి ఆకట్టుకుంటోంది. గత రికార్డులు ఎలా ఉన్నా, ప్రస్తుతం కోహ్లీ ఆడుతున్న తీరు జట్టుకు కొండంత బలాన్నిస్తోంది.

ప్లే-ఆఫ్ రేసులో బెంగళూరు జట్టు..

ఆర్సీబీ జట్టు మరోసారి టైటిల్ కోసం తీవ్రంగా శ్రమిస్తోంది. ప్రస్తుతం పాయింట్ల పట్టికలో టాప్-4లో స్థానం దక్కించుకుని ప్లే-ఆఫ్ రేసులో నిలిచింది. కోహ్లీ తన అద్భుతమైన ఫామ్‌ను కొనసాగిస్తే, ఈసారి ఎలాగైనా కప్పు గెలవాలన్న బెంగళూరు కల నెరవేరే అవకాశం ఉంది. గతంలోని నెమ్మదైన సెంచరీ మచ్చను తన ప్రస్తుత విధ్వంసకర ఇన్నింగ్స్‌లతో కోహ్లీ చెరిపివేస్తాడని అభిమానులు ఆశిస్తున్నారు. తనపై వస్తున్న విమర్శలకు మైదానంలోనే తన బ్యాట్‌తోనే కోహ్లీ సమాధానం చెబుతున్నాడు.