CSK vs GT: చావో రేవో తేల్చుకోనున్న చెన్నై.. టాప్ 2పైనే గిల్ సేన గురి.. హోరాహోరీ తప్పదిక..!
Gujarat Titans vs Chennai Super Kings: ఐపీఎల్ లీగ్ దశ ముగింపునకు వస్తున్న వేళ క్రికెట్ సమరం రసవత్తరంగా మారింది. క్వాలిఫైయర్-1 ఆడేందుకు టాప్-2 స్థానమే లక్ష్యంగా గుజరాత్ టైటాన్స్ గురిపెట్టగా, వరుస ఓటములతో కుదేలైన ఐదుసార్లు ఛాంపియన్ చెన్నై సూపర్ కింగ్స్ పరువు నిలుపుకోవాలని చూస్తోంది. గురువారం అహ్మదాబాద్లోని నరేంద్ర మోదీ స్టేడియంలో ఈ ఇరు జట్లు తలపడనున్నాయి.
Updated on: May 20, 2026 | 3:04 PM
Gujarat Titans vs Chennai Super Kings: ఐపీఎల్ లీగ్ పట్టికలో అగ్రస్థానాల్లో నిలిచే జట్లకు ఫైనల్ చేరడానికి రెండు అవకాశాలు (క్వాలిఫైయర్ 1, క్వాలిఫైయర్ 2) లభిస్తాయి. ప్రస్తుతం 16 పాయింట్లతో రెండో స్థానంలో ఉన్న గుజరాత్ టైటాన్స్, టేబుల్ టాపర్స్ రాయల్ ఛాలెంజర్స్ బెంగళూరు (18 పాయింట్లు), సన్రైజర్స్ హైదరాబాద్ (16 పాయింట్లు) జట్లతో తీవ్ర పోటీని ఎదుర్కొంటోంది. ఈ మ్యాచ్లో చెన్నైపై భారీ తేడాతో విజయం సాధిస్తే, గుజరాత్ జట్టు రన్ రేట్ పరంగా మరింత బలాన్ని పుంజుకుంటుంది. ప్రస్తుతం గుజరాత్ నెట్ రన్ రేట్ (+0.400) హైదరాబాద్ (+0.350) కంటే మెరుగ్గా ఉండటం గిల్ సేనకు కలిసివచ్చే అంశం.
మరోవైపు, సన్రైజర్స్ చేతిలో తృటిలో ఓడిపోయిన చెన్నై సూపర్ కింగ్స్ ప్లేఆఫ్స్ ఆశలు దాదాపు గల్లంతయ్యాయి. రుతురాజ్ గైక్వాడ్ నాయకత్వంలోని చెన్నై జట్టు టోర్నీలో నిలవాలంటే ఈ మ్యాచ్లో గెలవడంతో పాటు, ఇతర జట్ల ఓటములపై ఆధారపడాల్సి ఉంటుంది. దీంతో ఎలాగైనా ఈ మ్యాచ్లో గెలిచి తమ పరువు నిలుపుకోవాలని సీఎస్కే భావిస్తోంది.
ఇది కూడా చదవండి: IPL 2026: ఇదేందిది.. ప్లేఆఫ్స్కు చెన్నై టీం.. టాప్ 4 కోసం పెద్ద ప్లాన్ చేశారుగా..!
హోరాహోరీ పోరు: గిల్ ఫామ్ వర్సెస్ చెన్నై బౌలింగ్..
బ్యాటింగ్కు అనుకూలించే అహ్మదాబాద్ పిచ్పై గుజరాత్ కెప్టెన్ శుభ్మన్ గిల్, ఓపెనర్ సాయి సుదర్శన్ అద్భుతమైన ఫామ్లో ఉన్నారు. పవర్ప్లేలో చెన్నై బౌలింగ్ను ఎదుర్కొని నిలబడితే గుజరాత్కు భారీ స్కోరు ఖాయం. అయితే, గుజరాత్ మిడిలార్డర్ నిలకడలేమితో సతమతమవుతోంది. దీన్ని ఆసరాగా చేసుకుని చెన్నై ఎడమచేతి వాటం స్పిన్నర్ అకీల్ హొసేన్తో గిల్ను కట్టడి చేయాలని చూస్తోంది. గతంలో హొసేన్ ట్వంటీ-20ల్లో గిల్ను రెండుసార్లు అవుట్ చేయడం ఇక్కడ గమనార్హం.
రషీద్ ఖాన్ మాయాజాలం.. సంజూ శాంసన్ వ్యూహం..
మిడిల్ ఓవర్లలో గుజరాత్ స్టార్ స్పిన్నర్ రషీద్ ఖాన్ను ఎదుర్కోవడం చెన్నై బ్యాటర్లకు పెద్ద సవాలు కానుంది. ఈ స్పిన్ ఉచ్చును ఛేదించడానికి చెన్నై వైపు నుంచి సంజూ శాంసన్ అత్యంత కీలకమైన ఆటగాడిగా మారనున్నాడు. రషీద్ అద్భుతమైన రిస్ట్ స్పిన్ను సంజూ ఎంతవరకు సమర్థవంతంగా ఎదుర్కొంటాడనే దానిపైనే చెన్నై విజయావకాశాలు ఆధారపడి ఉన్నాయి.
చరిత్ర ఏం చెబుతోంది?
ఐపీఎల్ చరిత్రలో ఈ రెండు జట్ల మధ్య రికార్డులు 4-4తో సమంగా ఉన్నాయి. కానీ, ఇటీవలి కాలంలో గుజరాత్ హవా నడుస్తోంది. ఈ సీజన్ మొదటి భాగంలో చెన్నైను వారి సొంత మైదానంలోనే గుజరాత్ 8 వికెట్ల తేడాతో ఘోరంగా ఓడించింది. ఆ మ్యాచ్లో గుజరాత్ పేసర్ కగిసో రబడా మూడు వికెట్లతో చెన్నై టాప్ ఆర్డర్ను దెబ్బతీశాడు. ఈసారి కూడా రబడా స్పెల్ను రుతురాజ్, సంజూ శాంసన్ జాగ్రత్తగా ఎదుర్కోవాల్సి ఉంటుంది.
గాయాల సమస్యలు, నిలకడలేని బౌలింగ్తో చెన్నై సతమతమవుతుంటే, గుజరాత్ మాత్రం అన్ని విభాగాల్లో సమతూకంగా కనిపిస్తోంది. ఒకరికి టాప్-2 స్థానం, మరొకరికి పరువు పోరాటం కావడంతో ఈ మ్యాచ్ క్రికెట్ అభిమానులకు అసలైన వినోదాన్ని పంచడం ఖాయం.
మరిన్ని క్రీడా వార్తల కోసం ఇక్కడ క్లిక్ చేయండి..
