Shoaib Akhtar:టెస్ట్ క్రికెట్ కి గుడ్ బై చెప్పడం బెటర్.. టీమిండియా స్టార్ కు షోయబ్ అక్తర్ సలహా

ప్రముఖ పాకిస్థాన్ పేసర్ షోయబ్ అక్తర్ తాజాగా చేసిన వ్యాఖ్యల ప్రకారం, భారత స్టార్ బౌలర్ జస్ప్రీత్ బుమ్రా టెస్ట్ క్రికెట్‌ను పక్కన పెట్టి పొట్టి ఫార్మాట్లపై దృష్టి పెట్టాలని సూచించాడు. బుమ్రా ప్రస్తుతం ప్రపంచంలోని అత్యుత్తమ బౌలర్లలో ఒకడిగా నిలుస్తున్నాడు. అయితే అతని గాయాల సమస్యలు అతనికి పెద్ద అవరోధంగా మారుతున్నాయి.

గత నెలలో ఆస్ట్రేలియాతో జరిగిన తొలి టెస్టులో బుమ్రా ఒంటిచేత్తో మ్యాచ్‌ను భారత్‌కి అందించిన సంగతి తెలిసిందే. 8/72తో అద్భుతమైన ప్రదర్శన కనబరిచిన బుమ్రా, ఇటీవల జరిగిన 2వ టెస్టు తొలి ఇన్నింగ్స్‌లోనూ నాలుగు వికెట్లు పడగొట్టాడు. అయినప్పటికీ భారత్ ఆ మ్యాచ్‌లో ఓటమి పాలైంది. టెస్ట్ క్రికెట్‌లో తన అద్భుతమైన రికార్డు ఉన్నప్పటికీ, బుమ్రా సుదీర్ఘ ఫార్మాట్‌లో ఎక్కువ స్పెల్స్ వేయడం వల్ల అతనికి మరిన్ని గాయాల సమస్యలు ఎదురవుతాయని అక్తర్ అభిప్రాయపడ్డాడు.

షోయబ్ అక్తర్ మాట్లాడుతూ, “టెస్ట్ క్రికెట్ అంటే ఎక్కువసేపు బౌలింగ్ చేయడం అవసరం. బ్యాటర్లు మీపై వెంటనే దాడి చేయరు కాబట్టి లెంగ్త్‌కి పెద్దగా ప్రాముఖ్యత ఉండదు. కానీ పిచ్ సీమ్ చేయకపోతే మీరు మరింత కష్టపడాల్సి వస్తుంది. అలాంటప్పుడు బౌలర్లు కాస్త అలసిపోతారు, జట్టు కూడా అదే విషయాన్ని గమనించడం ప్రారంభిస్తుంది. బుమ్రా గొప్ప బౌలర్ అయినప్పటికీ, టెస్ట్ ఫార్మాట్‌లో వికెట్లు తీయడానికి అవసరమైన పేస్ కొద్దిగా తక్కువగానే అనిపిస్తోంది” అని చెప్పాడు.

అక్తర్ బుమ్రా స్థానంలో ఉంటే టెస్ట్ క్రికెట్‌ను పక్కన పెట్టి వైట్ బాల్ క్రికెట్‌పై పూర్తి దృష్టి పెడతానని స్పష్టం చేశాడు. టెస్ట్ క్రికెట్‌ను కొనసాగించాలంటే బుమ్రా తన వేగాన్ని మరింత పెంచాలి, కానీ పేస్ పెంచితే గాయాలు మరింతగా వేధిస్తాయి అని అక్తర్ అన్నారు. ఒకవేళ తనే బుమ్రా స్థానంలో ఉంటే, వైట్ బాల్ ఫార్మాట్‌లపై దృష్టి పెడతాను అని ఇది తన వ్యక్తిగత అభిప్రాయం మాత్రమే అని అక్తర్ వ్యాఖ్యానించాడు.

2018లో టెస్ట్ అరంగేట్రం చేసినప్పటి నుండి జస్ప్రీత్ బుమ్రా భారత జట్టు విజయాల్లో కీలక పాత్ర పోషిస్తున్నాడు. విరాట్ కోహ్లీ నాయకత్వంలో అతని ప్రదర్శన మరింత మెరుగై, భారత టెస్ట్ క్రికెట్ ఎదుగుదలలో ప్రధాన భాగస్వామిగా నిలిచాడు. ఇప్పటి వరకు 42 టెస్టుల్లో 185 వికెట్లు సాధించిన బుమ్రా, 11 సార్లు ఐదు వికెట్ల ఘనతను కూడా అందుకున్నాడు.

టెస్ట్ క్రికెట్‌ను కొనసాగించాలా, లేక పొట్టి ఫార్మాట్లపై పూర్తి దృష్టి పెట్టాలా అనే దానిపై బుమ్రా నిర్ణయం కీలకం. గాయాల సమస్యలు లేకుండా తన అత్యుత్తమ పేస్‌తో అన్ని ఫార్మాట్లలో కొనసాగాలని అభిమానులు ఆశిస్తున్నారు. టెస్ట్ క్రికెట్‌లో బుమ్రా ప్రదర్శనకు అక్తర్ చేసిన ఈ వ్యాఖ్యలు, క్రికెట్ ప్రపంచంలో చర్చనీయాంశంగా మారాయి.