ఎన్ని వత్తులతో దీపం వెలిగించాలి? అందులో ఉన్న ఆంతర్యం ఏమిటి?

హిందూ జీవన విధానంలో దైవారాధన, దీపారాధన ఒక ముఖ్యమైన భాగంగా ఉంటాయి. గరికపాటి నరసింహారావు తన ప్రవచనంలో దీని ప్రాముఖ్యతను, లోతైన ఆధ్యాత్మిక ఆంతర్యాన్ని వివరించారు. ప్రతి ఇల్లాలు.. సూర్యోదయం లోపే స్నానం చేసి, శుభ్రమైన వస్త్రాలు ధరించి దేవుడి దగ్గర దీపం వెలిగించడాన్ని దైనందిన నిత్యకర్మగా పాటించాలని ఆయన నొక్కి చెప్పారు. ఈ విధంగా రోజువారీ దైవారాధనలో పాల్గొనడం వల్లనే లక్ష్మీదేవి అనుగ్రహం లభిస్తుందని, లేని పక్షంలో కేవలం లక్కీ డ్రా లాంటి అదృష్టాలు మాత్రమే వస్తాయని అన్నారు. నిత్యం దైవారాధన చేయడం వల్ల “నిర్మల జ్ఞాన దీప ప్రభాజాల విధ్వస్త నిస్సార సంసార మాయాంధకారుల్” అవుతారని నన్నయ్యగారు చెప్పిన గొప్ప మాటను ప్రస్తావిస్తూ, వెలిగించిన దీపం జ్ఞానదీపంలా ప్రకాశిస్తుందని వివరించారు. జ్ఞానదీపం అంటే కేవలం ప్రమిదలో నూనె పోసి, ఒత్తులు వేసి వెలిగించడం మాత్రమే కాదని, శ్రీనాథ మహాకవి కాశీఖండంలో గుణనిధి కథలో చెప్పినట్లు “విమల విజ్ఞాన దీపంబు వెలుగుచుండ” దేవుడి దగ్గర జ్ఞాన దీపాన్ని పెట్టాలని పేర్కొన్నారు. ఈ విజ్ఞానం దీపం వెలిగించేటప్పుడు బ్రాహ్మణులు చదివే శ్లోకంలో ఉందని గరికపాటి నరసింహారావు వివరించారు: “ఆసాధ్యం త్రివర్తి సంయుక్తం వహ్నినాయోజితం ప్రియం, గృహాణ మంగళం దీపం త్రైలోక్య తిమిరాపహం”. ఈ శ్లోకం దీపారాధనలోని ముఖ్య అంశాలను తెలియజేస్తుంది. దీపం వెలిగించడానికి నూనె లేదా నెయ్యి అవశ్యకం. “త్రివర్తి సంయుక్తం” అంటే మూడు ఒత్తులు కలిపి ఒక వత్తిగా మెలిపెట్టి వెలిగించాలి. దీని వెనుక లోతైన ఆంతర్యం ఉంది. శాస్త్రం మూడొత్తులను కలిపి ఒక వత్తిగా పేనమని స్పష్టంగా పేర్కొంది. నూనె ఎప్పుడూ వంకరగా ప్రవహిస్తుంది కాబట్టి, ఒత్తిని మెలిపెట్టడం వలన నూనె బాగా అందుతుంది. దీపారాధనలో అత్యంత ముఖ్యమైన ఆధ్యాత్మిక అంతరార్థం ఈ విధంగా ఉంటుంది: మన దేహాన్నే ప్రమిదగా భావించి, అందులో భక్తి అనే నూనెను పోయాలి. మనలో ఉన్న త్రిగుణాలైన సత్వగుణం, రజోగుణం, తమోగుణం అనే మూడింటిని దారపు పోగులుగా భావించి, వాటిని మెలిపెట్టి, శివుడి దగ్గర దీపంగా సమర్పించాలి. “స్వామీ నువ్వు తీసుకో స్వామీ, నువ్వు తీసుకో” అని ప్రార్థిస్తూ ఈ త్రిగుణాలను ఆయనకు అంకితం చేయాలి. ఈ త్రిగుణాల కారణంగానే మానవులకు దుఃఖాలు కలుగుతాయి. వాటిని భగవంతునికి సమర్పించడం ద్వారా వాటి ప్రభావం నుండి విముక్తి పొందే మార్గాన్ని ఈ దీపారాధన సూచిస్తుంది. ఈ విధంగా, దీపారాధన కేవలం ఒక ఆచారం మాత్రమే కాకుండా, లోతైన తాత్విక, ఆధ్యాత్మిక సందేశాన్ని కలిగి ఉందని గరికపాటి నరసింహారావు తన ప్రవచనంలో స్పష్టం చేశారు.