‘బంగ బంధు’ షేక్ ముజిబుర్ రెహమాన్ కు గాంధీ శాంతి బహుమతి, 26 న బంగ్లాదేశ్ వెళ్లనున్న ప్రధాని మోదీ
2020 సంవత్సరానికి గాను 'బంగబంధు' షేక్ ముజిబుర్ రెహమాన్ కి భారత ప్రభుత్వం గాంధీ శాంతి బహుమతిని ప్రదానం చేసింది...
Updated on: Mar 22, 2021 | 8:22 PM
2020 సంవత్సరానికి గాను ‘బంగబంధు’ షేక్ ముజిబుర్ రెహమాన్ కి భారత ప్రభుత్వం గాంధీ శాంతి బహుమతిని ప్రదానం చేసింది. మహాత్మా గాంధీ 125 వ జయంతి ఉత్సవాలను పురస్కరించుకుని ఈ శాంతి బహుమతిని ప్రదానం చేశారు. 1995 నుంచి ప్రభుత్వం ఈ అవార్డును ఇస్తోంది. 2019 లో ఓమన్ సుల్తాన్ ఖబుస్ బిన్ సైద్ అల్ కి ప్రదానం చేశారు. బంగ్లాదేశ్ స్వాతంత్య్ర గోల్డెన్ జూబిలీ ఉత్సవాలకు, బంగ బంధు జయంతి సెలబ్రేషన్స్ కు హాజరయ్యేందుకు ప్రధాని మోదీ ఈనెల 26 న బంగ్లాదేశ్ వెళ్లనున్నారు. ఆ దేశ తొలి అధ్యక్షుడు, ప్రధాని కూడా అయిన షేక్ ముజిబుర్ రెహమాన్ 1975 ఆగస్టు 15 న హత్యకు గురయ్యారు. బంగ్లాదేశ్ లో ఆయనను ‘జాతిపిత’ అని వ్యవహరిస్తారు. తమ దేశ అభివృద్ధికి, వికాసానికి ఆయన ఎంతగానో సేవ చేశారు. ఆ దేశంలో ఆయనను ‘ముజీబ్’ గా కూడా ఆప్యాయంగా పిలుస్తారు.
అహింస ద్వారా గాంధేయ మార్గాల్లో సామాజిక, ఆర్థిక, రాజకీయ సమస్యల పరిష్కారానికి కృషి చేసినవారి సేవలకు గుర్తింపుగా గాంధీ శాంతి బహుమతిని ప్రదానం చేస్తున్నారు. అటు-2019 సంవత్సరానికి ఒమాన్ సుల్తాన్ ఖబుస్ ని కూడా ఈ పురస్కారం వరించింది. గత ఏడాది జనవరిలో ఆయన కన్ను మూశారు. ఓమన్ ను అత్యంత అధునాతన దేశంగా ఆవిర్భవింపజేసేందుకు ఆయన ఎనలేని కృషి చేశారని మోదీ తన ట్విటర్ లో పేర్కొన్నారు.
మరిన్ని ఇక్కడ చదవండి: కెనడాలోని హోటల్ వద్ద భారత జాతిపిత మహాత్మా గాంధీ ఐస్ విగ్రహం ! చూడాల్సిందే !
