ఇరాన్‌తో యుద్ధం కోసం అమెరికా ఖజానా గుల్ల..! రోజుకు ఎంత ఖర్చు చేస్తుందో తెలుసా..?

ఇరాన్‌, అమెరికా–ఇజ్రాయెల్ మధ్య యుద్ధం పశ్చిమాసియాలో మరింత ఉధృతమైంది. 13వ రోజు కూడా అమెరికా, ఇజ్రాయెల్‌ సంయుక్తంగా ఇరాన్‌పై భారీ క్షిపణి, బాంబు దాడులు కొనసాగించాయి. ప్రతిగా ఇరాన్‌ కూడా ఇజ్రాయెల్‌ తోపాటు గల్ఫ్‌ దేశాలపై విరుచుకుపడుతుంది. నౌకలు, నౌకాశ్రయాలను లక్ష్యంగా దాడులు కొనసాగుతున్నాయి. ఇరాన్‌తో పోరాడేందుకు అగ్రరాజ్యం అమెరికా అత్యాధునిక ఆయుధాలను ప్రయోగిస్తోంది.

ఇరాన్‌పై యుద్ధం చేయడం అమెరికాకు ఖరీదైనదిగా కనిపిస్తోంది. ఇరాన్ ప్రతీకార దాడుల్లో అమెరికా సైనిక పరికరాలలో భారీ నష్టాలను చవిచూడటమే కాకుండా, గణనీయమైన సైనిక ఖర్చులను కూడా భరించాల్సి వస్తోంది. యుఎస్ థింక్ ట్యాంక్ సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్ (CSIS) కొత్త పరిశోధన ప్రకారం, ఇరాన్‌పై అమెరికా సైనిక చర్యకు మొదటి 100 గంటల్లో దాదాపు 3.7 బిలియన్ డాలర్లు అంటే రూ. 34,002 కోట్లు ఖర్చయింది. ఆరు రోజుల్లోనే 11 బిలియన్‌ డాలర్లు అంటే భారత కరెన్సీలో రూ.లక్ష కోట్లకు పైమాటే. ఖర్చయినట్లు తెలుస్తోంది. సెనేటర్లతో జరిగిన అంతర్గత సమావేశంలో రక్షణ శాఖ ఈ ఖర్చు వివరాలను అందించినట్లు యూఎస్ మీడియా కథనాలు వెల్లడిస్తున్నాయి. అయితే, ఇది ఇంకా చాలా పెద్ద మొత్తంలో ఉండొచ్చని సెనేటర్‌ క్రిస్‌ కూన్స్ మీడియా సమవేశంలో తన అనుమానం వ్యక్తం చేశారు.

CSIS పరిశోధకులు మార్క్ కాన్సియన్ మరియు క్రిస్ పార్క్ చేసిన విశ్లేషణ ప్రకారం, ఇరాన్‌పై యుద్ధం వల్ల అమెరికాకు రోజుకు దాదాపు 891.4 మిలియన్ డాలర్లు ఖర్చవుతాయి. ఈ ఖర్చులో ఎక్కువ భాగం పెద్ద మొత్తంలో ఆయుధాల వాడకం, స్టెల్త్ బాంబర్‌ల వంటి అధునాతన వ్యవస్థల మోహరింపు కారణంగా ఉంది. ఈ బాంబర్‌లను ఉపయోగించి, యునైటెడ్ స్టేట్స్ ఇరాన్‌లో భారీ దాడులను ప్రారంభించింది. దీని వలన ఇరానియన్ భూగర్భ క్షిపణి సౌకర్యాలకు గణనీయమైన నష్టం వాటిల్లింది. అయితే, ఇరానియన్ ప్రతీకార దాడులను నిరోధించడంలో యునైటెడ్ స్టేట్స్ కూడా గణనీయమైన ఖర్చులను భరించింది.

యుద్ధం జరిగిన మొదటి 100 గంటల్లో US సైన్యం 2,000 కంటే ఎక్కువ భారీ ఆయుధాలను ఉపయోగించింది. ఈ ఆయుధాలను స్థిరంగా తిరిగి నింపడానికి సుమారు 3.1 బిలియన్ డాలర్లు ఖర్చవుతుందని అంచనా. ఏదైనా ఆలస్యం జరిగితే రోజుకు బిల్లు సుమారు 758.1 మిలియన్ డాలర్లు పెరుగుతుందని భావిస్తున్నారు. US సైనిక విభాగాల నిర్వహణ, మద్దతు ఖర్చుల కోసం అమెరికన్ కాంగ్రెస్ బడ్జెట్ ఆఫీస్ (CBO) అంచనాలపై వారి లెక్కలు ఆధారపడి ఉన్నాయని పరిశోధకులు చెబుతున్నారు. అధిక కార్యాచరణ టెంపో కోసం వారు సుమారు 10 శాతం అదనపు ఖర్చును కూడా జతచేయనున్నారు. అదనపు బడ్జెట్‌ను కోరుతూ వైట్‌హౌస్‌ త్వరలోనే కాంగ్రెస్‌కు ప్రతిపాదనలు పంపనుందని కొందరు సెనేటర్లు పేర్కొన్నారు. దాదాపు 50 బిలియన్‌ డాలర్ల వరకు కోరే అవకాశం ఉందని అంచనా వేస్తున్నారు.

ఇరాన్‌తో యుద్ధం ప్రారంభ గంటల్లో ఖర్చు చేసిన $3.7 బిలియన్లలో, దాదాపు $3.5 బిలియన్లు గతంలో బడ్జెట్‌లో పెట్టలేదని నివేదిక పేర్కొంది. దీని అర్థం పెంటగాన్ త్వరలో కాంగ్రెస్‌ను అదనపు నిధుల కోసం అడగాల్సి రావచ్చు. ప్రతిపక్ష డెమొక్రాట్లు యుద్ధాన్ని వ్యతిరేకిస్తున్నందున, ఈ డబ్బును ఏర్పాటు చేయడం ట్రంప్ ప్రభుత్వానికి కష్టంగా మారవచ్చు. మరోవైపు, అమెరికా రక్షణశాఖ ఇప్పటికే ఇబ్బందుల్లో ఉండగా.. ప్రస్తుత యుద్ధం వల్ల సైనిక నిల్వలు మరింత తగ్గుతాయని సెనేటర్లు ఆందోళన వ్యక్తం చేస్తున్నారు.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..