ఆర్మీలో ‘ఆమె’కు అందలం.. సుప్రీంకోర్టు ఆదేశం

భారత సైన్యంలో మహిళలకు కూడా సమున్నత పదవులు ఇవ్వాలని సుప్రీంకోర్టు సోమవారం చరిత్రాత్మక తీర్పునిచ్చింది. సైన్యంలో పురుష అధికారులతో సమానంగా కల్నల్ లేదా అంతకన్నా ఎక్కువస్థాయి పోస్టులు ఇవ్వాలని కేంద్రాన్ని ఆదేశించింది. అలాగే సైన్యంలో వారికి శాశ్వత కమిషన్ ఉండాలన్న  ఢిల్లీ హైకోర్టు ఉత్తర్వులను అత్యున్నత న్యాయస్థానం సమర్థించింది. సైన్యంలో  ఎక్కువగా గ్రామీణ మహిళలు చేరుతున్నారని, వీరి కారణంగా పురుష అధికారులు ఆత్మన్యూనతతో ఆందోళన చెందవచ్చునన్న కేంద్రం వాదనను కోర్టు కొట్టివేసింది. మీ మైండ్ సెట్ మారాలి అని చురకలు వేసింది. ఆర్మీలో మహిళలకు ఎన్ని ఏళ్ళ సర్వీసు ఉన్నా..శాశ్వత కమిషన్ వల్ల కలిగే ప్రయోజనాలు వారికి వర్తిస్తాయని స్పష్టం చేసిన కోర్టు.. మూడు నెలల్లోగా ఈ కమిషన్ ను  ఏర్పాటు చేయాలని  ఆదేశించింది. ‘పురుష సిబ్బందితో సమానంగా మహిళలకు కూడా అపాయింట్ మెంట్లు ఉండాలి.. అసలు  మీరు ‘జెండర్ వివక్ష ‘చూపుతున్నారు’ అని కూడా కోర్టు కేంద్రాన్ని తప్పు పట్టింది. కాగా-సుప్రీం తీర్పు పట్ల సైన్యంలోని మహిళలు హర్షం వ్యక్తం చేశారు.