తెలంగాణ ఉద్యమానికి అండగా నిలిచిన చిన్నమ్మ…

ప్రత్యేక రాష్ట్రం కోసం తెలంగాణలో జరిగిన ఉద్యమానికి మనస్పూర్తిగా మద్దతిచ్చారు సుష్మాస్వరాజ్. తెలంగాణ సాకారంలో “ఆ అమ్మ (సోనియా)నే కాదు.. ఈ చిన్నమ్మనూ గుర్తుంచుకోండి” అంటూ పార్లమెంట్‌లో తెలంగాణ బిల్లు ఆమోదం పొందిన వెంటనే తెలంగాణ ఎంపీలతో సుష్మాస్వరాజ్ అన్నారు. 2009 నుంచి 2014 వరకు లోక్‌సభలో ప్రతిపక్ష నాయకురాలిగా సుష్మా స్వరాజ్ వ్యవహరించడం.. తెలంగాణ ప్రత్యేక రాష్ట్ర ఏర్పాటుకు సానుకూలంగా మారింది. లోక్‌సభలో తెలంగాణ బిల్లును ప్రవేశపెట్టిన సమయంలో తీవ్ర ఉత్కంఠ పరిస్థితులు నెలకొన్నాయి. ఆ సమయంలో ఆమె మాట మార్చకుండా సంపూర్ణ మద్దతు ఇవ్వడంతో బిల్లు ఆమోదం పొందింది. ఉద్యమ సమయంలో పార్లమెంటు వెలుపలా, లోపలా తెలంగాణవాదానికి అండగా నిలిచారు. ఢిల్లీలో జంతర్‌మంతర్‌, ఏపీ భవన్‌, ఇతర చోట్ల జరిగిన ఆందోళనల్లో పాల్గొని ప్రసంగించారు. తెలంగాణలో జరిగిన ఉద్యమ కార్యక్రమాల్లోనూ పాల్గొన్నారు.