Russia-Ukraine War: 12రోజులుగా కొనసాగుతున్న యుద్ధం.. పుతిన్, జెలెన్‌స్కీతో మాట్లాడనున్న ప్రధాని మోడీ
ఉక్రెయిన్ ప్రెసిడెంట్ జెలెన్‌స్కీతో బారత ప్రధాని నరేంద్ర మోడీ స్వయంగా మాట్లాడనున్నారని భారత ప్రభుత్వ వర్గాలు వెల్లడించాయి.
Balaraju Goud | Edited By: Janardhan Veluru
Updated on: Mar 07, 2022 | 11:25 AM
PM Modi to talk Zelensky: రష్యా(Russia) ఉక్రెయిన్(Ukraine) దేశాల మధ్య ఉద్రిక్తతలు 12వ రోజుకు చేరుకున్నాయి. ఇప్పటి వరకు ఇరు దేశాల మధ్య రెండు దఫాలుగా చర్చలు జరిగినా ఏమీ సాధించలేకపోయారు. శాంతి ప్రయత్నాలకు సంబంధించి ఈరోజు ఇరు దేశాల మధ్య మూడో విడత సమావేశాలు జరగనున్నాయి. కాగా, ఉక్రెయిన్ ప్రెసిడెంట్ జెలెన్‌స్కీ, రష్యా అధ్యక్షుడు పుతిన్‌లతో బారత ప్రధాని నరేంద్ర మోడీ స్వయంగా మాట్లాడనున్నారని భారత ప్రభుత్వ వర్గాలు వెల్లడించాయి. అంతకుముందు ఉక్రెయిన్ కూడా సహాయం కోసం ప్రధాని మోడీకి విజ్ఞప్తి చేసింది. యుద్ధం ప్రారంభమైన తర్వాత ఉక్రెయిన్ అధ్యక్షుడు జెలెన్‌స్కీతో ప్రధాని మోడీ మాట్లాడటం ఇదే తొలిసారి. ఉక్రెయిన్‌లో చిక్కుకున్న భారతీయ విద్యార్థులు తిరిగి రావడంతో యుద్ధాన్ని ఎలా ఆపాలనే దానిపై జెలెన్‌స్కీతో చర్చల సందర్భంగా ఇద్దరు అగ్రనేతల మధ్య చర్చ జరిగే అవకాశం ఉందని భావిస్తున్నారు.
ఉక్రెయిన్‌పై రష్యా తన దాడిని నిరంతరం ఉధృతం చేస్తోంది. ఇప్పటివరకు, ఉక్రెయిన్‌లోని అనేక నగరాలు ఈ దాడిలో పూర్తిగా ధ్వంసమయ్యాయి. వాటితో పాటు వందలాది మంది ప్రాణాలు కోల్పోయారు. అదే సమయంలో, ఉక్రెయిన్ అధ్యక్షుడు జెలెన్‌స్కీ కూడా రష్యా ముందు వదులుకోవడానికి సిద్ధంగా లేరు. రష్యా ఉక్రెయిన్ మధ్య పెరుగుతున్న ఈ ఉద్రిక్తతను దృష్టిలో ఉంచుకుని, ఇప్పుడు ఇజ్రాయెల్, ఫ్రాన్స్, టర్కీ ఒప్పందం కుదుర్చుకోవడానికి ప్రయత్నిస్తున్నాయి. ఈ రోజు మూడవ రౌండ్ చర్చల కోసం రష్యా ఉక్రెయిన్ ముఖాముఖిగా మరోసారి చర్చలు జరపనున్నారు. ఇంతకు ముందు రెండు దఫాలుగా చర్చలు జరిపినా ఫలితం లేకపోయింది.
PM Narendra Modi to speak to Ukrainian President Zelenskyy on the phone today: GoI sources
(file photos) pic.twitter.com/PuWuCv2Fqw
— ANI (@ANI) March 7, 2022
రష్యా అధ్యక్షుడు పుతిన్‌తోనూ..
రష్యా అధ్యక్షుడు పుతిన్‌తోనూ ప్రధాని నరేంద్ర మోడీ ఫోన్‌లో మాట్లాడనున్నారు. రష్యా దాడులతో ఉక్రెయిన్ ఉక్కిరిబిక్కిరి అవుతున్న నేపథ్యంలో భారత్ జోక్యం చేసుకోవాలని ఉక్రెయిన్ సహా పలు దేశాలు కోరుతున్నాయి. యుద్ధం మొదలయ్యాక ఇది వరకే ఒకసారి పుతిన్‌తో ప్రధాని నరేంద్ర మోడీ ఫోన్‌లో మాట్లాడారు. యుద్ధం తీవ్రతరం దాల్చుతుండటంతో మరోసారి పుతిన్‌తో ప్రధాని మోడీ మాట్లాడనున్నట్లు కేంద్ర ప్రభుత్వ వర్గాలు తెలిపాయి.
సహకారం అందిస్తామన్న ఇజ్రాయెల్..
సంక్షోభానికి దౌత్యపరమైన పరిష్కారాన్ని కనుగొనడంలో తమ దేశం ఉక్రెయిన్‌కు సహాయం చేస్తుందని ఇజ్రాయెల్ ప్రధాన మంత్రి నఫ్తాలీ బెన్నెట్ చెప్పారు. అయినప్పటికీ దాని ప్రయత్నాలు ఫలించే అవకాశం లేదు. ఆదివారం జరిగిన తన మంత్రివర్గ సమావేశంలో బెన్నెట్ ఈ వ్యాఖ్య చేశారు. మాస్కోలో రష్యా అధ్యక్షుడు వ్లాదిమిర్ పుతిన్‌తో అకస్మాత్తుగా సమావేశమై తిరిగి వచ్చిన కొన్ని గంటల తర్వాత ఆయన మంత్రివర్గ సమావేశాన్ని నిర్వహించారు. అదే సమయంలో, పుతిన్ మరోసారి ఫ్రాన్స్ అధ్యక్షుడితో మాట్లాడారు. తమ చర్చల్లో ప్రోత్సాహకరంగా ఏమీ లేదని ఫ్రాన్స్ పేర్కొంది. ఇదిలా ఉండగా, టర్కీ అధ్యక్షుడు రెసెప్ తయ్యిప్ ఎర్డోగాన్ ఉక్రెయిన్‌లో తక్షణమే సాధారణ కాల్పుల విరమణకు పిలుపునిచ్చారు. రష్యా అధినేత వ్లాదిమిర్ పుతిన్‌తో ఆదివారం ఆయన టెలిఫోన్‌లో మాట్లాడారు. రష్యా అధ్యక్షుడు పుతిన్ ఉక్రెయిన్‌పై చేస్తున్న ఈ యుద్ధాన్ని ఆపడానికి సిద్ధంగా ఉన్నారని, అయితే ఉక్రెయిన్ తన షరతులను అంగీకరించినప్పుడే మాత్రమే ఇది జరుగుతుందని ఆయన అన్నారు. టర్కీ అధ్యక్షుడు రెసెప్ తయ్యిప్ ఎర్డోగాన్‌తో జరిపిన చర్చల ఆధారంగా ఈ వాదన జరిగింది. ఆదివారం టర్కీ అధ్యక్షుడు ఎర్డోగన్, అధ్యక్షుడు పుతిన్ మధ్య చర్చలు జరిగాయి.
ఉక్రెయిన్ దేశం నార్త్ అట్లాంటిక్ ట్రీటీ ఆర్గనైజేషన్(NATO)లో చేరకూడదని అనేదీ రష్యా ప్రధాన కండీషన్. ఉక్రెయిన్ ఏది కావాలంటే అది చేయాలి కానీ నాటోలో చేరకూడదని రష్యా చాలా సంవత్సరాలుగా చెబుతోంది. ఉక్రెయిన్ నాటోలో సభ్యత్వం పొందడం వల్ల మన భద్రతకు ముప్పు వాటిల్లుతుందని రష్యా పేర్కొంది. ఉక్రెయిన్‌తో రష్యా యుద్ధానికి ఇదే ప్రధాన కారణమని నిపుణులు అభిప్రాయపడటం గమనార్హం. రష్యా ఉక్రెయిన్ యుద్ధంలో ఇప్పటివరకు 1.5 మిలియన్ల మంది ప్రజలు నిరాశ్రయులయ్యారని నివేదికలు చెబుతున్నాయి. దీంతో పాటు వందలాది మంది సైనికులు చనిపోయారు. ఈ మరణాల సంఖ్యలో సాధారణ పౌరులు కూడా ఉన్నారు.
Read Also…
Operation Ganga: ఆగని ఆపరేషన్ గంగ.. ఉక్రెయిన్ నుంచి ఎన్ని విమానాలు వస్తున్నాయో తెలుసా..
Russia Ukraine Crisis: రష్యా-ఉక్రెయిన్ వార్‌‌లో కీలక మలుపు.. రంగంలోకి నాటో దళాలు..
