కర్ణాటకలో మరో పరువు హత్య.. కూతురును చంపి పూడ్చిన తండ్రి

కర్ణాటకలో మరో దారుణంలో వెలుగుచూసింది. దళిత యువకుడ్ని ప్రేమించిన బాలికను ఆమె తండ్రితోపాటు కుటుంబ సభ్యులు దారుణంగా హత్య చేశారు. కర్ణాటకలోని రామనగర జిల్లా బెట్టహల్లి గ్రామంలో ఈ దారుణ ఘటన వెలుగుచూసింది. 20 ఏండ్ల దళిత యువకుడితో సంబంధం పెట్టుకుందన్న కారణం చేత 18 ఏండ్ల బాలికను ఆమె తండ్రి, వరుసకు సోదరులైన మరో ఇద్దరు ఈ నెల 9న గ్రామ శివారులోని తోటలోకి తీసుకెళ్లారు. డంబుల్‌తో ఆమె తలపై మోది హతమార్చి అక్కడ పూడ్చిపెట్టారు. అనంతరం తన కుమార్తె కనిపించడంలేదంటూ బాలిక తండ్రి పోలీసులకు ఫిర్యాదు చేశాడు. పైగా ఆమె ప్రియుడిపై అనుమానం వ్యక్తం చేశాడు తండ్రి. పోలీసులు ఆ దళిత యువకుడ్ని అదుపులోకి తీసుకుని విచారించిన పోలీసులకు బాలిక అదృశ్యం వెనుక అతడి ప్రమేయం లేదని తెలిసింది. ఇది పరువు హత్యగా పోలీసులు తేల్చారు.

మరోవైపు, ఆరు రోజుల తర్వాత ఆ తోటలో మొక్కలు నాటేందుకు అక్కడివారు తవ్వగా శిథిలమైన బాలిక మృతదేహం బయటపడింది. ఈ కేసు దర్యాప్తు చేపట్టిన పోలీసులు.. తండ్రితో పాటు మరో ఇద్దరు నిందితులుగా నిర్ధారించారు. రామనగర జిల్లా బెట్టహల్లి గ్రామానికి చెందిన దళిత యువకుడిని 18 ఏళ్ల యువతి ప్రేమించింది. ఈ విషయం తెలిసిన తండ్రి కోపంతో రగిలిపోయాడు. ఆమెను హతమార్చాలనుకున్నాడు. మరో ఇద్దరు బంధువుల సహకారంతో బాలికను ఓ తోటలోకి తీసుకెళ్లి చంపి.. అక్కడే పూడ్చేశారని పోలీసులు తెలిపారు. దీంతో పోలీసులు ఆమె తండ్రిని అదుపులోకి తీసుకుని ప్రశ్నించగా నేరాన్ని ఒప్పుకున్నాడు. మరో ఇద్దరి సహాయంతో తన కుమార్తెను హత్య చేసినట్లు అంగీకరించాడు. దీంతో పోలీసులు ఆ ముగ్గురిని అరెస్ట్‌ చేశారు. వారిపై కేసు నమోదు చేసి దర్యాప్తు చేస్తున్నారు.