Beetroot Paneer Dosa: రక్తహీనతతో బాధపడుతున్నారా? హెల్తీ బ్రేక్ ఫాస్ట్‌గా ఈ  పింక్ దోశ తినాల్సిందే!

కానీ, కూరగాయల్లో రారాజైన బీట్‌రూట్, ప్రోటీన్ గని అయిన పనీర్ కలిపి చేసే ఈ స్పెషల్ దోశ తింటే మీ ఆరోగ్యానికి తిరుగుండదు. కేవలం రుచిలోనే కాదు, రక్తహీనతను తగ్గించడంలోనూ ఇది అద్భుతంగా పనిచేస్తుంది.

చాలా మంది పిల్లలు బీట్‌రూట్ కూర అంటే ముఖం చాటేస్తుంటారు. కానీ అదే బీట్‌రూట్‌ను ఈ వినూత్న పద్ధతిలో దోశలా చేసి పెడితే ప్లేట్లు ఖాళీ అవ్వాల్సిందే. ఎర్రగా మెరిసిపోయే ఈ దోశ చూడటానికి ఆకర్షణీయంగా ఉండటమే కాకుండా, శరీరానికి కావాల్సిన హిమోగ్లోబిన్‌ను పుష్కలంగా అందిస్తుంది. పనీర్ కలయిక వల్ల ఇది తిన్న తర్వాత చాలా సేపు ఆకలి వేయదు. మరి ఇంట్లోనే సులభంగా తయారు చేసుకోగలిగే ఈ ప్రోటీన్ పవర్ హౌస్ దోశ తయారీ విధానం తెలుసుకుందాం..

కావలసిన పదార్థాలు

ఈ దోశ తయారీకి ఒక మధ్యస్థ బీట్‌రూట్, 100 గ్రాముల పనీర్, ఒక కప్పు శెనగపిండి సిద్ధం చేసుకోవాలి. రుచి కోసం ఒక ఉల్లిపాయ, రెండు పచ్చిమిర్చి, చిన్న అల్లం ముక్క, అర స్పూన్ జీలకర్ర, కొద్దిగా కొత్తిమీర తురుము ఉండాలి. వీటితో పాటు రుచికి సరిపడా ఉప్పు, అవసరమైనంత నీరు, కాల్చడానికి నెయ్యి లేదా నూనె తీసుకోవాలి.

తయారు చేసుకునే విధానం

• ముందుగా బీట్‌రూట్ తొక్క తీసి శుభ్రంగా కడిగి సన్నగా తురుముకోవాలి. పనీర్‌ను చేతితో లేదా ఫోర్క్‌తో మెత్తగా నలుపుకోవాలి. ఇప్పుడు ఒక గిన్నెలో శెనగపిండి తీసుకుని, అందులో తురిమిన బీట్‌రూట్, పనీర్, సన్నగా తరిగిన ఉల్లిపాయ, పచ్చిమిర్చి, అల్లం తురుము, జీలకర్ర, కొత్తిమీర, ఉప్పు వేసి బాగా కలపాలి.
• ఈ మిశ్రమంలో కొద్దికొద్దిగా నీరు పోస్తూ గడ్డలు లేకుండా దోశ పిండిలా జారేలా కలుపుకోవాలి. శెనగపిండి వల్ల దోశకు మంచి బైండింగ్ రావడమే కాకుండా అదనపు ప్రోటీన్ అందుతుంది.
• స్టవ్ మీద పెనం పెట్టి వేడి అయ్యాక కొద్దిగా నూనె రాయాలి. ఒక గరిటె పిండిని తీసుకుని పెనంపై పలుచగా పరచాలి. పైన కొంచెం నెయ్యి వేసి రెండు వైపులా గోధుమ రంగు వచ్చే వరకు క్రిస్పీగా కాల్చుకోవాలి. అంతే.. వేడివేడి బీట్‌రూట్ పనీర్ ప్రోటీన్ దోశ సిద్ధం.

ఆరోగ్య ప్రయోజనాలు

• బీట్‌రూట్‌లోని ఐరన్ వల్ల రక్తహీనత తగ్గుతుంది.
• పనీర్ లోని ప్రోటీన్ కండరాల నిర్మాణానికి సహాయపడుతుంది.
• ఇందులో ఫైబర్ అధికంగా ఉండటం వల్ల బరువు తగ్గాలనుకునే వారికి ఇది మేలైన అల్పాహారం.

ఆరోగ్యం కోసం కష్టపడాల్సిన అవసరం లేదు, మనం తినే ఆహారంలో చిన్న మార్పులు చేసుకుంటే చాలు. ఈ బీట్‌రూట్ పనీర్ దోశను పుదీనా చట్నీ లేదా అల్లం పచ్చడితో తింటే రుచి అద్భుతంగా ఉంటుంది.