ఢిల్లీ మెట్రో స్టేషన్ సమీపంలో భారీ అగ్నిప్రమాదం.. చిన్నారికి తీవ్ర గాయాలు..!

ఢిల్లీలో ఘోర ప్రమాదం చోటు చేసుకుంది. రోహిణిలోని రిథాల మెట్రో స్టేషన్ సమీపంలోని అనేక గుడిసెలలో శుక్రవారం (నవంబర్ 7) రాత్రి భారీ అగ్నిప్రమాదం సంభవించిందని ఢిల్లీ అగ్నిమాపక విభాగం (DFS) తెలిపింది. రాత్రి 10:56 గంటల ప్రాంతంలో అగ్నిప్రమాదం గురించి తమకు కాల్ వచ్చిందని, ఆ తర్వాత 15 అగ్నిమాపక యంత్రాలను సంఘటనా స్థలానికి పంపామని DFS తెలిపింది. ప్రస్తుతం అగ్నిమాపక సిబ్బంది మంటలను ఆర్పడానికి ప్రయత్నిస్తున్నారు.

ప్రాథమిక సమాచారం ప్రకారం అనేక గుడిసెలు కాలిపోయాయి. అయితే, అనేక ఎల్‌పిజి సిలిండర్లు పేలాయని, ఇది మంటలను మరింత పెంచిందని, నివాసితులలో భయాందోళనలకు కారణమైందని పోలీసు వర్గాలు తెలిపాయి. మంటలను ఆర్పడానికి బృందాలు పనిచేస్తున్నాయని డిఎఫ్‌ఎస్ అధికారి ఒకరు తెలిపారు. రిథాల మెట్రో స్టేషన్ – ఢిల్లీ జల్ బోర్డు మధ్య ఉన్న బెంగాలీ సెటిల్‌మెంట్‌లోని మురికివాడల్లో మంటలు చెలరేగాయి. అగ్నిమాపక యంత్రాలు సంఘటనా స్థలానికి చేరుకుని మంటలను అదుపులోకి తీసుకువచ్చేందుకు ప్రయత్నించాయి. మొత్తం 29 అగ్నిమాపక యంత్రాలు సంఘటనా స్థలంలో ఉన్నాయి. అయితే ఈ ఘటనలో ఒక పిల్లవాడు తీవ్రంగా గాయపడ్డాడని, అంబులెన్స్‌లో ఆసుపత్రికి తరలించామని అగ్నిమాపక అధికారి ఎస్.కె. దువా తెలిపారు.

మీడియా నివేదికల ప్రకారం, పదుల సంఖ్యలో గుడిసెలు బూడిదయ్యాయి. స్థానికులు తమ వస్తువులను కాపాడుకోవడానికి ప్రయత్నిస్తున్నట్లు కనిపించారు. పోలీసులు వెంటనే ఆ ప్రాంతాన్ని చుట్టుముట్టారు. మంటలు మరింత వ్యాపించకుండా నిరోధించడానికి అదనపు అగ్నిమాపక యంత్రాలను అప్రమత్తంగా ఉంచారు. అగ్నిమాపక బృందాలు పూర్తి శక్తితో పనిచేస్తున్నాయి. పోలీసుల సహాయంతో, సహాయక చర్యలు చేపట్టారు.

మరిన్ని క్రైమ్ వార్తల కోసం ఇక్కడ క్లిక్ చేయండి..