సర్వీస్ రివాల్వర్ చేతికిచ్చి.. లేడీ డాన్సర్‌తో రెచ్చిపోయిన పోలీస్.. కట్ చేస్తే అంతా పరార్..!

బీహార్‌లో ఒక కానిస్టేబుల్ చేసిన పనికి పోలీసు శాఖకే తలవంపులు తెచ్చిపెట్టాయి. బెట్టియా జిల్లా ముఫుసిల్ పోలీస్ స్టేషన్ పరిధిలోని రాంపూర్ బైరాగి గ్రామంలో పవన్ సాహ్ని కొడుకు ఛథియార్ పెళ్లి వేడుకలు జరుగుతున్నాయి. పవన్ అతిథుల కోసం విందు, డాన్స్ కార్యక్రమాన్ని ఏర్పాటు చేశాడు. ఇంతలో, ఆ కార్యక్రమానికి హాజరైన కానిస్టేబుల్ అమిత్ చౌదరి, ఒక లేడీ డాన్సర్‌కు ప్రభుత్వ పిస్టల్‌ను అందించాడు. వేదికపై ఉన్న జనసమూహం వైపు ఆ డాన్సర్ ఆయుధాన్ని ఊపుతూ రెచ్చిపోయింది. ఈ సంఘటనకు సంబంధించిన వీడియో ప్రస్తుతం సోషల్ మీడియాలో వేగంగా వైరల్ అవుతోంది. ఇది పోలీసు శాఖకు చెడ్డపేరు తెస్తోంది. ఆ కానిస్టేబుల్‌ను గోపాల్‌గంజ్‌లోని కుచాయ్ కోర్ట్ పోలీస్ స్టేషన్‌లో విధులు నిర్వహిస్తున్నట్లు సమాచారం.

లేడీ డాన్సర్‌కి పిస్టల్ ఇచ్చిన తర్వాత కానిస్టేబుల్ అమిత్ చౌదరి సంబరాల్లో కాల్పులు జరుపుతున్నట్లు వీడియోలో స్పష్టంగా కనిపించింది. ఈ ఆకస్మిక కాల్పులు గ్రామస్తులలో భయాందోళనకు గురిచేశాయి. సంఘటన స్థలంలో ఉన్న అతని సోదరుడు మిసిర్ చౌదరి, కానిస్టేబుల్ అన్మోల్ తివారీపై కూడా కేసు నమోదైంది. ఆ సమయంలో అన్మోల్ తివారీ తన తల్లి ఇంటికి వెళ్తున్నారని, అనేక మంది పోలీసు స్నేహితులు కూడా వేడుకలో ఉన్నారని తెలుస్తోంది. ఈ చర్యను కొంతమంది నిరసించినప్పుడు, పోలీసు అధికారులు తమతో దురుసుగా ప్రవర్తించారని గ్రామస్తులు చెబుతున్నారు. దీంతో కార్యక్రమంలో గందరగోళం నెలకొంది. ఈ సంఘటనకు సంబంధించిన వీడియో వైరల్ అయిన తర్వాత, విషయం మరింత తీవ్రమైంది. కానిస్టేబుల్‌పై కఠిన చర్యలు తీసుకోవాలనే డిమాండ్లు మొదలయ్యాయి.

ఈ విషయం సున్నితత్వాన్ని దృష్టిలో ఉంచుకుని, బెట్టియా ముఫుసిల్ పోలీస్ స్టేషన్ వెంటనే చర్య తీసుకుంది. అమిత్ చౌదరి, అతని సోదరుడు మిసిర్ చౌదరి, అన్మోల్ తివారీ సహా మరికొందరు గుర్తు తెలియని వ్యక్తులపై ఎఫ్ఐఆర్ నమోదు చేసినట్లు పోలీసులు తెలిపారు. ముగ్గురిని అరెస్టు చేయడానికి గాలింపు చేపట్టినట్లు వెల్లడించారు. “ప్రభుత్వ ఆయుధాలను వ్యక్తిగత వినోదం, ప్రజా కార్యక్రమాలకు ఎట్టి పరిస్థితుల్లోనూ ఉపయోగించకూడదు. ఇది తీవ్రమైన క్రమశిక్షణా రాహిత్యం. వీడియోపై దర్యాప్తు జరుగుతోంది. నిందితులపై ఆయుధ చట్టంతో సహా కఠినమైన సెక్షన్ల కింద కేసు నమోదు చేయడం జరిగింది” అని డీఎస్పీ వివేక్ దీప్ అన్నారు.

మరిన్ని క్రైమ్ వార్తల కోసం ఇక్కడ క్లిక్ చేయండి..