Heart: ఈ రెండు సమస్యలున్న వారికి.. గుండెపోటు వచ్చే అవకాశం అధికం..

మారిన జీవన విధానం, తీసుకుంటున్న ఆహారంలో మార్పులు, శారీరక శ్రమ తగ్గడం కారణం ఏదైనా ఇటీవల గుండె సంబంధిత సమస్యల బారిన పడుతోన్న వారి సంఖ్య క్రమంగా పెరుగుతోంది. గుండె పోటు బారిన పడడానికి ఎన్నో రకాల కారణాలు ఉంటాయని ప్రత్యేకంగా చెప్పాల్సిన పనిలేదు. ముఖ్యంగా రక్తపోటు ఉన్న వారికి గుండె పోటు వచ్చే అవకాశాలు ఎక్కువగా ఉంటాయని తెలిసిందే. అయితే రక్తపోటుతో పాటు డయాబెటిస్‌ ఉన్న వారిలో గుండె సమస్యలు వచ్చే అవకాశం మరింత ఎక్కువగా ఉంటుందని నిపుణులు అంటున్నారు.

గుండెకు సరిగ్గా రక్తం పంపింగ్ కానీ సమయంలోనే హార్ట్‌ ఎటాక్‌ వస్తుందనే విషయం తెలిసిందే. గుండె జబ్బులు రావడానికి రక్తపోటుతో పాటు మధుమేహం కూడా ప్రధాన కారణమని నిపుణులు అంటున్నారు. గుండెపోటుతో మరణించిన వారిలో మూడొంతుల మంది అప్పటికే బీపీతో బాధపడుతున్నారని తేలింది. వైద్యుల ప్రకారం.. సాధారణ రక్తపోటు ఉన్నవారితో పోలిస్తే అధిక రక్తపోటు ఉన్న రోగులలో గుండె ఆగిపోయే ప్రమాదం రెట్టింపు అవుతుంది.

గుండె వైఫల్యానికి ఆల్కహాల్‌, స్మోకింగ్ వంటివి ప్రధానకారణమని నిపుణులు అంటున్నారు. శ్వాస తీసుకోవడంలో ఇబ్బందులు ఏర్పడడం, విపరీతమైన దగ్గు, అలసట, వికారం, ఆకలి తగ్గడం, హృదయ స్పందన రేటులో ఆకస్మిక మార్పులు వంటివన్నీ గుండె సంబంధిత సమస్యలకు ప్రాథమిక లక్షణాలుగా నిపుణులు చెబుతున్నారు. గుండె సమస్యల బారిన పడకుండా ఉండాలంటే తీసుకునే ఆహారంలో ఉప్పును తగ్గించాలని నిపుణులు చెబుతున్నారు.

రక్తపోటు పెరగడానికి ఉప్పు ఎక్కువగా తీసుకోవడం ప్రధాన కారణమని నిపుణులు అంటున్నారు. ఎక్కువ కాలం నిల్వ ఉండేందుకు పచ్చళ్లతో పాటు ప్యాక్‌ చేసిన ఆహారంలో ఉప్పును ఎక్కువగా ఉపయోగిస్తుంటారు. ఇలాంటివి రక్తపోటుకు దారి తీస్తుంది. 5 గ్రాముల కంటే తక్కువ ఉప్పు తీసుకోవాలని నిపుణులు సూచిస్తున్నారు. వ్యాయామం కచ్చితంగా జీవితంలో ఒక భాగం చేసుకోవాలి. రోజు కనీసం 20 నిమిషాలు వాకింగ్ చేయాలి. స్మోకింగ్, డ్రింకింగ్‌ను పూర్తిగా మానేయాలి. ఇవన్నీ పాటిస్తూ యోగా, మెడిటేషన్‌ వంటివి పాటించడం వల్ల రక్తపోటు కంట్రోల్‌ అవ్వడంతో పాటు గుండె సమస్యలు దూరమవుతాయి.

నోట్‌: పైన తెలిపిన విషయాలు కేవలం ప్రాథమిక సమాచారం మేరకు మాత్రమే. ఆరోగ్యానికి సంబంధించి వైద్యుల సూచనలు పాటించడమే ఉత్తమం.

మరిన్ని లైఫ్‌స్టైల్‌ వార్తల కోసం క్లిక్‌ చేయండి..