మనం రోజూ వాడే ఈ వస్తువులకి ఎక్స్పైరీ డేట్ ఉండదట.. ఎందుకో తెలుసా..?

తేనెలో సహజంగా క్రిమి నివారణ లక్షణాలు ఉండటం వల్ల ఇది శుద్ధంగా దీర్ఘకాలం పాటు నిల్వ ఉంటుంది. ఇందులో తేమ చాలా తక్కువగా ఉండటంతో బ్యాక్టీరియా లాంటి సూక్ష్మజీవులు దీనిపై ప్రభావం చూపలేవు. అయితే దీనిని గాలి చొరబడని గాజు సీసాలో నిల్వ చేయడం తప్పనిసరి. దీన్ని పొడిగా, చల్లగా ఉండే ప్రదేశంలో ఉంచితే దీర్ఘకాలం అదే స్వచ్ఛతతో ఉంటుంది.

ఉప్పు అసలు పాడవదు అనే చెప్పాలి. ఇది సాధారణంగా సోడియం క్లోరైడ్ అనే స్థిరమైన పదార్థం వల్ల కాలాన్ని అధిగమించి నిలవగలదు. ఉప్పును తేమ పడని విధంగా గాజు లేదా స్టీల్ డబ్బాల్లో నిల్వ ఉంచాలి. దానిని తీయడానికి పొడి చెంచా మాత్రమే ఉపయోగించాలి. ఇలా చేస్తే దీన్ని చాలా సంవత్సరాలు నిల్వ ఉంచవచ్చు.

చక్కెర కూడా సరైన రక్షణలో పాడయ్యే అవకాశమే లేదు. దీనిని పొడి వాతావరణంలో, చల్లటి ప్రదేశంలో ఉంచితే చాలా సంవత్సరాలు నిల్వ ఉంటుంది. దీన్ని తీసేటప్పుడు తేమ కలిగిన చెంచాలు ఉపయోగించకూడదు. అలాగే వేడి ప్రదేశాల్లో ఉంచితే తడిసి గడ్డకట్టే అవకాశం ఉంటుంది. అందుకే ఎప్పుడూ గాలి చొరబడని డబ్బాలోనే పెట్టాలి.

బియ్యం కూడా నిల్వ ఉంచే సమయంలో కొంత జాగ్రత్త పాటిస్తే వంద శాతం పాడవ్వవు. మంచి నాణ్యత ఉన్న బియ్యాన్ని ఎంచుకొని.. గాలి చొరబడని డబ్బాల్లో భద్రపరచాలి. వీటిని తేమ లేదా పురుగులు దూరంగా ఉండే ప్రదేశంలో నిల్వ చేస్తే తినేందుకు సురక్షితంగా నిలవగలవు. కొన్నిసార్లు వీటి నాణ్యత తగ్గొచ్చు కానీ పాడవ్వవు.

నూనె కూడా ఎప్పుడూ వాడే ఒక ప్రధాన వస్తువు. దీన్ని నూనె బాటిల్స్ నుంచి తీసి గాలి రాకుండా మూతపెట్టగల గాజు సీసాల్లో నిల్వ చేస్తే దీర్ఘకాలం నాణ్యతతో నిలవగలదు. నేరుగా ఎండ లేదా వేడితో సంబంధం ఉండే ప్రదేశాల్లో ఉంచకూడదు. దీని రుచి, వాసన నిలిపేందుకు చల్లటి ప్రదేశంలో భద్రపరచాలి.

ఈ పదార్థాలకు సాధారణంగా ఎక్స్‌పైరీ డేట్ ఉండకపోవచ్చు. కానీ ఎక్కువ రోజులు పాడవకుండా నిల్వ చేయాలంటే కొన్ని జాగ్రత్తలు తీసుకోవడం తప్పనిసరి. గాలి, తేమ, వెలుతురు వంటి కారణాల వల్ల ఇవి త్వరగా నాణ్యత కోల్పోయే అవకాశం ఉంటుంది. అందుకే ఇలాంటి అంశాలను నివారించేలా వాటిని భద్రంగా నిల్వ చేయాలి.

వంటగదిలో సరిగ్గా నిర్వహణ చేస్తే ఆరోగ్యానికి మేలు చేసే పదార్థాలను ఎక్కువకాలం భద్రంగా ఉంచుకోవచ్చు. ఈ జాగ్రత్తలు పాటిస్తే ఆహారం వృథా కాకుండా ఉండటం‌తో పాటు మన ఖర్చు కూడా ఆదా అవుతుంది.