Vaikuntha Ekadashi 2025: వైకుంఠ ఏకాదశి ఎప్పుడు? పూర్తి వివరాలు.. ఆ రోజున ఈ 5 పనులు చేసిన వారికి తిరుగులేని ఐశ్వర్యం..!

కోరిన కోర్కెలు తీర్చే రోజు.. మోక్షాన్ని ప్రసాదించే తిథి.. అదే ముక్కోటి ఏకాదశి! శ్రీమహావిష్ణువును, లక్ష్మీదేవిని భక్తిశ్రద్ధలతో కొలిచే ఈ పర్వదినం 2025లో డిసెంబర్ 30న రానుంది. ఈ రోజున ఉపవాసం ఉంటే గత జన్మల పాపాలు తొలగిపోవడమే కాకుండా, మరణానంతరం వైకుంఠ ప్రాప్తి లభిస్తుందని పురాణాలు చెబుతున్నాయి. ఆ రోజు పాటించాల్సిన విధివిధానాలు మీకోసం.

పుష్య మాసంలో వచ్చే శుక్ల పక్ష ఏకాదశినే ‘వైకుంఠ ఏకాదశి’ లేదా ‘ముక్కోటి ఏకాదశి’ అని పిలుస్తారు. ఈ రోజున విష్ణుమూర్తి కొలువై ఉండే వైకుంఠ ద్వారాలు తెరుచుకుంటాయని, ఆ రోజు స్వామిని దర్శించుకుంటే సకల పాపాలు హరిస్తాయని భక్తుల ప్రగాఢ నమ్మకం.

ముఖ్యమైన తేదీ, సమయాలు:

వైకుంఠ ఏకాదశి తేదీ: డిసెంబర్ 30, 2025 (మంగళవారం)

ఏకాదశి తిథి ప్రారంభం: డిసెంబర్ 30 ఉదయం 7:51 గంటలకు.

ఏకాదశి తిథి ముగింపు: డిసెంబర్ 31 ఉదయం 5:01 గంటలకు.

ఉదయ తిథి ప్రకారం: డిసెంబర్ 30న పండుగ జరుపుకోవాలి.

వైకుంఠ ఏకాదశి విశిష్టత: దీనిని ‘మోక్షద ఏకాదశి’ అని కూడా అంటారు. ఈ రోజున ఉపవాసం ఉండి శ్రీమన్నారాయణుడిని పూజించడం వల్ల సంతాన సౌఖ్యం, దీర్ఘాయువు మరియు మోక్షం లభిస్తాయి. ముఖ్యంగా సంతానం లేని దంపతులు ఈ వ్రతాన్ని ఆచరిస్తే సత్ఫలితాలు ఉంటాయని ఆధ్యాత్మిక వేత్తలు చెబుతున్నారు.

పాటించాల్సిన నియమాలు:

స్నానం, సంకల్పం: తెల్లవారుజామునే నిద్రలేచి, స్నానమాచరించి విష్ణుమూర్తిని ధ్యానించాలి.

ఉపవాసం: రోజంతా నిరాహారంగా ఉండాలి. సాధ్యం కాని వారు పండ్లు లేదా తులసి తీర్థం తీసుకోవచ్చు.

పూజ: లక్ష్మీనారాయణులకు ధూప, దీప, నైవేద్యాలు సమర్పించి, విష్ణు సహస్రనామ పారాయణం చేయాలి.

జాగారం: ఏకాదశి రాత్రి నిద్రపోకుండా భగవంతుని నామస్మరణతో జాగారం చేయాలి.

దానం: ద్వాదశి రోజున (డిసెంబర్ 31) బ్రాహ్మణులకు లేదా పేదలకు అన్నదానం చేసి, ఆ తర్వాతే ఉపవాసం విరమించాలి.

ముందస్తు నియమం: ఏకాదశికి ముందు రోజు (డిసెంబర్ 29) సాయంత్రం నుంచే సాత్విక ఆహారం తీసుకోవాలి. బ్రహ్మచర్యం పాటించాలి మరియు నేలపై నిద్రించడం ఉత్తమం.