సగం కోసిన నిమ్మకాయ ముక్కను ఫ్రిజ్‌లో పెడితే ఏమవుతుందో తెలుసా..?

నిమ్మకాయ మన రోజువారీ ఆహారంలో ముఖ్య భాగం. ఉదయం లేవగానే గోరువెచ్చని నీటిలో కలుపుకోవడం మొదలుకుని.. లెమన్ టీ, నిమ్మకాయ పులిహోర, సలాడ్లు, కూరల్లో రుచి కోసం నిమ్మరసాన్ని విరివిగా వాడుతుంటారు. అయితే నిమ్మకాయను వాడే క్రమంలో చాలామంది ఎదుర్కొనే సాధారణ సమస్య.. సగం ముక్క మిగిలిపోవడం. అలా మిగిలిన సగం నిమ్మకాయను చాలామంది నేరుగా ఫ్రిజ్‌లో ఒక మూలన పెట్టేస్తుంటారు. కానీ మరుసటి రోజు చూసేసరికి అది పూర్తిగా ఎండిపోయి, పైభాగం గట్టిపడి, రసం పిండటానికి కూడా రాకుండా నిరుపయోగంగా మారుతుంది. ఈ చిన్న కిచెన్ సమస్యకు పరిష్కారంగా వంటింట్లో ఉండే వస్తువులతోనే నిమ్మకాయను ఎక్కువ రోజులు తాజాగా ఉంచే అద్భుతమైన చిట్కాలు అందుబాటులో ఉన్నాయి.

ఫ్రిజ్‌లో పెట్టినా నిమ్మకాయ ఎందుకు ఎండిపోతుంది?

నిమ్మకాయను కోసిన వెంటనే దాని లోపలి గుజ్జు భాగం నేరుగా గాలికి గురవుతుంది. రిఫ్రిజిరేటర్‌లో ఉండే చల్లని, పొడి గాలి నిమ్మకాయలోని సహజ తేమను వేగంగా పీల్చేస్తుంది. దీనివల్ల కోసిన భాగం క్రమంగా గట్టిగా మారిపోతుంది. అంతేకాకుండా ఫ్రిజ్‌లో నిల్వ ఉంచే ఉల్లిపాయలు, వెల్లుల్లి, మసాలా కూరల ఘాటైన వాసనలను కోసిన నిమ్మకాయ సులభంగా పీల్చుకుంటుంది. ఫలితంగా నిమ్మకాయ తన సహజ సువాసనను, నాణ్యతను కోల్పోతుంది.

అల్యూమినియం ఫాయిల్ మ్యాజిక్

సగం నిమ్మచెక్క మిగిలిపోతే దాన్ని పారేయకుండా, ఎండిపోకుండా కాపాడటానికి ఇంట్లో ఉండే అల్యూమినియం ఫాయిల్ చక్కగా ఉపయోగపడుతుంది. నిమ్మకాయ కోసిన భాగాన్ని అల్యూమినియం ఫాయిల్ పేపర్‌తో పూర్తిగా, గట్టిగా కప్పేయాలి. ఇలా చుట్టడం వల్ల ఫ్రిజ్‌లోని పొడి గాలి నిమ్మ గుజ్జుకు నేరుగా తగలకుండా అడ్డుకట్ట పడుతుంది. ఫ్రిజ్‌లోని ఇతర పదార్థాల ఘాటైన వాసనలు నిమ్మకాయలోకి చేరకుండా రక్షణ లభిస్తుంది. ఈ పద్ధతి వల్ల నిమ్మకాయలోని రసం, తేమ ఆవిరి కాకుండా ఎక్కువ రోజుల పాటు తాజాగా ఉంటాయి.

మరికొన్ని చిట్కాలు..

ఎయిర్‌టైట్ కంటైనర్: అల్యూమినియం ఫాయిల్ అందుబాటులో లేకపోతే, ఏదైనా చిన్న గాలి చొరబడని డబ్బాను ఎంచుకోవాలి. అందులో సగం కోసిన నిమ్మచెక్కను కోసిన భాగం కిందికి ఉండేలా బోర్లించి, మూత గట్టిగా పెట్టి ఫ్రిజ్‌లో భద్రపరచాలి.

సిలికాన్ కవర్లు: మార్కెట్లో లభించే రీయూజబుల్ సిలికాన్ ఫుడ్ కవర్లను కోసిన నిమ్మకాయపై గట్టిగా అమర్చి ఫ్రిజ్‌లో ఉంచవచ్చు. వీటిని శుభ్రం చేసి మళ్లీ మళ్లీ వాడుకోవచ్చు.

ఈ చిన్నపాటి జాగ్రత్తలు పాటిస్తే వంటింట్లో సగం కోసిన నిమ్మకాయలు వృథా కాకుండా, ఎప్పుడు కావాలన్నా తాజా రసాన్ని సులభంగా పిండుకోవచ్చు.